കോട്ടയം: കാസര്കോട് പള്ളിക്കര കല്ലിങ്കാലില് കടലില് കുളിക്കാനിറങ്ങിയതിനെത്തുടര്ന്ന് കാണാതായ ചങ്ങനാശ്ശേരി സ്വദേശികളായ യുവാക്കളുടെ മൃതദേഹങ്ങള് കണ്ടെത്തി. ചീരംചിറ വാഴപ്പള്ളിയില് ബാലുവിന്റെ മകന് അങ്കിത് (20), ചിങ്ങവനം പാത്താമുട്ടത്തെ എബ്രഹാമിന്റെ മകന് അപ്പു ടി എബ്രഹാം(20) എന്നിവരുടെ മൃതദേഹങ്ങളാണ് കണ്ടെത്തിയത്. ഞായറാഴ്ച വൈകിട്ടോടെ മറ്റു രണ്ടു സുഹൃത്തുക്കള്ക്കൊപ്പം ബേക്കല് പള്ളിക്കര റെഡ് മൂണ് ബീച്ചിന് സമീപം കടലില് കുളിക്കാനിറങ്ങിയ ഇരുവരെയും തിരയില് പെട്ട് കാണാതാവുകയായിരുന്നു.
കൂടെയുള്ളവര് കോസ്റ്റ് ഗാര്ഡിനെ വിവരം അറിയിച്ചു. കോസ്റ്റല് പൊലീസും ഫിഷറീസ് വകുപ്പ് അധികൃതരും നാട്ടുകാരും നടത്തിയ തെരച്ചിലാണ് മൃതദേഹങ്ങള് കണ്ടെത്തിയത്.
ഉച്ചയോടെ ചിത്താരി പുഴയില് നിന്നാണ് അപ്പുടി എബ്രഹാമിന്റെ മൃതദേഹം കണ്ടെത്തിയത്. പിന്നാലെ മുട്ടുംന്തല അഴിമുഖത്തിന് സമീപം അങ്കിതിന്റെ മൃതദേഹം ഒഴുകി നീങ്ങുന്നതു കണ്ട് മല്സ്യതൊഴിലാളികള് കോസ്റ്റ് ഗാര്ഡിനെ അറിയിക്കുകയായിരുന്നു. മൃതദേഹങ്ങള് പോസ്റ്റു മോര്ട്ടത്തിനു ശേഷം നാട്ടിലേക്കു കൊണ്ടുവരും.
















