1978ലെ അര്ജന്റൈന് ലോകകപ്പ് മുതല് സ്ഥിരം സാന്നിധ്യം. അതിന് മുമ്പ് ആദ്യ ലോകകപ്പ് കളിച്ചിരുന്നില്ല. രണ്ടാം ലോകകപ്പില് ക്വാര്ട്ടര് വരെ മുന്നേറി. സ്പെയിനിലെ ആഭ്യന്തര യുദ്ധം കണക്കിലെടുത്ത് മൂന്നാം ലോകകപ്പില് നിന്ന് ഫിഫ സ്പാനിഷ് ടീമിനെ ഒഴിവാക്കി. നാലാം ലോകകപ്പില് നാലാം സ്ഥാനക്കാരായി. തുടര്ന്നുള്ള രണ്ട് ലോകകപ്പുകളില് യോഗ്യത നേടിയില്ല. പിന്നീട് 1970, 1974 ലോകകപ്പുകളിലും യോഗ്യത നേടിയില്ല. രാജ്യത്തെ ആഭ്യന്തര ഫുട്ബോള് കൂടുതല് ശക്തമായി ഉയര്ത്തിക്കൊണ്ടുവന്ന കാലത്താണ് ടീം വലിയ മുന്നേറ്റം നടത്താന് തുടങ്ങി. 2010ല് ദക്ഷിണാഫ്രിക്കയില് ലോക കിരീടം നേടുന്നത് വരെ ആ കുതിപ്പ് എത്തിനിന്നു. പിന്നീട് കാര്യമായ മുന്നേറ്റം നടത്താനായില്ല. എന്നാല് 2010ലെ അതേ നിലവാരത്തില് ടോട്ടല് ടീമുമായാണ് ഇക്കുറി ഇറങ്ങുന്നത്.
ഉറുഗ്വേ
പാരമ്പര്യത്തിന്റെ പ്രൗഢിയും പേറി നടക്കുന്ന ടീം ആണ് ഉറുഗ്വേ. എന്നാല് അതിനൊത്ത നിലവാരം പുലര്ത്താന് സാധിക്കാതെ പോകുന്നതാണ് ടീമിനെ അലട്ടുന്ന വലിയ പ്രശ്നം. ലോകകപ്പ് ഫുട്ബോളിന്റെ ചരിത്രത്തിലെ ആദ്യത്തെ കിരീടാവകാശി. പിന്നീട് 1950ലും ജേതാക്കളായി. 80കളോടെ ടീമിന്റെ കളിഗതിയില് വലിയ തോതില് മങ്ങലേറ്റു. പിന്നീട് പറയാന് പൂര്വ്വകാല പ്രതാപം മാത്രമായി. 2010ല് ഡീഗോ ഫോര്ലാനും ലൂയി സുവാരസും അടങ്ങുന്ന താരനിരയുടെ ബലത്തില് തിരിച്ചുവരവ് നടത്തി സെമി വരെ മുന്നേറിയതാണ്. എന്നാല് തുടര്ന്നുള്ള ലോകകപ്പുകളില് ആ മേന്മ നിലനിര്ത്താന് സാധിച്ചിട്ടില്ല. ലോകകപ്പില് ഈ ടീമിന്റെ 14-ാം അവസരമാണിത്.
സൗദി അറേബ്യ
കഴിഞ്ഞ ലോകകപ്പില് ജേതാക്കളായ അര്ജന്റീനയെ ആദ്യ മത്സരത്തില് തോല്പ്പിച്ച ടീം. ഇക്കുറി മറ്റൊരു കോച്ചിന് കീഴില് വീണ്ടും ഇറങ്ങുകയാണ്. അത്ഭുതം കാട്ടുമോയെന്ന് കണ്ടറിയണം. കഴിഞ്ഞ തവണ സൗദി ടീമുകള്ക്ക് നന്നായി പരിചയമുള്ള മദ്ധ്യേഷ്യയിലായിരുന്നു ലോകകപ്പ് നടന്നത് എന്ന പ്രത്യേകത ഉണ്ടായിരുന്നു. ലോകകപ്പില് ഈ ഏഷ്യന് വമ്പന്മാരുടെ ഏഴാം വരവാണിത്. 1994ലാണ് ആദ്യമായി കളിച്ചത്. അമേരിക്കയില് നടന്ന അന്നത്തെ ലോകകപ്പിന്റെ ഗ്രൂപ്പ് ഘട്ടത്തില് ബെല്ജിയം, മൊറോക്കോ ടീമുകളെ മലര്ത്തിയടിച്ച് നോക്കൗട്ടില് പ്രവേശിച്ച് അത്ഭുതം കാട്ടിയിരുന്നു. പ്രീക്വാര്ട്ടറില് സ്വീഡനോട് തോറ്റ് പുറത്തായി. അതിന് ശേഷം 2006 വെരയുള്ള ലോകകപ്പുകളില് പങ്കെടുത്തു പ്രാഥമിക റൗണ്ടില് പുറത്തായി. തുടര്ന്ന് രണ്ട് ലോകകപ്പുകളില് യോഗ്യത നേടിയില്ല. 2018ലും ആദ്യ റൗണ്ടിനപ്പുറം പോയില്ല. ആദ്യ അവസരത്തില് അത്ഭുതം കാട്ടിയ അമേരിക്കന് മണ്ണില് വീണ്ടും ലോക പോരിനൊരുങ്ങുകയാണ് സൗദി ടീം.
കേപ്പ് വെര്ദെ
ഈ ലോകകപ്പില് ആദ്യമായി കളിക്കാനിറങ്ങുന്ന നാല് ടീമുകളില് ഒന്നാണ് കേപ്പ് വെര്ദെ. 1974 വരെ ഈ ആഫ്രിക്കന് രാജ്യം പോര്ച്ചുഗലിന്റെ കോളനിയായിരുന്നു. ഫിഫയില് അംഗത്വം ലഭിക്കുമ്പോള് 1982 ലോകകപ്പ് കഴിഞ്ഞു. തുടര്ന്ന് നടത്തിവന്ന ശ്രമങ്ങള്ക്കൊടുവില് ഇപ്പോഴാണ് ആദ്യ അവസരം ഒത്തുവന്നത്. രാജ്യത്തിന്റെ വലിപ്പത്തിന്റെ അടിസ്ഥാനത്തില് ലോകകപ്പില് പങ്കെടുക്കാന് അവസരം കിട്ടിയ ഏറ്റവും ചെറിയ രണ്ടാമത്തെ രാജ്യക്കാരാണ്. ആകെ അഞ്ചേ കാല് ലക്ഷത്തില് താഴെ മാത്രം ആളുകളാണ് ഇവിടെയുള്ളത്.
