കൊച്ചി : കോതമംഗലത്ത് നെല്ലിമറ്റം മാര്‍ ബസേലിയസ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി ആന്‍ഡ് സയന്‍സില്‍ മോഷണം.ഡ്രോണും ലാപ്‌ടോപ്പും നഷ്ടമായി.
കോളേജിലെ അഡ്മിനിസ്‌ട്രേറ്റീവ് ഓഫീസിലും പ്രിന്‍സിപ്പാളിന്റെ മുറിയിലുമാണ് മോഷ്ടാക്കള്‍ കയറിയത്.അഡ്മിഷന്‍ സെല്ലില്‍ നിന്ന് ഒരു പുതിയ ഡ്രോണും ഒരു ലാപ്‌ടോപ്പും മോഷണം പോയി.ലോക്കര്‍ പുറത്തേക്ക് കൊണ്ടുപോയി പൊളിക്കാന്‍ ശ്രമിച്ചെങ്കിലും വിജയിച്ചില്ല.
പുതിയ അഡ്മിഷന്‍ നടപടികള്‍ നടക്കുന്നതിനാല്‍ കോളേജില്‍ പണം സൂക്ഷിച്ചിട്ടുണ്ടെന്ന വിവരം അറിയുന്നവരാണ് സംഭവത്തിന് പിന്നിലെന്നാണ് പ്രാഥമിക നിഗമനം.കോളേജിന്റെ പ്രവേശന കവാടത്തിലും ഹോസ്റ്റലിലുമായി രണ്ട് സുരക്ഷാ ജീവനക്കാര്‍ ഉണ്ടായിരുന്നെങ്കിലും ഇവരെ വെട്ടിച്ചാണ് മോഷ്ടാക്കള്‍ അകത്തു കടന്നത്. വെളുപ്പിന് വീട്ടില്‍ നിന്ന് ഹോസ്റ്റലിലെത്തിയ ഒരു വിദ്യാര്‍ത്ഥിയെ കണ്ടതോടെ മോഷ്ടാക്കള്‍ മതില്‍ ചാടി രക്ഷപ്പെടുകയായിരുന്നു. കോളേജിലെ സിസിടിവി ദൃശ്യങ്ങളില്‍ നിന്ന് നാല് പേരുടെ ദൃശ്യങ്ങള്‍ ലഭിച്ചിട്ടുണ്ട്. ഇവ കേന്ദ്രീകരിച്ച് ഊന്നുകല്‍ പൊലീസ് അന്വേഷണം തുടങ്ങി.
