തിരുപ്പൂർ: നഗരത്തിൽ ജോലി തേടിയെത്തിയ ഇരുപത്തിയഞ്ചുകാരിയായ മലയാളി യുവതിയെ ലൈംഗികമായി ആക്രമിക്കാൻ ശ്രമിച്ച കേസിൽ ലോറി ഡ്രൈവർ അറസ്റ്റിൽ. യാസിർബാബു നഗർ സ്വദേശിയായ ഫൈസൽ അഹമ്മദിനെയാണ് (32) തിരുപ്പൂർ സൗത്ത് പൊലീസ് പിടികൂടിയത്. വസ്ത്രനിർമാണ സ്ഥാപനത്തിൽ ജോലി വാഗ്ദാനം ചെയ്ത് യുവതിയെ ബൈക്കിൽ കയറ്റി വിജനമായ സ്ഥലത്തെത്തിച്ച് പീഡിപ്പിക്കാൻ ശ്രമിക്കുകയായിരുന്നു.
കഴിഞ്ഞ തിങ്കളാഴ്ച രാത്രി പന്ത്രണ്ട് മണിയോടെയാണ് സംഭവം. ട്രെയിൻ മാർഗം തിരുപ്പൂരിലെത്തിയ യുവതി സെൻട്രൽ ബസ് സ്റ്റാൻഡിൽ നിൽക്കുമ്പോഴാണ് പ്രതി ഫൈസൽ അഹമ്മദ് അരികിലെത്തുന്നത്. താൻ പ്രമുഖ ടെക്സ്റ്റൈൽസ് സ്ഥാപനത്തിലെ ജീവനക്കാരനാണെന്ന് വിശ്വസിപ്പിച്ച് ജോലി വാഗ്ദാനം നൽകി യുവതിയെ ബൈക്കിൽ കൂട്ടിക്കൊണ്ടുപോകുകയായിരുന്നു.
രാത്രി ഒരു മണിയോടെ തിരുപ്പൂർ നല്ലൂരിന് സമീപമുള്ള പുതുപ്പാളയത്തെ ആളൊഴിഞ്ഞ പറമ്പിലെത്തിച്ച് പ്രതി യുവതിയെ ഉപദ്രവിക്കാൻ ശ്രമിച്ചു. എന്നാൽ പ്രതിയുടെ പിടിയിൽ നിന്ന് കുതറിയോടിയ യുവതി, സമീപത്ത് രാത്രിയും തുറന്നു പ്രവർത്തിച്ചിരുന്ന ബേക്കറിയിലെത്തി അഭയം തേടുകയായിരുന്നു.
ബേക്കറി ജീവനക്കാർ വിവരമറിയിച്ചതിനെ തുടർന്ന് നല്ലൂർ പൊലീസ് ഉടൻ തന്നെ സ്ഥലത്തെത്തി തിരച്ചിൽ നടത്തിയെങ്കിലും പ്രതി രക്ഷപ്പെട്ടിരുന്നു. തുടർന്ന് സെൻട്രൽ ബസ് സ്റ്റാൻഡ്, പുതുപ്പാളയം പരിസരങ്ങളിലെ സിസിടിവി (CCTV) ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രത്യേക പൊലീസ് സംഘം പ്രതിയെ വലയിലാക്കിയത്.
വിവിധ സംസ്ഥാനങ്ങളിലേക്ക് സർവീസ് നടത്തുന്ന ലോറിയിലെ ഡ്രൈവറാണ് ഫൈസൽ. ദീർഘദൂര സർവീസിന് ശേഷം മടങ്ങിയെത്തി മദ്യപിച്ച ശേഷമാണ് ഇയാൾ ബസ് സ്റ്റാൻഡിലെത്തിയതെന്നും ഒറ്റപ്പെട്ടുപോയ യുവതിയെ കബളിപ്പിച്ച് ബൈക്കിൽ കയറ്റിക്കൊണ്ടുപോകുകയായിരുന്നെന്നും പൊലീസ് വ്യക്തമാക്കി. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
