തൃശൂര്‍:ഷിഗെല്ല ബാധിച്ച് വീണ്ടും മരണം. മാപ്രാണം സ്വദേശി 43കാരനാണ് മരിച്ചത്.
പോസ്റ്റുമോര്‍ട്ടം റിപ്പോര്‍ട്ടിലാണ് ഷിഗെല്ല ബാധിച്ചെന്ന വിവരമുളളത്.വയറുവേദനയെ തുടര്‍ന്ന് കൊടകരയിലെ ആശുപത്രിയില്‍ ചികിത്സയിലായിരുന്നു.
13-ാം തീയതി ആശുപത്രിയില്‍ പ്രവേശിപ്പിച്ച യുവാവ് ഇന്ന് വൈകുന്നേരം അഞ്ച് മണിയോടെയാണ് മരിച്ചത്. രോഗത്തിന്റെ ഉറവിടം കണ്ടെത്താന്‍ സാമ്പിളുകള്‍ ശേഖരിച്ച് പരിശോധിക്കും.
കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയിലായിരുന്ന ഏഴ് വയസുകാരനും ഷിഗെല്ല ബാധയെ തുടര്‍ന്ന് ഇന്ന് മരിച്ചിരുന്നു. മെഡിക്കല്‍ കോളേജ് ആശുപത്രിയിലെ മാതൃശിശു കേന്ദ്രത്തില്‍ ചികിത്സയിലായിരുന്ന മലപ്പുറം കോഡൂര്‍ സ്വദേശി ആര്‍ജവ് ആണ് തിങ്കളാഴ്ച പുലര്‍ച്ചെ മരിച്ചത്. തീവ്ര പരിചരണ വിഭാഗത്തില്‍ ചികിത്സയിലായിരിക്കെയാണ് മരണം.
ഇതോടെ ഈ വര്‍ഷം സംസ്ഥാനത്ത് ഷിഗെല്ല സ്ഥിരീകരിച്ച് മരിച്ചവരുടെ എണ്ണം അഞ്ചായി. കോഴിക്കോട് 3 പേര്‍ക്കും കണ്ണൂരില്‍ രണ്ടുപേര്‍ക്കും ഷിഗെല്ല സ്ഥിരീകരിച്ചു. തദ്ദേശ സ്ഥാപനങ്ങള്‍ കേന്ദ്രീകരിച്ച് ക്ലോറിനേഷന്‍ നടപടികള്‍ ഊര്‍ജിതമാക്കിയെന്ന് ആരോഗ്യ വകുപ്പ് വ്യക്തമാക്കി.
