തിരുവനന്തപുരം : കേരളത്തിലെ സ്ത്രീകള്ക്ക് കെഎസ്ആര്ടിസി ബസുകളില് സൗജന്യ യാത്ര ഉറപ്പാക്കുമെന്ന തിരഞ്ഞെടുപ്പ് വാഗ്ദാനം നല്കി അധികാരത്തിലെത്തിയ യുഡിഎഫ് സര്ക്കാര് വാഗ്ദാനലംഘനം നടത്തുകയും സ്ത്രീകളെ സംഘടിതമായി വഞ്ചിക്കുകയും ചെയ്യുന്നതിനെതിരെ ബിജെപിയുടെ നേതൃത്വത്തില് തിങ്കളാഴ്ച സംസ്ഥാന വ്യാപക പ്രതിഷേധ മാര്ച്ചുകള് സംഘടിപ്പിക്കും.
സ്ത്രീകള്ക്ക് മുഴുവന് കെഎസ്ആര്ടിസി ബസുകളിലും സൗജന്യ യാത്ര അനുവദിക്കുമെന്നായിരുന്നു തിരഞ്ഞെടുപ്പ് കാലത്ത് നല്കിയ പ്രധാന വാഗ്ദാനങ്ങളിലൊന്ന്. എന്നാല് അധികാരത്തിലെത്തിയ ശേഷം സര്ക്കാര് വാഗ്ദാനം പാലിക്കുന്നതില് പരാജയപ്പെട്ടുവെന്ന് മാത്രമല്ല, ഓര്ഡിനറി വിഭാഗത്തില് സര്വീസ് നടത്തിയിരുന്ന ബസുകളുടെ സ്വഭാവം തന്നെ മാറ്റി സ്ത്രീകള്ക്കുള്ള സൗജന്യ യാത്രാ ആനുകൂല്യം നിഷേധിക്കുന്ന സമീപനമാണ് സ്വീകരിച്ചിരിക്കുന്നത്.
നിലവില് കെഎസ്ആര്ടിസിക്ക് കീഴിലുള്ള 3000-ലധികം ഓര്ഡിനറി ബസുകളില് വലിയൊരു വിഭാഗം വിവിധ പേരുകളിലേക്കും വിഭാഗങ്ങളിലേക്കും മാറ്റിയതിലൂടെ സ്ത്രീകള്ക്ക് ലഭിക്കേണ്ട സൗജന്യ യാത്രാ സൗകര്യം ഇല്ലാതാക്കുകയാണ് സര്ക്കാര് ചെയ്യുന്നത്. തിരുവനന്തപുരം ഉള്പ്പെടെയുള്ള നഗരങ്ങളില് ഇന്നലെവരെ ഓര്ഡിനറി വിഭാഗത്തില് സര്വീസ് നടത്തിയിരുന്ന നിരവധി ബസുകള്ക്ക് ‘സിറ്റി ഫാസ്റ്റ്’ ഉള്പ്പെടെയുള്ള പുതിയ പേരുകള് നല്കി സ്റ്റിക്കര് ഒട്ടിക്കുകയും, അതുവഴി സ്ത്രീകള്ക്കുള്ള സൗജന്യ യാത്ര നിഷേധിക്കുകയും ചെയ്യുന്ന സാഹചര്യമാണുള്ളത്.
സ്ത്രീകള്ക്ക് നല്കിയ വാഗ്ദാനം നടപ്പാക്കുന്നതിന് പകരം കണക്കുകളില് മാത്രം ആനുകൂല്യം കാണിച്ചുകൊണ്ട് യാഥാര്ത്ഥ്യത്തില് അവരെ വഞ്ചിക്കുന്ന സര്ക്കാരിന്റെ ജനവിരുദ്ധ നടപടികള്ക്കെതിരെയാണ് ബിജെപിയുടെ പ്രതിഷേധം.
ഇതിന്റെ ഭാഗമായി തിരുവനന്തപുരം തമ്പാനൂര് കെഎസ്ആര്ടിസി ബസ് ഡിപ്പോ ഉള്പ്പെടെ സംസ്ഥാനത്തെ എല്ലാ ജില്ലാ കേന്ദ്രങ്ങളിലുമുള്ള കെഎസ്ആര്ടിസി ഓഫീസുകളിലേക്കും ഡിപ്പോകളിലേക്കും പ്രതിഷേധ മാര്ച്ചുകള് സംഘടിപ്പിക്കും. സംസ്ഥാന വ്യാപകമായി നടക്കുന്ന സമരപരിപാടികളില് ബിജെപിയുടെ മുതിര്ന്ന സംസ്ഥാന-ജില്ലാ നേതാക്കള് നേതൃത്വം നല്കും.
സ്ത്രീകള്ക്ക് കെഎസ്ആര്ടിസിയുടെ മുഴുവന് സാധാരണ സര്വീസുകളിലും യഥാര്ത്ഥ അര്ത്ഥത്തില് സൗജന്യ യാത്ര ഉറപ്പാക്കുകയും തിരഞ്ഞെടുപ്പ് വാഗ്ദാനം പൂര്ണമായി നടപ്പാക്കുകയും ചെയ്യുന്നതുവരെ സമരപരിപാടികളുമായി മുന്നോട്ടുപോകാനാണ് ബിജെപിയുടെ തീരുമാനം
