ആലപ്പുഴ: കടുത്തുരുത്തി എംഎല്‍എയും മന്ത്രിയുമായ മോന്‍സ് ജോസഫ് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനെ കണിച്ചുകുളങ്ങരയിലെ വസതിയിലെത്തി കണ്ടു. മന്ത്രിയായി ചുമതലയേറ്റ ശേഷം വെള്ളാപ്പള്ളിയെ കാണാന്‍ ആദ്യമായാണ് മോന്‍സ് എത്തിയത്. ഫേസ്ബുക്കിലൂടെ വെള്ളാപ്പള്ളി നടേശനാണ് മന്ത്രി വീട്ടിലെത്തിയ കാര്യം അറിയിച്ചത്.
പൊതുപ്രവര്‍ത്തന രംഗത്ത് പരസ്പര ബഹുമാനവും സൗഹൃദവും നിലനിര്‍ത്തി മുന്നോട്ട് പോകുന്നതിന്റെ നല്ലൊരു മാതൃകയാണ് ഈ സന്ദര്‍ശനമെന്ന് വെള്ളാപ്പള്ളി നടേശന്‍ കുറിച്ചു. മത്സരരംഗത്തേക്ക് ഇറങ്ങിയ സമയത്ത് മോന്‍സ് ജോസഫ് നേരിട്ടെത്തി അനുഗ്രഹം തേടിയിരുന്നു. തെരഞ്ഞെടുപ്പിലെ വന്‍ വിജയത്തിന് ശേഷം വീണ്ടുമെത്തിയതില്‍ ഏറെ സന്തോഷമുണ്ടെന്നും അദ്ദേഹം ഫേസ്ബുക്ക് കുറിപ്പില്‍ പറഞ്ഞു.
എസ്എന്‍ഡിപി യോഗത്തിന്റെ നിലപാടുകളെയും പ്രവര്‍ത്തനങ്ങളെയും എക്കാലവും മാനിക്കുന്ന വ്യക്തിയാണ് മോന്‍സ് ജോസഫ്. യോഗത്തോടും സമുദായത്തോടും എന്നും സഹകരണ മനോഭാവം പുലര്‍ത്തുന്ന അദ്ദേഹത്തിന്റെ സമീപനത്തെ അഭിനന്ദിക്കുന്നുവെന്നും വെള്ളാപ്പള്ളി നടേശന്‍ പറഞ്ഞു. മോന്‍സ് ജോസഫിന്റെ പൊതുപ്രവര്‍ത്തനങ്ങള്‍ക്കും മന്ത്രി എന്ന നിലയിലുള്ള പുതിയ ഉത്തരവാദിത്വങ്ങള്‍ക്കും എല്ലാവിധ വിജയങ്ങളും ആശംസിച്ചു.
നേരത്തേ മന്ത്രി ബിന്ദുകൃഷ്ണ വെളളാപ്പളളിയെ വീട്ടിലെത്തി കണ്ടത് കോണ്‍ഗ്രസില്‍ തന്നെ വിവാദമായിരുന്നു.
