മസ്കറ്റ്: ഒമാൻ തീരത്ത് മുങ്ങിത്താഴാൻ തുടങ്ങിയ കപ്പലിൽനിന്ന് 14 ഭാരതീയരെ യുഎസ് നാവികസേന, വാണിജ്യക്കപ്പൽ സഹായത്താൽ രക്ഷപ്പെടുത്തി. ഞായറാഴ്ച രാവിലെയാണ് സംഭവം. എൻജിൻ തകരാറാണ് കാരണമെന്ന് ഒമാനിലെ ഭാരത എംബസി എക്സ് പ്ലാറ്റ്ഫോമിലൂടെ അറിയിച്ചു. അപകടത്തിൽപ്പെട്ട എംഎസ്വി വിരാട് 1 എന്ന കപ്പലിലെ ജീവനക്കാരെ സുരക്ഷിതമായി മാറ്റിയെന്നും കുറിപ്പിൽ പറയുന്നു.
ശനിയാഴ്ച റാസ് അൽ ഹദ്ദിന് കിഴക്ക് 80 നോട്ടിക്കൽ മൈൽ അകലെയാണ് അപകടം സംഭവിച്ചത്. അമേരിക്കൻ നാവികസേനയാണ് നിർണായക വിവരം ഭാരത നാവിക സേനക്ക് കൈമാറിയത്.
അമേരിക്കൻ നാവികസേനയുടെ പി 8 വിമാനവും മർച്ചന്റ് വെസൽ ജബൽ അലി 9 എന്ന കപ്പലും രക്ഷാപ്രവർത്തനത്തിനായിട്ടുണ്ട്. അമേരിക്കൻ നാവിക സേന നൽകിയ വിവരത്തിന്റെ അടിസ്ഥാനത്തിൽ ഭാരത നാവികസേനയും രക്ഷാപ്രവർത്തനങ്ങൾ ഏകോപിപ്പിക്കുന്നുണ്ട്. അപകടത്തിന്റെ കാരണം എന്താണെന്ന് വ്യക്തമായിട്ടില്ല.
ലൈഫ് റാഫ്റ്റിൽനിന്ന് 14 ഭാരതീയരെയും ഈ കപ്പലിലേക്കു കയറ്റി. കപ്പലിൽ ഉണ്ടായിരുന്നവർ എല്ലാവരും ഭാരതീയരാണെന്ന് ഉദ്യോഗസ്ഥർ സ്ഥിരീകരിച്ചിട്ടുണ്ട്.
