കൊല്ലം: സംസ്ഥാന വനംവകുപ്പിലെ നിര്ണായക തസ്തികകളിലേക്കുള്ള നിയമനങ്ങളിലും ഉദ്യോഗസ്ഥരുടെ സ്ഥലമാറ്റങ്ങളിലും ചില എന്ജിഒകളുടെ ഇടപെടല് ശക്തമാണെന്ന ഗുരുതര ആരോപണം ഉയരുന്നു. മൃഗസംരക്ഷണത്തിന്റെ പേരില് പ്രവര്ത്തിക്കുന്ന ചില സംഘടനകള് വനംവകുപ്പിന്റെ നയനിര്ണയങ്ങളിലും ഭരണപരമായ തീരുമാനങ്ങളിലും അമിത സ്വാധീനം ചെലുത്തുന്നതായാണ് ഒരുവിഭാഗം ഉദ്യോഗസ്ഥരുടെ ആക്ഷേപം.
കഴിഞ്ഞ ഒന്പത് വര്ഷമായി വനംവകുപ്പിലെ വിവിധ നിയമനങ്ങളിലും വകുപ്പ് സംഘടിപ്പിക്കുന്ന പരിപാടികളുടെ ആസൂത്രണത്തിലും ഇത്തരം സംഘടനകള്ക്ക് നിര്ണായക പങ്കുണ്ടെന്നാണ് ആരോപണം. മനുഷ്യ-വന്യജീവി സംഘര്ഷം രൂക്ഷമായ സാഹചര്യത്തില് പ്രശ്നക്കാരായ വന്യജീവികളെ പിടികൂടുന്നതിനും പുനരധിവാസ കേന്ദ്രങ്ങളിലേക്ക് മാറ്റുന്നതിനുമുള്ള നടപടികള് വൈകുന്നതിന് പിന്നിലും ഈ ഇടപെടലുകളാണെന്നാണ് ആരോപണം.
സംസ്ഥാനത്തെ ഉന്നത വനംവകുപ്പ് ഉദ്യോഗസ്ഥരുടെ പിന്തുണയോടെയാണ് ഇത്തരം നീക്കങ്ങള് നടക്കുന്നതെന്നും, പുതിയ വനംമന്ത്രിയെ പോലും തെറ്റിദ്ധരിപ്പിക്കാന് ശ്രമം നടക്കുന്നതായും ആരോപണങ്ങള് ഉയരുന്നു.
ഇതിനിടെ, കേരളത്തില് അടുത്തിടെ നടന്ന കാട്ടാന സെന്സസുമായി ബന്ധപ്പെട്ടും വിവാദം ശക്തമാകുകയാണ്. വനമേഖലകളില് കാട്ടാനകളുടെ എണ്ണം ഗണ്യമായി വര്ധിച്ചിട്ടുണ്ടെങ്കിലും ഔദ്യോഗിക കണക്കെടുപ്പില് അത് കുറച്ചുകാണിച്ചെന്നാണ് ആക്ഷേപം.
കാട്ടാനകളുടെ യഥാര്ത്ഥ എണ്ണം മറച്ചുവെച്ച് കേന്ദ്രസര്ക്കാരിന് തെറ്റായ റിപ്പോര്ട്ട് നല്കിയോയെന്ന ചോദ്യവും ഉയരുന്നുണ്ട്. ആരോപണങ്ങള് സംബന്ധിച്ച് സര്ക്കാര് തലത്തില് അന്വേഷണം വേണമെന്ന ആവശ്യവും വിവിധ കോണുകളില് നിന്ന് ഉയരുന്നുണ്ട്.
