കൊച്ചി: കൊച്ചിന്‍ ഷിപ്‌യാര്‍ഡില്‍ നിര്‍മിക്കുന്ന കപ്പലിനകത്ത് ‘ഐ ലൗവ് പാകിസ്ഥാന്‍’ എന്നെഴുതിയത് കണ്ടെത്തിയ സംഭവം അമിത കരാര്‍വത്കരണത്തിന്റെ തിരിച്ചടിയാണെന്ന് ബിഎംഎസ് സംസ്ഥാന സെക്രട്ടറിയും ഷിപ്‌യാര്‍ഡ് എംപ്ലോയീസ് സംഘ് (ബിഎംഎസ്) പ്രസിഡന്റുമായ കെ.വി. മധുകുമാര്‍ കുറ്റപ്പെടുത്തി. ഭാരതത്തിന്റെ അഭിമാന പദ്ധതിയായിരുന്ന ഐഎന്‍എസ് വിക്രാന്ത് നിര്‍മാണത്തിലിരിക്കെ ഹാര്‍ഡ് ഡിസ്‌ക്കുകള്‍ മോഷണം പോയതും, പാകിസ്ഥാന്‍ ഏജന്റുമാര്‍ക്ക് തന്ത്രപ്രധാന വിവരങ്ങള്‍ ചോര്‍ത്തി നല്‍കിയതിന് മാല്‍പേ യൂണിറ്റില്‍ നിന്ന് കരാര്‍ തൊഴിലാളികള്‍ അറസ്റ്റിലായതും വലിയ സുരക്ഷാ വീഴ്ചയാണ്.
യുദ്ധക്കപ്പലുകളും എയര്‍ക്രാഫ്റ്റ് കാരിയര്‍ അടക്കമുള്ള ഭാരത നാവികസേനയ്‌ക്കാവശ്യമായ കപ്പലുകളുടെ നിര്‍മാണവും, അറ്റകുറ്റപ്പണികളും നടത്തുന്നത് കൊച്ചിന്‍ ഷിപ്‌യാര്‍ഡാണ്. അതുകൊണ്ട് തന്നെ ഇവിടുത്തെ സുരക്ഷാവീഴ്ച രാജ്യസുരക്ഷ യെ വളരെ ഗുരുതരമായി ബാധിക്കുന്നതാണ്. ഷിപ്‌യാര്‍ഡില്‍ ഇപ്പോള്‍ തന്നെ മൂന്നില്‍ രണ്ട് ഭാഗം ജീവനക്കാര്‍ കരാറടിസ്ഥാനത്തില്‍ ജോലി ചെയ്യുന്നവരാണ്.
വളരെ പ്രധാനപ്പെട്ട പ്രോജക്ടുകള്‍ തന്നെ ഔട്ട്‌സോഴ്‌സ് ചെയ്തു കൊണ്ടിരിക്കുന്നു.
വേണ്ടത്ര പരിശോധനയില്ലാതെ കരാര്‍ നല്‍കുന്നതും ജീവനക്കാരെ നിയോഗിക്കുന്നതും ഇത്തരം സംഭവങ്ങള്‍ ആവര്‍ത്തിക്കാന്‍ കാരണമാകുന്നു. രാജ്യസുരക്ഷയ്‌ക്ക് വേണ്ട തന്ത്രപ്രധാന ജോലികള്‍ ഏറ്റെടുത്തു നടത്തുന്ന ഷിപ്‌യാര്‍ഡിലെ അമിത കരാര്‍വത്കരണം അവസാനിപ്പിക്കണമെന്നും രാജ്യതാത്പര്യങ്ങള്‍ക്ക് വിരുദ്ധമായി പ്രവര്‍ത്തിക്കുന്ന വ്യക്തികള്‍ ഷിപ്‌യാര്‍ഡില്‍ കടന്നുകൂടിയിട്ടുണ്ടെങ്കില്‍ അവരെ കണ്ടെത്തി മാതൃകാപരമായി ശിക്ഷിക്കാന്‍ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
