പകര്‍ച്ചവ്യാധി നിയന്ത്രണത്തില്‍ സര്‍ക്കാര്‍ പരാജയം, ആരോഗ്യ മേഖല ഗുരുതര പ്രതിസന്ധിയില്‍: ബി.ബി. ഗോപകുമാര്‍ എം.എല്‍.എ

തിരുവനന്തപുരം: സംസ്ഥാനത്തെ ആരോഗ്യ മേഖല അതീവ ഗുരുതരമായ പ്രതിസന്ധിയിലൂടെയാണ് കടന്നുപോകുന്നതെന്നും പകര്‍ച്ചവ്യാധി പ്രതിരോധത്തിലും പൊതുജനാരോഗ്യ സംരക്ഷണത്തിലും സംസ്ഥാന സര്‍ക്കാര്‍ പൂര്‍ണമായും പരാജയപ്പെട്ടിരിക്കുകയാണെന്നും ബിജെപി പാര്‍ലിമെന്ററി പാര്‍ട്ടി നേതാവ് ബി.ബി. ഗോപകുമാര്‍ എം.എല്‍.എ.

2024-ലെ കണക്കുകള്‍ പ്രകാരം എലിപ്പനി ബാധിച്ച് 360-ലധികം പേര്‍ മരണപ്പെട്ടത് സംസ്ഥാനത്തിന്റെ ആരോഗ്യ സംവിധാനത്തിന്റെ ദയനീയാവസ്ഥയാണ് വ്യക്തമാക്കുന്നത്. ഡെങ്കിപ്പനി ബാധിച്ച് പ്രതിവര്‍ഷം 40 മുതല്‍ 80 വരെ മരണങ്ങള്‍ രേഖപ്പെടുത്തപ്പെടുത്തുന്ന സാഹചര്യത്തിലും ഫലപ്രദമായ പ്രതിരോധ നടപടികള്‍ സ്വീകരിക്കാന്‍ സര്‍ക്കാര്‍ തയാറായിട്ടില്ല. മഞ്ഞപ്പിത്തം ബാധിച്ച് 2024-ല്‍ മാത്രം 12,378 കേസുകള്‍ റിപ്പോര്‍ട്ട് ചെയ്യപ്പെടുകയും 69 പേര്‍ മരണപ്പെടുകയും ചെയ്തത് ആരോഗ്യ വകുപ്പിന്റെ വീഴ്ചയുടെ ഗൗരവം വ്യക്തമാക്കുന്നതാണെന്നും അദ്ദേഹം പറഞ്ഞു.

മസ്തിഷ്‌കജ്വരവും ഷിഗെല്ലയും ഉള്‍പ്പെടെയുള്ള രോഗങ്ങള്‍ സംസ്ഥാനത്ത് വ്യാപകമായി റിപ്പോര്‍ട്ട് ചെയ്യപ്പെടുകയാണ്. ഷിഗെല്ല സ്ഥിരീകരിച്ച 146 കേസുകളില്‍ ആറു മരണങ്ങള്‍ സംഭവിച്ചിരിക്കെ ആരോഗ്യ വകുപ്പ് സ്വീകരിച്ച പ്രതിരോധ നടപടികള്‍ എന്താണെന്ന് സര്‍ക്കാര്‍ വ്യക്തമാക്കണമെന്നും ബി.ബി. ഗോപകുമാര്‍ ആവശ്യപ്പെട്ടു.

ശുചിത്വമില്ലായ്‌മയും രോഗപ്രതിരോധ പ്രവര്‍ത്തനങ്ങളിലെ അനാസ്ഥയുമാണ് രോഗവ്യാപനത്തിന്റെ പ്രധാന കാരണങ്ങളെന്ന് ആരോഗ്യ വിദഗ്ധര്‍ ചൂണ്ടിക്കാണിക്കുന്ന സാഹചര്യത്തില്‍, ആരോഗ്യ രംഗത്തും വിദ്യാഭ്യാസ രംഗത്തും രാജ്യത്തിന് മാതൃകയായിരുന്ന കേരളം ഇന്ന് മാരക രോഗങ്ങള്‍ ഏറ്റവും കൂടുതല്‍ റിപ്പോര്‍ട്ട് ചെയ്യപ്പെടുന്ന സംസ്ഥാനങ്ങളിലൊന്നായി മാറിയിരിക്കുകയാണെന്നും അദ്ദേഹം പറഞ്ഞു.

സര്‍ക്കാര്‍ ആശുപത്രികളുടെ കണക്കുകള്‍ പ്രകാരം മഴക്കാലത്ത് പ്രതിദിനം 13,000-ത്തിലധികം പേര്‍ വൈറല്‍ പനി ബാധിച്ച് ചികിത്സ തേടുന്നുണ്ട്. സ്വകാര്യ ആശുപത്രികളിലെ കണക്കുകള്‍ കൂടി പരിഗണിച്ചാല്‍ സ്ഥിതി കൂടുതല്‍ ഗുരുതരമാണെന്നും അദ്ദേഹം ചൂണ്ടിക്കാട്ടി.

ആരോഗ്യ വകുപ്പ് ഡയറക്ടറെ മാറ്റിയ സംഭവവും ആരോഗ്യ വകുപ്പ് മന്ത്രിയോ സെക്രട്ടറിയോ അറിയാതെ റിപ്പോര്‍ട്ടുകള്‍ പുറത്തുവരുന്നതും ആരോഗ്യ മേഖലയിലെ ഏകോപനക്കുറവും കൂട്ടുത്തരവാദിത്തമില്ലായ്‌മയും വെളിപ്പെടുത്തുന്നതാണ്. ഉദ്യോഗസ്ഥരുടെ നിയമനം, സ്ഥലംമാറ്റം, മന്ത്രിമാരുടെ പേഴ്‌സണല്‍ സ്റ്റാഫ് നിയമനം തുടങ്ങിയ വിവാദങ്ങളില്‍ മുഴുകിയ സര്‍ക്കാര്‍ ജനങ്ങളുടെ ആരോഗ്യ സുരക്ഷ ഉറപ്പാക്കുന്നതില്‍ ശ്രദ്ധ ചെലുത്തുന്നില്ലെന്നും അദ്ദേഹം വിമര്‍ശിച്ചു.

പകര്‍ച്ചവ്യാധി പ്രതിരോധ പ്രവര്‍ത്തനങ്ങളില്‍ മുന്‍കാലത്തും ഇപ്പോഴും ആവശ്യമായ മുന്നൊരുക്കങ്ങള്‍ നടത്തുന്നതില്‍ സംസ്ഥാന സര്‍ക്കാര്‍ പരാജയപ്പെട്ടതിന്റെ പ്രത്യാഘാതമാണ് ഇന്ന് കേരളം അനുഭവിക്കുന്നതെന്നും, ജനങ്ങളുടെ ജീവനും ആരോഗ്യവും സംരക്ഷിക്കാന്‍ അടിയന്തര ഇടപെടലുകളും ശക്തമായ പ്രതിരോധ നടപടികളും സര്‍ക്കാര്‍ സ്വീകരിക്കണമെന്നും ബി.ബി. ഗോപകുമാര്‍ ആവശ്യപ്പെട്ടു.