ന്യൂദല്ഹി: മമതയ്ക്ക് വേണ്ടി എംപി സ്ഥാനം രാജിവെയ്ക്കാന് ക്രിക്കറ്റ് താരം യൂസഫ് പത്താനോട് നിര്ദേശിച്ചത് സൗരവ് ഗാംഗുലിയാണെന്ന് റിപ്പോര്ട്ടുകള്. എന്നാല് തനിക്ക് ഇതില് പങ്കില്ലെന്ന് നിഷേധിച്ച് സൗരവ് ഗാംഗുലി രംഗത്ത് വന്നു. മമതയ്ക്ക് മത്സരിക്കാന് താന് എംപി സ്ഥാനം ഒഴിയില്ലെന്ന് യൂസഫ് പത്താന് പറഞ്ഞത് മമതയ്ക്ക് വലിയ നാണക്കേടായിരിക്കുകയാണ്.
ഏതെങ്കിലും ഒരു തൃണമൂല് എംപിയെ രാജിവെപ്പിച്ച് മമത അവിടെ മത്സരിച്ച് ജയിച്ച് എംപിയാകാന് പദ്ധതി തയ്യാറാക്കുകയാണ്. ഇതിനായി തൃണമൂല് എംപിയായ യൂസഫ് പത്താനോട് രാജിവെയ്ക്കാന് ആവശ്യം ഉയര്ന്നിരിക്കുകയാണ്. മമതയ്ക്ക് വേണ്ടി എംപി സ്ഥാനം രാജിവെയ്ക്കാന് യുസഫ് പത്താനോട് ആദ്യം പറഞ്ഞത് സൗരവ് ഗാംഗുലിയാണെന്നാണ് മാധ്യമറിപ്പോര്ട്ടുകള് പുറത്തുവന്നത്.
ബിജെപിയോട് അനുകൂല നിലപാട് കാണിക്കുന്ന സൗരവ് ഗാംഗുലി ബിജെപിയെ ചതിച്ചോ എന്ന രീതിയില് ചില കേന്ദ്രങ്ങളില് നിന്നും ചോദ്യം ഉയര്ന്നിരുന്നു. ഇതോടെയാണ് തനിക്ക് ഇതില് പങ്കില്ലെന്ന് പറഞ്ഞ് ഇക്കാര്യം നിഷേധിച്ച് സൗരവ് ഗാംഗുലി രംഗത്ത് വന്നത്. ബെഹ്റാം പൂര് മണ്ഡലത്തില് നിന്നാണ് 2024ല് ക്രിക്കറ്റ് താരം യൂസഫ് പത്താന് മത്സരിച്ചത്. അന്ന് കോണ്ഗ്രസിന്റെ സ്റ്റാറായ ആദിര് രഞ്ജന് ചൗധരിയെയാണ് യൂസഫ് പത്താന് തോല്പിച്ചത്.
അതേ സമയം ഇപ്പോള് താന് എംപി സ്ഥാനം രാജിവെയ്ക്കുന്നില്ലെന്നും ജനങ്ങള് തന്റെ മേല് ഏല്പിച്ച ഉത്തരവാദിത്വം കാത്ത് സൂക്ഷിക്കാന് കാലാവധി തീരുംവരെ എംപിയായി തുടരുമെന്നും വ്യക്തമാക്കിയിരിക്കുകയാണ് യൂസഫ് പത്താന്. മമതയ്ക്ക് മത്സരിക്കാന് തന്നോട് സീറ്റ് ഒഴിഞ്ഞുകൊടുക്കാന് പറഞ്ഞുവെന്ന വാര്ത്ത കെട്ടിച്ചമച്ച ഒന്നാണെന്ന് മാത്രമാണ് യൂസഫ് പത്താന് പുറത്തുപറയുന്നത്. പക്ഷെ ശരിയ്ക്കും സീറ്റ് ഒഴിയാന് കഴിയില്ലെന്ന് പറഞ്ഞുവെന്നാണ് തൃണമൂലിനുള്ളില് പറഞ്ഞുകേള്ക്കുന്നത്.
തന്റെ തട്ടകമായ ബംഗാള് മോദിയും അമിത് ഷായും തകര്ത്തപ്പോള് അവരുടെ കേന്ദ്രമായ ദല്ഹിയില് താന് ചെന്ന് സമരം നയിക്കുമെന്ന് കഴിഞ്ഞ ദിവസം മമത പ്രഖ്യാപിച്ചിരുന്നു. ഇതിന്റെ ഭാഗമായാണ് എംപിയായി മത്സരിച്ച് ജയിച്ച് പാര്ലമെന്റില് പോകാന് മമത തീരുമാനിച്ചത്. പക്ഷെ ഇപ്പോള് മമതയ്ക്ക് മത്സരിക്കാന് വേണ്ടി സ്ഥാനമൊഴിയാന് ഒരു തൃണമൂല് എംപിയും തയ്യാറാകുന്നില്ല എന്നതാണ് സ്ഥിതി. യൂസഫ് പത്താന് സ്ഥാനമൊഴിയുമെന്ന് മമത കരുതിയെങ്കിലും തെറ്റി. ഇക്കാര്യത്തില് സൗരവ് ഗാംഗുലിയെക്കൊണ്ടാണ് സ്ഥാനമൊഴിയേണ്ട കാര്യം യൂസഫ് പത്താനോട് സൂചിപ്പിച്ചതെന്ന് കരുതുന്നു. എന്നാല് ആ നീക്കം തിരിച്ചടിച്ചുവെന്ന് മാത്രമല്ല, മമതയ്ക്ക് വലിയ നാണക്കേടായിരിക്കുകയാണ്. സൗരവ് ഗാംഗുലിയുടെയും യൂസഫ് പത്താന്റെയും പ്രതികരണങ്ങള്.
