വാന്കൂവര്: ഫൗളുകളുടെ ആറാട്ടും രണ്ട് ചുവപ്പുകാര്ഡുകളും ഗുരുതര പരിക്കും കണ്ട മത്സരത്തില് ഖത്തറിനെ തകര്ത്തെറിഞ്ഞ് കാനഡ. തികച്ചും ഏകപക്ഷീയമായ കളിയില് മറുപടിയില്ലാത്ത ആറ് ഗോളുകള്ക്കായിരുന്നു വിജയം.
ജോനാഥന് ഡേവിഡിന്റെ(29, 45+3, 90+2) ഹാട്രിക് അവരുടെ വിജയത്തില് നിര്ണായകമായി. 16-ാം മിനിറ്റില് സൈല് ലാറിന്, 64-ാം മിനിറ്റില് നഥാന് സാലിബ എന്നിവരും ലക്ഷ്യം കണ്ടപ്പോള് 75-ാം മിനിറ്റില് ഖത്തര് താരം മുഹമ്മദ് മനായ് സെല്ഫ് ഗോളിലൂടെ ഒരു ഗോള് സംഭാവന ചെയ്തു. ലോകകപ്പ് ഫുട്ബോളില് തങ്ങളുടെ ആദ്യ വിജയമാണ് കാനഡ ഇന്നലെ സ്വന്തമാക്കിയത്. ഖത്തറിന്റെ രണ്ട് താരങ്ങളാണ് ചുവപ്പുകാര്ഡ് കണ്ട് പുറത്തുപോയത്, 33-ാം മിനിറ്റില് ഹോമാം അല് അമിന്, 53-ാം മിനിറ്റില് അസിം മാഡിബോ. കാനഡയുടെ ഇസ്മായേല് കോനെയ്ക്കാണ് കടുത്ത ടാക്ലിങ്ങില് കാലൊടിഞ്ഞ് ഗുരുതര പരിക്കേറ്റത്. കനത്ത തോല്വിയോടെ ഖത്തറിന്റെ നോക്കൗട്ട് പ്രതീക്ഷകള് അസ്തമിച്ചു.
ആദ്യ കളിയില് സ്വിറ്റ്സര്ലന്ഡിനെ സമനിലയില് തളച്ചതിന്റെ ആത്മവിശ്വാസത്തിലായിരുന്നു ഖത്തര് കളിക്കാനിറങ്ങിയത്. തുടക്കത്തിലേ മത്സരം കാനഡയുടെ വരുതിയിലായി. 79 ശതമാനവും പന്ത് കൈവശം വച്ച അവര് കളിയില് ആകെ ഉതിര്ത്തത് 32 ഷോട്ടുകള്. അതില് 10 എണ്ണം ഓണ് ടാര്ഗറ്റിലേക്കും. അതേസമയം ഖത്തറിന് ആകെ രണ്ട് ഷോട്ടുകള് മാത്രമാണ് പായിക്കാന് കഴിഞ്ഞത്. വിജയത്തോടെ 4 പോയിന്റുമായി കാനഡ ഗ്രൂപ്പ് ബിയില് ഒന്നാം സ്ഥാനത്താണ്.
തുടക്കം മുതല് മികച്ച ഫുട്ബോള് കാഴ്ചവെച്ച കാനഡ 16-ാം മിനിറ്റില് ആദ്യ ഗോളടിച്ചു. ഖത്തറിന്റെ പ്രതിരോധ നിരയുടെ നിലവാരമില്ലാത്ത ക്ലിയറന്സ് വഴി ബോക്സില് എത്തിയ പന്ത് ജോനാഥന് ഡേവിഡ് വലയിലേക്ക് തിരിച്ചുവിട്ടത് ഖത്തര് ഗോളി തട്ടിയകറ്റി. എന്നാല് പന്ത് കിട്ടിയത് ലാറിന്റെ കാലുകളില്. അദ്ദേഹം അനായാസം ഖത്തര് വല കുലുക്കി. തുടര്ന്ന് കനേഡിയന് താരങ്ങളുടെ ആക്രമണ തിരമാലയായിരുന്നു മൈതാനത്ത്. 29-ാം മിനിറ്റില് അവര് ലീഡ് ഉയര്ത്തി. ഖത്തര് ഡിഫന്ഡര് ബൗലെം ഖോഖിയില്നിന്ന് തെറിച്ചെത്തിയ പന്ത് നല്ലൊരു വോളിയിലൂടെ വലയിലെത്തിച്ചു. 33-ാം മിനിറ്റില് പന്തുമായി മുന്നേറിയ കാനഡയുടെ ടാജോ ബുക്കാനനെ പിന്നില് നിന്ന് തള്ളി വീഴ്ത്തിയ ഖത്തറിന്റെ ഹോമാം അല് അമിന് ചുവപ്പുകാര്ഡ് കണ്ട് പുറത്തുപോയി. ഇതോടെ ഖത്തര് പത്തുപേരായി ചുരുങ്ങി. പിന്നീട് ആദ്യപകുതിയുടെ പരിക്ക് സമയത്ത് മൂന്നാം ഗോളും നേടി. ഗോളിയുടെ കയ്യില്നിന്നു വഴുതിയ പന്ത് ജോനാഥന് ഡേവിഡ് വലയിലെത്തിക്കുകയായിരുന്നു.
മൂന്ന് ഗോള് മുന്നിലെത്തിയിട്ടും രണ്ടാം പകുതിയിലും കാനഡ ആക്രമണം കുറച്ചില്ല. കൂടുതല് ഗോളടിക്കുക എന്ന ലക്ഷ്യത്തോടെ അവര് തുടര്ച്ചയായി ഖത്തര് ബോക്സിലേക്ക് മുന്നേറ്റങ്ങള് മെനഞ്ഞു. കളിയുടെ 51-ാം മിനിറ്റില്, ഖത്തര് മിഡ്ഫീല്ഡര് അസിം മഡിബുവിന്റെ ടാക്ലിങ്ങില് ഇസ്മയേല് കോനെ നിലത്തു വീണു. ഈ ഫൗളിന് ഖത്തര് താരത്തിന് ചുവപ്പുകാര്ഡും ലഭിച്ചു. ഇതോടെ അവര് ഒന്പതുപേരായി ചുരുങ്ങി. 64-ാം മിനിറ്റില് കാനഡ ലീഡ് നാലാക്കി ഉയര്ത്തി. ഫ്രീകിക്കില് നിന്നായിരുന്നു ഗോള്. സലിബയെടുത്ത ഫ്രീകിക്കാണ് വലയില് കയറിയത്. 75-ാം മിനിറ്റില് സ്വന്തം വലയില് പന്തെത്തിച്ച് ഖത്തറിന്റെ മുഹമ്മദ് മനായി കാനഡയുടെ ലീഡ് അഞ്ചാക്കി. ജേക്കബ് ഷാഫെല്ബര്ഗ് അലക്ഷ്യമായി അടിച്ച പന്ത് യാതൊരു പ്രയാസവുമില്ലാതെ തടയാവുന്നതായിരുന്നു. എന്നാല്, അനാവശ്യ ധൃതി കാണിച്ച് മുഹമ്മദ് മനായ് വഴിതിരിച്ചുവിട്ടത് സ്വന്തം വലയിലേക്കായിരുന്നു. ഒടുവില് കളിയുടെ പരിക്ക് സമയത്ത് കാനഡയുടെ േജാനാഥന് ഡേവിഡ് ഗോള് പട്ടിക പൂര്ത്തിയാക്കി. ഇതോടെ ലോകപ്പില് ആദ്യമായി ഹാട്രിക്ക് നേടുന്ന കാനഡക്കാരനുമായി. ഈ ലോകകപ്പിലെ രണ്ടാം ഹാട്രിക്കാണിത്. ആദ്യ ഹാട്രിക് അര്ജന്റീനയുടെ മെസിയുടെ പേരിലാണ്.
