ന്യൂയോര്‍ക്ക്: ലോകകപ്പ് ഫുട്‌ബോള്‍ തുടങ്ങാന്‍ ഇനി നാല് ദിവസം മാത്രമാണ് ബാക്കിയുള്ളത്. ലോകം കണ്ട ഏറ്റവും വലിയ കാല്‍പന്ത് പൂരത്തിനായി വടക്കേ അമേരിക്കയിലെ മൂന്ന് രാജ്യങ്ങള്‍ ഒരുങ്ങുമ്പോള്‍ അതില്‍ പങ്കെടുക്കുന്ന പ്രായം കൂടിയ പ്രധാന താരങ്ങളില്‍ ചിലരെയും പ്രായം കുറഞ്ഞ ചില ആളുകളെയും പരിചയപ്പെടാം.
കുട്ടിത്താരങ്ങളില്‍ പലര്‍ക്കും പലതും തെളിയിക്കാനുണ്ട്. പെലെയെ പോലെ എംബാപ്പെയെ പോലെ വമ്പന്‍ കണ്ടെത്തലുകള്‍ ഈ ലോകകപ്പില്‍ നിന്ന് ഉയര്‍ന്നുവരുമോ എന്ന് കാത്തിരുന്നു കാണാം. പക്ഷെ വയസ് കൂടിയവരെ കാത്തിരിക്കുന്നത് വലിയ നഷ്ടമാണ്. പ്രായം 25നപ്പുറമുള്ള ഓരോ താരങ്ങളും ഇറങ്ങുന്നത് ഇപ്പോഴില്ലേല്‍ ഇനിയില്ലെന്ന മനോഭാവത്തിലായിരിക്കും. കൗമാരം വിട്ട് നിരവധി ഫുട്‌ബോളര്‍മാരാണ് ലോക കളിപ്രേമികള്‍ക്കായി സംഭാവന ചെയ്യപ്പെട്ടുകൊണ്ടിരിക്കുന്നത്. അവിടെ ഇരുപത്തിയഞ്ചോ മൂപ്പതോ വയസിനപ്പുറമുള്ള ഓരോരുത്തരും ഒരു മത്സരത്തില്‍ നിറം മങ്ങിയാല്‍ പോലും ഏതെങ്കിലും ചാമ്പ്യന്‍ഷിപ്പുകള്‍ നേടാന്‍ കാഴിയാതിരുന്നാല്‍ പോലും ടീമില്‍ അവരുടെ സ്ഥാനം ആടിയുലയും.
ഏറ്റവും ചെറുപ്പം മെക്‌സിക്കോ മിഡ്ഫീല്‍ഡര്‍ ഗില്‍ബര്‍ട്ടോ മോറ
ലോകകപ്പ് ആരംഭിക്കുന്ന ജൂണ്‍ 11ന് 17 വയസും 240 ദിവസത്തെയും പ്രായമെ ഗില്‍ബര്‍ട്ടോ മോറയ്‌ക്ക് ആകുകയുള്ളൂ. പ്രായം കുറഞ്ഞ രണ്ടാമത്തെ ശ്രദ്ധേയ താരം ചെക്ക് റിപ്പബ്ലിക്കിന്റെ ഹ്യൂഗോ സോക്കുറെച്ച് ആണ്. ലോകകപ്പ് ആരംഭിക്കുമ്പോള്‍ ഹ്യൂഗോയ്‌ക്ക് 18 വയസും നാല് ദിവസവുമേ പ്രായമാകുകയുള്ളൂ. ക്ലബ്ബ് ഫുട്‌ബോളില്‍ ചെക്ക് റിപ്പബ്ലിക് ടീം സ്പാര്‍ട്ട പ്രാഹാ ടീമിന്റെ താരമാണ്. ജര്‍മന്‍ ബുന്ദെസ്‌ലിഗ വമ്പന്‍മാരായ ബയേണ്‍ മ്യൂണിക്കിനായി കളിക്കുന്ന താരം ലെന്നാര്‍ട്ട് കാള്‍ ആണ് മറ്റൊരു പ്രധാന താരം. അറ്റാക്കിങ് മിഡ്ഫീല്‍ഡര്‍ ആയാണ് കളിക്കുന്നത്.
മുതിര്‍ന്ന താരം സ്‌കോട്ട്‌ലന്‍ഡ് ഗോളി ക്രെയ്ഗ് ഗോര്‍ഡന്‍
ലോകകപ്പിന്റെ ആരംഭ ദിവസം ഗോര്‍ഡന്റെ പ്രായം 43 വര്‍ഷവും 162 ദിവസവും തികയും. സ്‌കോട്ടിഷ് ക്ലബ്ബ് ഹാര്‍ട്ട് ഓഫ് മിഡ്‌ലോത്തിയാന് വേണ്ടി ഇപ്പോഴും കളിച്ചുകൊണ്ടിരിക്കുന്നു. പിന്നെ ലോകം വലിയ പ്രതീക്ഷയോടെ കാത്തിരിക്കുന്ന താരം ക്രിസ്റ്റിയാനോ റൊണാള്‍ഡോയ്‌ക്ക് 41 വയസുണ്ട്. ക്രൊയേഷ്യയുടെ സുവര്‍ണ തലമുറയിലെ പ്രധാനി ലൂക്കാ മോഡ്രിച്ചിന് വയസ്സ് 40 തികഞ്ഞു. ലോകകപ്പ് പുരോഗമിക്കുന്നതിനിടെ സൂപ്പര്‍ താരം ലയണല്‍ മെസിക്ക് പ്രായം 39 തികയും. ബ്രസീല്‍ നിരയില്‍ ഏറ്റവും പരിചയ സമ്പത്തും ടീമിനെയാകെ ആവേശത്തിലാഴ്‌ത്താനും പോന്ന താരം നെയ്‌മറിന് വയസ്സ് 34 ആയി. റൊണാള്‍ഡോയും മെസിയം കളിക്കുന്ന ആറാം ലോകകപ്പും നെയ്‌മറുടെ നാലാം ലോകകപ്പുമാണിത്.
പ്രായം കൂടിയ ടീം പാനമ, കുറഞ്ഞവര്‍ കൂടുതല്‍ ഐവറി കോസ്റ്റില്‍
30 വയസിന് മേല്‍ പ്രായമുള്ള താരങ്ങള്‍ കൂടുതലായി ഇപ്രാവശ്യം കളിക്കുന്നത് ലാറ്റിനമേരിക്കന്‍ ടീം പാനമയിലാണ്. എന്നാല്‍ പ്രായത്തിന്റെ കാര്യത്തില്‍ സമതുലനം പാലിക്കുന്ന രണ്ട് ടീമുകള്‍ ഇറാനും കൊളംബിയയും ആണ്.
കാര്‍ലോ ആഞ്ചലോട്ടി ഒരുക്കിയ ബ്രസീല്‍ ടീമിന് പരിചയ സമ്പത്തിന്റെ മികച്ച പിന്തുണ വേണമെന്ന് കോച്ച് കാര്‍ലോസ് ആഞ്ചെലോട്ടി തീരുമാനിച്ചു കഴിഞ്ഞു. നെയ്‌മര്‍ക്ക് പുറമെ, കാസെമിറോ, ഡാനിലോ എന്നിവര്‍ ഇതിന് ഉദാഹരണം.
പ്രായം കുറഞ്ഞ ടീം കൂടുതലായുള്ള ഐവറി കോസ്റ്റിന്റെ ഇത്തവണത്തെ പ്രധാന സ്‌ട്രൈക്കര്‍മാര്‍ 19കാരനായ യാന്‍ ഡിയോമാന്‍ഡെയും 20കാരനായ ബസൂമാനാ ടൂറെയും ആണ്. കഴിഞ്ഞ ദിവസം സന്നാഹ മത്സരത്തില്‍ ഐവറികോസ്റ്റ് ടീം ലോകകപ്പിന്റെ ഫേവറിറ്റുകളായ ഫ്രാന്‍സിനെ തോല്‍പിച്ചിരുന്നു.
