കോഴിക്കോട് : കരിപ്പൂരിലെ സ്വര്‍ണം പൊട്ടിക്കലില്‍ അറസ്റ്റിലായവരില്‍ സജീവ സി പി എം പ്രവര്‍ത്തകനും. പിടിയിലായ കണ്ണൂര്‍ മുഴക്കുന്ന് സ്വദേശി ശരത് സജീവ സിപിഎം പ്രവര്‍ത്തകനാണ്. കണ്ണൂരില്‍ നിന്നുളള 9 പേര്‍, ഒരു കോഴിക്കോട് സ്വദേശി, രണ്ട് മലപ്പുറം സ്വദേശികള്‍, ഒരു കര്‍ണാടക സ്വദേശിയുള്‍പ്പെടെ 13 പേരെയാണ് കരിപ്പൂര്‍ പൊലീസ് അറസ്റ്റ് ചെയ്തത്.
രണ്ട് വ്യത്യസ്ത സംഘങ്ങളില്‍ പെട്ടവരെയാണ് പിടികൂടിയത്. ഇവരില്‍ നിന്നും വാഹനങ്ങളും മൊബൈല്‍ ഫോണുകളും പൊലീസ് പിടികൂടി. പൊലീസിന് ലഭിച്ച രഹസ്യവിവര പ്രകാരം കഴിഞ്ഞ രാത്രി കരിപ്പൂര്‍ വിമാനത്താവളത്തിലെ പാര്‍ക്കിംഗ് ഏരിയകളിലും ഇന്റര്‍നാഷണല്‍ അറൈവല്‍ ഏരിയയിലുമായി നടത്തിയ പരിശോധനയിലാണ് സംഘം പിടിയിലായത്.
വിമാനത്താവളത്തില്‍ വന്നിറങ്ങിയ യാത്രക്കാരനില്‍ നിന്ന് സ്വര്‍ണവും പണവും തട്ടിയെടുക്കാന്‍ ലക്ഷ്യമിട്ടാണ് ഇവര്‍ എത്തിയത്. പ്രതികളുടെ പക്കല്‍ നിന്നും രണ്ട് കാറുകള്‍, രണ്ട് സ്‌കൂട്ടറുകള്‍, 14 മൊബൈല്‍ ഫോണുകള്‍ എന്നിവ പൊലീസ് പിടിച്ചെടുത്തു. കസ്റ്റഡിയിലെടുത്ത് ഫോണുകള്‍ പരിശോധിച്ചപ്പോള്‍ കവര്‍ച്ച ആസൂത്രണം ചെയ്തതിന്റെ വാട്‌സ്ആപ്പ് ചാറ്റുകളും പൊലീസിന് ലഭിച്ചു.
സൗദി അറേബ്യയില്‍ ജോലി ചെയ്യുന്ന കണ്ണൂര്‍ സ്വദേശി അന്‍സാറിന്റെയും പരപ്പനങ്ങാടി സ്വദേശി അലി അക്ബറിന്റെയും നിര്‍ദേശം അനുസരിച്ചാണ് പ്രതികള്‍ കരിപ്പൂരില്‍ സ്വര്‍ണം പൊട്ടിക്കാന്‍ എത്തിയത്. പിടിയിലായവരില്‍ ഭൂരിഭാഗവും കണ്ണൂര്‍ സ്വദേശികളാണ്. താജുദ്ദീന്‍, സ്വരലാല്‍, ധനേഷ്, ശരത്, കനകരാജ്, ജുനൈദ്, രഞ്ജിത്,ഷാരോണ്‍, അക്ഷയ്, തിരൂര്‍ സ്വദേശി റിയാസ്, കോഴിക്കോട് സ്വദേശി സുജിത്, വളാഞ്ചേരി സ്വദേശി ഇര്‍ഫാന്‍, കര്‍ണാടക സ്വദേശി അഭിഷേക് എന്നിവരാണ് അറസ്റ്റിലായത്.
