നടി സഞ്ചിത ഉഗാലെയുടെ ആത്മഹത്യയ്‌ക്കു പിന്നില്‍ തൊഴില്‍മേഖലയിലെ സമ്മര്‍ദ്ദമെന്ന് സഹോദരന്‍, പ്രധാനമന്ത്രിക്കടക്കം പരാതി

മുംബൈ: ഹിന്ദി ടെലിവിഷനിലും സിനിമയിലും ശ്രദ്‌ധേയയായ നടി സഞ്ചിത ഉഗാലെയെ (30)തൂങ്ങി മരിച്ച നിലയില്‍ കണ്ടെത്തി. കുകും ഭാഗ്യ, സാജന്‍ ഗര്‍, ദില്‍വാലെ ദുല്‍ഹ ലേ ജായേംഗി തുടങ്ങിയ പരമ്പരകളിലൂടെയാണ് കൂടുതല്‍ ശ്രദ്ധിക്കപ്പെട്ടത്. കുകും ഭാഗ്യയിലെ ദിയ ടണ്ടന്‍ സഞ്ചിതയ്‌ക്ക് ഏറെ പ്രശസ്തി നേടിക്കൊടുത്തു.
നളസൊപ്പാറയിലെ വസതിയില്‍ സാരിയില്‍ തൂങ്ങിമരിച്ച നിലയിലായിരുന്നു സഞ്ചിതയെ കണ്ടെത്തിയത്. സംഭവസ്ഥലത്ത് സംശയാസ്പദമായ എന്തെങ്കിലുമോ ആത്മഹത്യാക്കുറിപ്പോ കണ്ടെത്തിയിട്ടില്ലെന്ന് പോലീസ് അറിയിച്ചു.
ബോളിവുഡ് ഗാനം ഡഫ്ലി വാലെ ഡഫ്ലി ബജായ്‌ക്ക് ചുവടുവെക്കുന്ന തന്റെ വിഡിയോ പങ്കുവച്ചതിനു പിന്നാലെയാണ് സഞ്ചിതയെ മരിച്ച നിലയില്‍ കണ്ടെത്തിയത്.
തന്റെ സഹോദരിയുടെ ആത്മഹത്യയ്‌ക്ക് 2020 ല്‍ ബോളിവുഡ് നടന്‍ സുശാന്ത് സിംഗ് രജ്പുത്തിന്റെ അകാല മരണവുമായി ബന്ധമുണ്ടെന്ന് സഞ്ചിതയുടെ സഹോദരന്‍ ആകാശ് സതീഷ് ഉഗാലെ ആരോപിച്ചു.
തന്റെ സഹോദരിയും സുശാന്തും സിനിമയില്‍ നിന്ന് വലിയ സമ്മര്‍ദ്ദം നേരിട്ടിരുന്നുവെന്നും അതാണ് അവരെ ഒരു കടുത്ത നടപടിയിലേക്ക് നയിച്ചതെന്നും അദ്ദേഹം വിശദീകരിച്ചു. 6 വര്‍ഷത്തെ വ്യത്യാസത്തില്‍ ഒരേ തീയതിയില്‍ അവര്‍ മരിച്ചത്.
സഞ്ചിത ഉഗാലെയുടെ സോഷ്യല്‍ മീഡിയ അക്കൗണ്ടിലെ അവസാന പോസ്റ്റ് സുശാന്ത് സിംഗ് രജ്പുത്തിനെക്കുറിച്ചാണെന്ന് അദ്ദേഹം ചൂണ്ടിക്കാട്ടി.
ഞായറാഴ്ച സുശാന്തിന്റെ ചരമവാര്‍ഷിക ദിനത്തില്‍ അദ്ദേഹത്തെ അനുസ്മരിച്ചുകൊണ്ട് ‘ഇത് വീണ്ടും ജൂണ്‍ 14’ എന്ന് എഴുതിയ ഒരു ഇന്‍സ്റ്റാഗ്രാം റീല്‍ സഞ്ചിത പോസ്റ്റ് ചെയ്തിരുന്നു.
സഹോദരിയുടെ മരണം അന്വേഷിക്കണമെന്നാവശ്യപ്പെട്ട് പ്രധാനമന്ത്രി, പ്രസിഡന്റ് , മഹാരാഷ്‌ട്ര മുഖ്യമന്ത്രി എന്നിവര്‍ക്ക് ആകാശ് സതീഷ് പരാതി നല്‍കിയിട്ടുണ്ട്.