കേരളത്തിലെ സര്‍ക്കാര്‍/സ്വകാര്യ സ്വാശ്രയ കോളേജുകളില്‍ റഗുലര്‍ ത്രിവത്സര എല്‍എല്‍ബി കോഴ്‌സിലേക്കുള്ള പ്രവേശന പരീക്ഷ ജൂണ്‍ 28 ഞായറാഴ്ച പ്രവേശന പരീക്ഷാ കമ്മീഷണറുടെ ആഭിമുഖ്യത്തില്‍ നടത്തും. എല്ലാ ജില്ലകളിലും പരീക്ഷാകേന്ദ്രങ്ങളുണ്ടാവും.
യോഗ്യത: ഏതെങ്കിലും ഡിസിപ്ലിനില്‍ മൊത്തം 45 ശതമാനം മാര്‍ക്കോടെ (എസ്ഇബിസി 42%, എസ്‌സി/എസ്ടി 40% മതി) ബിരുദമെടുത്തവര്‍ക്ക് പ്രവേശന പരീക്ഷയില്‍ പങ്കെടുക്കാം. പ്രവേശന വിജ്ഞാപനവും വിശദവിവരങ്ങളടങ്ങിയ പ്രോസ്‌പെക്ടസും www.cee.kerala.gov.in ല്‍ ലഭ്യമാണ്. നിര്‍ദ്ദേശാനുസരണം ഓണ്‍ലൈനില്‍ ജൂണ്‍ 15 വൈകിട്ട് 5 മണിക്ക് മുമ്പ് അപേക്ഷിക്കാം.
അപേക്ഷാ ഫീസ്- ജനറല്‍/എസ്ഇബിസി വിഭാഗങ്ങള്‍ക്ക് 950 രൂപയും എസ്‌സി/എസ്ടി/ഭിന്നശേഷി വിഭാഗങ്ങള്‍ക്ക് 450 രൂപയും മതി. നെറ്റ് ബാങ്കിങ്/ഡബിറ്റ്/ക്രഡിറ്റ് കാര്‍ഡ് വഴി ഫീസ് അടയ്‌ക്കാം.
പ്രവേശന പരീക്ഷ: രണ്ട് മണിക്കൂര്‍ ദൈര്‍ഘ്യമുള്ള കമ്പ്യൂട്ടര്‍ അധിഷ്ഠിത പ്രവേശന പരീക്ഷയില്‍ ജനറല്‍ ഇംഗ്ലീഷ്, പൊതുവിജ്ഞാനം, ഗണിതവും മാനസികശേഷിയും, നിയമപഠനത്തിനുള്ള അഭിരുചി എന്നീ വിഷയങ്ങളെ ആസ്പദമാക്കി ഒബ്ജക്ടീവ് മള്‍ട്ടിപ്പിള്‍ ചോയിസ് മാതൃകയിലുള്ള 120 ചോദ്യങ്ങളുണ്ടാവും. ശരിയായ ഉത്തരത്തിന് 3 മാര്‍ക്ക് ലഭിക്കും. ഉത്തരം തെറ്റിയാല്‍ ഓരോ മാര്‍ക്ക്‌വീതം കുറയ്‌ക്കും.
പ്രവേശനം സംബന്ധിച്ച കൂടുതല്‍ വിവരങ്ങള്‍ക്കും അപ്‌ഡേറ്റുകള്‍ക്കും വെബ്‌സൈറ്റ് സന്ദര്‍ശിക്കേണ്ടതാണ്. അന്വേഷണങ്ങള്‍ക്ക് ഹെല്‍പ്പ്‌ലൈന്‍ നമ്പര്‍- 0471-2332120, 2338487.
