കൊച്ചി: മുന്‍ മുഖ്യമന്ത്രി പിണറായി വിജയന്റെ മകള്‍ വീണ ഉള്‍പ്പെട്ട സിഎംആര്‍എല്‍-എക്സാലോജിക് മാസപ്പടിക്കേസില്‍ മരവിപ്പിച്ച അക്കൗണ്ടുകള്‍ കണ്ടുകെട്ടാന്‍ നടപടി തുടങ്ങി. റെയ്ഡുകള്‍ക്ക് പിന്നാലെ മരവിപ്പിച്ച 242 ബാങ്ക് അക്കൗണ്ടുകളിലെ 18.36 കോടി രൂപ പൂര്‍ണമായും കണ്ടുകെട്ടാനാണ് ഇ ഡിയുടെ അടിയന്തര നീക്കം. ഈ അക്കൗണ്ടുകളില്‍ വീണയുടെ ഉടമസ്ഥതയിലുള്ള എച്ച്ഡിഎഫ്‌സി ബാങ്ക് അക്കൗണ്ടുമുണ്ട്.
തുക കണ്ടുകെട്ടുന്നത് സംബന്ധിച്ച് ഇ ഡി അഡ്ജൂഡിക്കേറ്റിങ് അതോറിറ്റിക്ക് വിശദമായ റിപ്പോര്‍ട്ട് നല്കും. മുമ്പു നടത്തിയ റെയ്ഡുകളില്‍ പിടിച്ചെടുത്ത വീണയുടെ മൊബൈല്‍ ഫോണ്‍, നിക്ഷേപ രസീതുകള്‍, സിഎംആര്‍എലുമായി ബന്ധപ്പെട്ട രേഖകള്‍, മറ്റ് ഇലക്ട്രോണിക് ഉപകരണങ്ങള്‍ എന്നിവ തുടര്‍നടപടികള്‍ക്കു സ്ഥിരമായി കസ്റ്റഡിയില്‍ സൂക്ഷിക്കാന്‍ അനുമതി തേടും. ഈ ഡിജിറ്റല്‍ തെളിവുകളെല്ലാം വിദഗ്ധ പരിശോധനയിലാണ്.
വീണയുടെ ലോക്കര്‍ പരിശോധന പൂര്‍ത്തിയായ ശേഷമായിരിക്കും ചോദ്യം ചെയ്യലിന് സമന്‍സയയ്‌ക്കുക. കഴിഞ്ഞ ദിവസം കൊച്ചിയില്‍ കേസ് വിലയിരുത്താനുള്ള യോഗത്തില്‍ പഴുതടച്ച് നടപടികള്‍ തുടരാന്‍ ഇ ഡി ഡയറക്ടര്‍ നിര്‍ദേശിച്ചിരുന്നു. മുഴുവന്‍ രേഖകളും ലഭിച്ച ശേഷമായിരിക്കും മറ്റു നടപടികളിലേക്ക് കടക്കുക. സിഎംആര്‍എല്‍ അധികൃതര്‍ സുപ്രീംകോടതിയെ സമീപിച്ചു നിയമപരമായ പ്രതിരോധം തീര്‍ക്കാനുള്ള സാധ്യത മുന്‍കൂട്ടിക്കണ്ടാണ് ഇ ഡി നീക്കം. അതുകൊണ്ടുതന്നെ കോടതിയില്‍ നിന്ന് തിരിച്ചടിയൊന്നുമുണ്ടാകാത്ത വിധം കൃത്യമായ തെളിവുകളോടെയുള്ള പഴുതടച്ച അന്വേഷണത്തിനാണ് ഇ ഡി പ്രാധാന്യം നല്കുക.
