ഉത്തരം കിട്ടാത്ത ചോദ്യങ്ങള് ഓരോ മേഖലയിലും എന്ന പോലെ സ്പോര്ട്സിലും സര്വോപരി ഫുട്ബോളിലും സാധാരണമാണ്. അത്തരത്തിലൊരു ചോദ്യമാണ് കാല്പന്തിലെ കേമന് ക്രിസ്റ്റ്യാനോ റൊണാള്ോഡയോ ലയണല് മെസിയോ ? എന്നത്. കഴിഞ്ഞ രണ്ട് പതിറ്റാണ്ടായി ഫുട്ബോള് വര്ത്തമാനങ്ങളില് നടക്കുന്ന ഈ വലിയ തര്ക്കത്തിന് ഇനിയും ഉത്തരം കിട്ടിയിട്ടില്ല. ആദ്യ പത്ത് വര്ഷം ഇരുവരുടെയും കുതിപ്പിന്റെ സര്വ്വ ആനുകൂല്യങ്ങളും മുതലാക്കിയത് ക്ലബ്ബ് ഫുട്ബോള് ആയിരുന്നു. അക്കാലത്തെല്ലാം രണ്ട് പേരും സ്വന്തം രാജ്യത്തിന്റെ ടീമിനായി ഒന്നും ചെയ്യാത്തവര് എന്ന പഴി കേട്ടുകൊണ്ടേയിരുന്നു.
2016 യൂറോ കപ്പില് മുത്തമിട്ടുകൊണ്ട് ക്രിസ്റ്റ്യാനോ ഒരുപടി മുന്നില് കയറി. അന്താരാഷ്ട്ര മത്സരങ്ങളില് ഗോള് സെഞ്ച്വറി തികച്ചും രാജ്യത്തിനായി കൂടുതല് ഗോള് നേടുന്ന താരമായും ക്രിസ്റ്റിയാനോ പിന്നെയും കുറേ ദൂരം മുന്നേറി. എന്നാല് അര്ജന്റീന കുപ്പായത്തില് നിരാശയുടെ കൊടുമുടി കണ്ട മെസി ഒടുവില് കാത്തുവച്ച പോലെ നേട്ടങ്ങള് ഒന്നൊന്നായി കൊയ്യാന് തുടങ്ങിയിട്ട് കൊല്ലം അഞ്ച് തികയുന്നു. 2021 കോപ്പ അമേരിക്ക ഫൈനലില് ബ്രസീലിനെ തോല്പ്പിച്ച് കിരീടം ചൂടിക്കൊണ്ടായിരുന്നു ആ തുടക്കം. മാസങ്ങള്ക്കകം ഫൈനലിസ്സിമ്മയില് ഇറ്റലിയെ കീഴ്പ്പെടുത്തി വീണ്ടും കിരീടം. 2022ല് ഖത്തറില് ലോക കിരീടമുയര്ത്തി. പിന്നീട് 2024ല് വീണ്ടും കോപ്പ അമേരിക്കയില് മുത്തമിട്ടു. ഒപ്പം ബാലന് ദി ഓര് കിരീട നേട്ടത്തില് ക്രിസ്റ്റിയാനോയെക്കാള് കൂടുതല് തവണ പ്ലേയര് ഓഫ് ദി ഇയര് ആയി തെരഞ്ഞെടുക്കപ്പെട്ടുകൊണ്ട് അംഗീകാരങ്ങളുടെ എണ്ണത്തില് ക്രിസ്റ്റ്യാനോയെ മെസി ബഹുദൂരം പിന്നിലാക്കി. പക്ഷെ കളിമികവില് മുന്നില് ആരെന്ന ചോദ്യത്തിന് ഉത്തരമില്ല. ഇല്ലാത്ത ഉത്തരവും ചോദ്യവും ഇപ്പോഴും നിലനില്ക്കുന്നതാണ് ഫുട്ബോളിനെ അനശ്വരമാക്കുന്നത്. ഈ ലോകകപ്പില് ഇരുവരും എന്തായിരിക്കും കരുതിവയ്ക്കുകയെന്ന് കാത്തിരുന്നു കാണാം. ഫലം എന്ത് തന്നെയായാലും അതുകൊണ്ട് വിലയിരുത്താവുന്നതിലും അപ്പുറമാണ് ഈ രണ്ട് പേരുടെയും കരിയര് ഗ്രാഫും കളിമികവും.
ലയണല് മെസി ഉള്പ്പെടുന്ന അര്ജന്റീന ടീം ഇത്തവണ ലോകകപ്പിന്റെ പ്രാഥമിക റൗണ്ടില് അള്ജീരിയ, ഓസ്ട്രിയ, ജോര്ദാന് ടീമുകള്ക്കൊപ്പം ഗ്രൂപ്പ് ജെയിലാണ്. ക്രിസ്റ്റ്യാനോ റൊണാള്ഡോ ഉള്പ്പെടുന്ന പോര്ച്ചുഗല് ഇക്കുറി ഡിആര് കോംഗോ, ഉസ്ബെക്കിസ്ഥാന്, കൊളംബിയ ടീമുകള്ക്കൊപ്പം ഗ്രൂപ്പ് കെയിലാണ്.
