ആഗോളതലത്തിലെ നിർണായകമായ നിരവധി വിഷയങ്ങൾ ചർച്ച ചെയ്യുന്നതിനായി ഈ ആഴ്ച ഫ്രാൻസിലെ എവിയാൻ ലെ ബെയ്ൻസിൽ ലോക നേതാക്കൾ ജി7 ഉച്ചകോടിക്കായി ഒത്തുചേർന്നു. ഇതിനിടെ, ഉച്ചകോടിയിലെ ഔദ്യോഗിക മീറ്റിംഗുകളിൽ നിന്നും നയപരമായ ചർച്ചകളിൽ നിന്നും മാറി നടന്ന ഒരു സുപ്രധാന നിമിഷമാണ് ഇപ്പോൾ സോഷ്യൽ മീഡിയയിൽ ഏറ്റവും വൈറലായിരിക്കുന്നത്.
ഇറ്റാലിയൻ പ്രധാനമന്ത്രി ജോർജിയ മെലോണിയും ഇന്ത്യൻ പ്രധാനമന്ത്രി നരേന്ദ്ര മോദിയും തമ്മിൽ വീണ്ടും ഉണ്ടായ രസകരമായ ഒരു സംഭാഷണമാണ് ഇപ്പോൾ എല്ലാവരുടെയും ശ്രദ്ധ പിടിച്ചുപറ്റിയിരിക്കുന്നത്.ഉച്ചകോടിയിലെ പരമ്പരാഗത ഗ്രൂപ്പ് ഫോട്ടോയ്ക്കായി നേതാക്കൾ ഒത്തുകൂടുന്നതിന് തൊട്ടുമുമ്പ്, മെലോനിയും പ്രധാനമന്ത്രി മോദിയും പരസ്പരം ഊഷ്മളമായി അഭിവാദ്യം ചെയ്യുന്നത് കാണാമായിരുന്നു.
ഈ കൂടിക്കാഴ്ച വളരെ ഹ്രസ്വമായിരുന്നുവെങ്കിലും, പതിവ് പോലെയുള്ള ആത്മബന്ധവും ആകർഷണീയതയും അതിൽ പ്രകടമായിരുന്നു.”നിങ്ങളെ വീണ്ടും കണ്ടുമുട്ടിയതിൽ സന്തോഷം!” എന്ന് മെലോണി പ്രധാനമന്ത്രി മോദിയോട് പറയുന്നത് കേൾക്കാമായിരുന്നു. ഒപ്പം, ”ഇൻസ്റ്റാഗ്രാമിലെ ഏറ്റവും പ്രശസ്തമായ ജോഡി നമ്മളാണ്.” എന്നും വളരെ തമാശ നിറഞ്ഞ രൂപത്തിൽ മെലോനി പറഞ്ഞു. ഇതും ഇപ്പോൾ സോഷ്യൽ മീഡിയയിൽ വൈറലാണ്. കഴിഞ്ഞ 2023-ൽ ദുബായിൽ നടന്ന കോപ്28 (COP28) ഉച്ചകോടിക്കിടെ മെലോനി പോസ്റ്റ് ചെയ്ത ഒരു സെൽഫിയാണ് പിന്നീട് ആഗോള ഇന്റർനെറ്റ് ട്രെൻഡായി മാറിയത്. പ്രധാനമന്ത്രി മോദിയോടൊപ്പമുള്ള ഒരു ചിത്രം പങ്കുവെച്ചുകൊണ്ട് ഇറ്റാലിയൻ നേതാവ് അതിന് നൽകിയ അടിക്കുറിപ്പ് ഇങ്ങനെയായിരുന്നു: “കോപ്28-ലെ നല്ല സുഹൃത്തുക്കൾ #Melodi.”
ഈ ഹാഷ്ടാഗ് ഉടനടി തന്നെ സോഷ്യൽ മീഡിയയിൽ തരംഗമായി മാറി. വിവിധ സോഷ്യൽ മീഡിയ പ്ലാറ്റ്ഫോമുകളിലെ ഉപയോക്താക്കൾ ഇതിനെ മീമുകളായും, ഫാൻ എഡിറ്റുകളായും, രസകരമായ പോസ്റ്റുകളായും മാറ്റിമറിച്ചു. അന്നുമുതൽ, പ്രധാനമന്ത്രി മോദിയും മെലോനിയും തമ്മിലുള്ള മിക്കവാറും എല്ലാ കൂടിക്കാഴ്ചകളും ഇന്റർനെറ്റിൽ വലിയ രീതിയിൽ വൈറലാകാറുണ്ടായിരുന്നു.
