കോഴിക്കോട് : കാഫിര് സ്ക്രീന്ഷോട്ട് കേസില് ചോദ്യചെയ്യാനിരിക്കെ ഡിവൈഎഫ്ഐ വടകര ബ്ലോക്ക് പ്രസിഡന്റ് പദവി ഒഴിഞ്ഞ് റിബേഷ് രാമകൃഷ്ണന്.ശനിയാഴ്ചയാണ് ഭാരവാഹിത്വം ഒഴിഞ്ഞത്. എന്നാല് ബ്ലോക്ക് കമ്മറ്റി അംഗമായി തുടരും.
കാഫിര് സ്ക്രീന് ഷോട്ട് കേസില് പ്രത്യേക സംഘം അന്വേഷണം തുടങ്ങിയതിന് തൊട്ടുപിന്നാലെയാണ് റിബേഷ് രാമകൃഷ്ണന് ഭാരവാഹിത്വം ഒഴിഞ്ഞത്.കാഫിര് സ്ക്രീന്ഷോട്ട് ആരുണ്ടാക്കിയെന്നതുമായി ബന്ധപ്പെട്ട കേസില് യുഡിഎഫ് സര്ക്കാര് അധികാരത്തിലേറിയതിന് ശേഷം രൂപീകരിച്ച പ്രത്യേക സംഘം നടത്തുന്ന അന്വേഷണം പുരോഗമിക്കുകയാണ്.
ഡിവൈഎഫ്ഐ പ്രവര്ത്തകനായ റിബേഷ് രാമകൃഷ്ണന്, മനീഷ്, അതുല് എന്നിവരെ കഴിഞ്ഞ ദിവസം പ്രത്യേക അന്വേഷണ സംഘം ചോദ്യം ചെയ്യാനായി വിളിച്ച് വരുത്തിയിരുന്നു. വടകര ക്രൈംബ്രാഞ്ച് ഓഫീസിലാണ് ചോദ്യം ചെയ്യല്. റെഡ് വോളന്റിയേഴ്സ് ബറ്റാലിയന് വാട്സ്പ് ഗ്രൂപ്പ് അംഗങ്ങളാണ് അതുലും മനീഷും.
2024-ലെ ലോക്സഭാ തിരഞ്ഞെടുപ്പ് വേളയില് ഏറെ രാഷ്ട്രീയ വിവാദമായതാണ് കാഫിര് സ്ക്രീന് ഷോട്ട്. കെ കെ ശൈലജയും ഷാഫി പറമ്പിലുമായുളള തെരഞ്ഞെടുപ്പ് പോരാട്ടത്തിനിടെ ഷാഫി ദീനിയായ മുസ്ലീമെന്നും മറ്റെയാള് കാഫിര് എന്നും കാട്ടിയായിരുന്നു സ്്ക്രീന് ഷോട്ട്.ഇത് മുസ്ലീം ലീഗുകാര് ഇറക്കിയതാണെന്ന് ആരോപണമുയര്ന്നെങ്കിലും അന്വേഷണത്തില് ഇടത് ഗ്രൂപ്പുകളില് നിന്നാണ് പ്രചരിച്ചതെന്ന് കണ്ടെത്തി. എന്നാല് ഉറവിടം കണ്ടെത്താനായില്ല.തെളിവുകളില്ലെന്ന് ചൂണ്ടിക്കാട്ടി ഇടതു സര്ക്കാരിന്റെ പൊലീസ് നേരത്തേ അന്വേഷണം അവസാനിപ്പിച്ചിരുന്നു. എന്നാല് ഇപ്പോള് പ്രത്യേക അന്വേഷണ സംഘം രൂപീകരിച്ച് കേസ് വീണ്ടും സജീവമായി അന്വേഷിക്കുകയാണ്.
