ന്യൂദല്‍ഹി: ഇന്ത്യയുടെ അതിര്‍ത്തികളിലെ പ്രതിരോധം ചൈന, പാകിസ്ഥാന്‍ അതിര്‍ത്തികളില്‍ പ്രതിരോധം കൂടുതല്‍ ശക്തമാക്കുന്നതിന്റെ ഭാഗമായി ദശകങ്ങളിലെ ഏറ്റവും വലിയ ആര്‍ട്ടിലറി ആധുനികീകരണ പദ്ധതിക്കൊരുങ്ങി ഇന്ത്യന്‍ സൈന്യം.
ഏകദേശം 23,000 കോടി രൂപ ചെലവില്‍ 300-ലധികം ‘കെ9 വജ്ര’ സെല്‍ഫ് പ്രൊപ്പല്‍ഡ് ഹോവിറ്റ്‌സര്‍ പീരങ്കികള്‍ അധികമായി വാങ്ങാനുള്ള നീക്കത്തിലാണ് രാജ്യം. ഇതുസംബന്ധിച്ച സുപ്രധാന നിര്‍ദ്ദേശം ഈ ആഴ്ച തന്നെ ഡിഫന്‍സ് പ്രൊക്യൂര്‍മെന്റ് ബോര്‍ഡിന്റെ പരിഗണനയ്‌ക്ക് സമര്‍പ്പിച്ചേക്കുമെന്ന് പ്രമുഖ പ്രതിരോധ വൃത്തങ്ങള്‍ വ്യക്തമാക്കി.
പ്രതിരോധ മന്ത്രാലയത്തിന്റെ അനുമതി ലഭിക്കുന്ന മുറയ്‌ക്ക്, ദക്ഷിണ കൊറിയന്‍ കമ്പനിയായ ഹന്‍വ എയറോസ്‌പേസുമായുള്ള സാങ്കേതിക പങ്കാളിത്തത്തോടെ ഇന്ത്യയില്‍ കെ9 വജ്ര നിര്‍മ്മിക്കുന്ന പ്രമുഖ ആഭ്യന്തര കമ്പനിയായ ലാര്‍സന്‍ ആന്‍ഡ് ടൂബ്രോയ്‌ക്ക് കരാര്‍ കൈമാറും. പുതിയ ഓര്‍ഡര്‍ യാഥാര്‍ത്ഥ്യമാകുന്നതോടെ ഇന്ത്യന്‍ സൈന്യത്തിന്റെ പക്കലുള്ള ആകെ കെ9 വജ്ര പീരങ്കികളുടെ എണ്ണം 500 കടക്കും.
ആധുനിക യുദ്ധഭൂമിയില്‍ ഇന്ത്യന്‍ സൈന്യത്തിന്റെ ഏറ്റവും വിശ്വസ്തമായ അത്യാധുനിക പീരങ്കി സംവിധാനങ്ങളിലൊന്നാണ് കെ9 വജ്ര. 55 എം.എം/52 കാലിബര്‍ ട്രാക്ക്ഡ് വിഭാഗത്തില്‍പ്പെടുന്ന ഈ പീരങ്കികള്‍ക്ക് 40 കിലോമീറ്ററിലധികം അകലെയുള്ള ശത്രുലക്ഷ്യങ്ങളെ കൃത്യതയോടെ തകര്‍ക്കാന്‍ കഴിയും. വെടിയുതിര്‍ത്ത തൊട്ടുപിന്നാലെ ശത്രുവിന്റെ തിരിച്ചടിയില്‍ നിന്ന് രക്ഷപ്പെടാനായി അതിവേഗം സ്ഥാനം മാറാന്‍ ഇവയ്‌ക്ക് സാധിക്കും.
കവചിത സംരക്ഷണവും ഉയര്‍ന്ന വേഗതയുമുള്ള ഈ പീരങ്കികള്‍ മരുഭൂമിയിലും ലഡാക്ക് പോലുള്ള ഉയര്‍ന്ന മലനിരകളിലും ഒരേപോലെ ഉപയോഗിക്കാം. ‘ഓപ്പറേഷന്‍ സിന്ദൂര്‍’ ഉള്‍പ്പെടെയുള്ള സമീപകാല സൈനിക നീക്കങ്ങളില്‍ നിന്ന് ഉള്‍ക്കൊണ്ട പാഠങ്ങളുടെ അടിസ്ഥാനത്തിലാണ് ദീര്‍ഘദൂര പ്രഹരശേഷി വര്‍ദ്ധിപ്പിക്കാന്‍ പ്രതിരോധ ആസൂത്രകര്‍ തീരുമാനിച്ചത്. ചൈനയുമായുള്ള യഥാര്‍ത്ഥ നിയന്ത്രണ രേഖയിലും പടിഞ്ഞാറന്‍ അതിര്‍ത്തിയിലും ഒരേസമയം പ്രതിരോധം തീര്‍ക്കാന്‍ മൊബിലിറ്റിയുള്ള ഇത്തരമൊരു പീരങ്കി സംവിധാനം അത്യന്താപേക്ഷിതമാണെന്ന് സൈന്യം വിലയിരുത്തുന്നു.
ഇന്ത്യന്‍ സൈന്യം ഈ സംവിധാനത്തില്‍ പൂര്‍ണ്ണ സംതൃപ്തരാണ്. ഇതിന് മുന്‍പ് 2017-ല്‍ 4,500 കോടി രൂപയ്ക്ക് 100 പീരങ്കികള്‍ വാങ്ങാനായിരുന്നു ആദ്യ കരാര്‍. തുടര്‍ന്ന് 2023 ഡിസംബറില്‍ 7,600 കോടി രൂപയുടെ രണ്ടാമത്തെ കരാറും രാജ്യം പൂര്‍ത്തിയാക്കി. ലഡാക്കിലെ കഠിനമായ തണുപ്പിലും ഉയര്‍ന്ന മലനിരകളിലും കെ9 വജ്ര വിജയകരമായി പരീക്ഷിച്ചതോടെയാണ് ചൈനീസ് അതിര്‍ത്തിയില്‍ ഇവ കൂടുതല്‍ വിന്യസിക്കാന്‍ സൈന്യം തീരുമാനിച്ചത്. അയല്‍രാജ്യങ്ങളുടെ സൈനിക ആധുനികീകരണത്തിന് ശക്തമായ മറുപടി നല്‍കാന്‍ പുതിയ പ്രതിരോധ കരാര്‍ സഹായിക്കുമെന്നാണ് വിലയിരുത്തല്‍.
