ആലപ്പുഴ: വീടുകളില് വെള്ളം കയറിയതോടെ വെള്ളത്തില് കിടന്ന് നാട്ടുകാരുടെ പ്രതിഷേധം. ചേര്ത്തലയില് ആണ് സംഭവം.ദേശീയപാത നിര്മ്മാണത്തിലെ അപാകതയാണ് വീടുകള് വെള്ളത്തിലാകാന് കാരണമെന്ന് നാട്ടുകാര് കുറ്റപ്പെടുത്തി.
ചേര്ത്തലയില് ഏറെ നാളുകളായി ഈ പ്രശ്നമുണ്ട്. ദേശീയ പാത നിര്മാണത്തിന്റെ ഭാഗമായി പലയിടങ്ങളിലും വെള്ളത്തിന്റെ ഒഴുക്ക് തടസപ്പെട്ടതോടെയാണ് പ്രദേശവാസികള് ദുരിതത്തിലായത്.
തോട് കരകവിഞ്ഞൊഴുകി വീടുകളിലേക്ക് വെള്ളം കയറുന്ന സാഹചര്യമാണ്.ശുചിമുറി മാലിന്യങ്ങളടക്കം നഗരത്തിലെ സകലമാലിന്യങ്ങളുമടങ്ങിയ വെള്ളം വീടുകളിലേക്കെത്തുന്നു. ഭക്ഷണം കഴിക്കാനോ വീടുകളില് സ്വസ്ഥമായിരിക്കാനോ ജനങ്ങള്ക്ക് കഴിയുന്നില്ല.
പ്രതിഷേധം ശക്തമായതോടെ വൈകുന്നേരം ഏഴിന് തോട്ടിലെ തടസങ്ങള് പൊളിച്ചു നീക്കുമെന്ന് അധികൃതര് അറിയിച്ചു. ദേശീയപാത അതോറിറ്റി തടസം നീക്കിയില്ലെങ്കില് നഗരസഭ പൊളിച്ചു നീക്കും എന്ന് ചെയര്പേഴ്സണ് ഉറപ്പ് നല്കി.
