കന്യാകുളങ്ങര: പ്രണയാഭ്യർത്ഥന നിരസിച്ചതിന് പ്ലസ് ടു വിദ്യാർത്ഥിനിയെ കുത്തിപ്പരിക്കേൽപ്പിച്ച പ്രതി സഹദ് (21) പോക്സോ ഉൾപ്പെടെ നിരവധി ക്രിമിനൽ കേസുകളിൽ പ്രതിയെന്ന് പോലീസ്. പ്രതിയുടെ ക്രിമിനൽ പശ്ചാത്തലം മുൻനിർത്തി പോലീസ് നടത്തിയ കൃത്യമായ നീക്കമാണ് മണിക്കൂറുകൾക്കകം ഇയാളെ വലയിലാക്കാൻ സഹായിച്ചത്.
നെടുമങ്ങാട് സ്വദേശിയായ സഹദ് മുൻപ് പെൺകുട്ടിയുടെ വീടിന് സമീപം താമസിച്ചിരുന്നു. ഇവിടെ വെച്ചാണ് പെൺകുട്ടിയോട് പ്രണയാഭ്യർത്ഥന നടത്തിയത്. ഇത് നിരസിച്ചതോടെ പെൺകുട്ടിയെ നിരന്തരം ഭീഷണിപ്പെടുത്തിയിരുന്ന പ്രതി വ്യക്തമായ ആസൂത്രണത്തോടെയാണ് കൊലപാതക ശ്രമം നടത്തിയത്.
ചൊവ്വാഴ്ച ഉച്ചയ്ക്ക് ഒരു മണിക്കായിരുന്നു സംഭവം. കന്യാകുളങ്ങര സ്വദേശിയും നെടുവേലി ഹയർസെക്കൻഡറി സ്കൂളിലെ രണ്ടാം വർഷ പ്ലസ് ടു വിദ്യാർഥിനിയുമായ പതിനാറുകാരിക്കാണ് കുത്തേറ്റത്. പെണ്കുട്ടിയുടെ വീടിന് സമീപത്ത് കാത്തുനിന്ന സഹദ് കുട്ടിയെ കുത്തി വീഴ്ത്തിയ ശേഷം കാറില് രക്ഷപെടുകയായിരുന്നു. വീട്ടില് നിന്നും ടെക്സ്റ്റ് ബുക്ക് വാങ്ങാനായി പുറത്തേക്കിറങ്ങിയ കുട്ടിയെ വീടിന് സമീപം ആളൊഴിഞ്ഞ പ്രദേശത്ത് കാത്തിരുന്നാണ് യുവാവ് കുത്തിയത്.
മുഖത്തും മുതുകിലുമാണ് കുത്തിയത്. മുതുകിലെ മുറിവ് ആഴത്തിലുളളതാണ്. കുട്ടി തിരുവനന്തപുരം മെഡിക്കൽ കോളേജിൽ എത്തിക്കുകയായിരിന്നു. കുട്ടിയുടെ നില തൃപ്തികരമെന്നാണ് വിവരം.
കൃത്യത്തിന് ശേഷം കാറിൽ രക്ഷപെട്ട പ്രതി കണിയാപുരത്ത് കാർ ഉപേക്ഷിച്ച പ്രതി ബന്ധുവിന്റെ കൂടെ രക്ഷപ്പെടാൻ ശ്രമിക്കുന്നതിനിടയിലാണ് പോലീസ് ഇയാളെ പിടികൂടിയത്. രക്ഷപെടാനുള്ള ശ്രമത്തിനിടെ അമിതവേഗതയിൽ കാർ ഓടിച്ച പ്രതി, എതിർവശത്തിന്ന് വന്ന വാഹനത്തെ ഇടിച്ചുതെറിപ്പിച്ചാണ് രക്ഷപ്പെട്ടത്. എന്നാൽ പിന്നീട് ഇയാളെ പോലീസ് പിടികൂടുകയും ചെയ്തു.
