നാഗ്പുര്: ഭാവിയുടെ വെല്ലുവിളി ഏറ്റെടുക്കാന് ഭാരതം തയാറാണോ എന്നതാണ് ഇന്നത്തെ വെല്ലുവിളിയെന്നും രാഷ്ട്രീയ സ്വയംസേവക സംഘത്തിന്റെ ശക്തി നമ്മള് സജ്ജരാണെന്ന് തെളിയിക്കുന്നുവെന്നും പ്രമുഖ വ്യവസായി പദ്മഭൂഷണ് കുമാരമംഗലം ബിര്ള പറഞ്ഞു. ആര്എസ്എസ് കാര്യകര്ത്താ വികാസ് ദ്വിതീയ വര്ഗിന്റെ സമാപനത്തില് മുഖ്യാതിഥിയായി സംസാരിക്കുകയായിരുന്നു അദ്ദേഹം.
ആര്എസ്എസ് സര്സംഘചാലകുമായി ഏറെക്കാലമായ സമ്പര്ക്കവും ബന്ധവുമുണ്ട്. ഇന്ന് ഈ വലിയ പരിപാടിയില് വന്ന് പങ്കുകൊള്ളാന് കഴിഞ്ഞത് ഭാഗ്യമായി കരുതുന്നു. രാജ്യത്ത് സമൂഹത്തിന് ആവശ്യമായ ഘട്ടങ്ങളിലെല്ലാം സഹായവുമായി ആര്എസ്എസ് ജനങ്ങള്ക്കൊപ്പം നിന്ന ചരിത്രത്തിന് ഉദാഹരണങ്ങള് ഏറെയുണ്ട്. രാഷ്ട്ര നിര്മാണവും വ്യക്തിനിര്മാണവുമാണ് ആര്എസ്എസിന്റെ പ്രവര്ത്തനം.
നമ്മുടെ രാജ്യം അമൃതകാലത്തിലൂടെ കടന്നുപോകുകയാണ്. എല്ലാ മേഖലകളിലും വെല്ലുവിളികളും അവസരങ്ങളും ഉണ്ടാകുന്നു. സാമ്പത്തിക മേഖലയില്, തൊഴില്, നിര്മാണം, സാങ്കേതിക വിദ്യ തുടങ്ങി സകല രംഗത്തും. ഇപ്പോള് എഐയുടെ കാലമായി. നമ്മുടെ ഭാവി നിര്ണയിച്ച് കഴിഞ്ഞു. ആ ഭാവിക്ക് അനുസരിച്ച് പ്രവര്ത്തിക്കാന് നമ്മള് തയാറായോ എന്നതാണ് ചോദ്യം.
വ്യവസായവും രാജ്യവികസനവും തമ്മില് ബന്ധിതമാണ്. വ്യവസായം സകല മേഖലയിലും വളര്ച്ച കൊണ്ടുവരുന്നു. തൊഴില്, നിര്മാണം, സംരംഭം, സാങ്കേതികത തുടങ്ങി പല മേഖലയിലും. ഭാരതത്തിലെ യുവാക്കള്ക്ക് ഇത്രയും നല്ല അവസരം ഉണ്ടായിട്ടില്ല. അത് അനുകൂലമാക്കുകയാണ് വേണ്ടത്. വ്യവസായം കേവലം സമ്പത്തുണ്ടാക്കാനും ലാഭമുണ്ടാക്കാനും മാത്രമല്ല എന്ന് സങ്കല്പമാണ് ബിര്ളാ കുടുംബം എന്നും പിന്തുടരുന്നത്. രാഷ്ട്രത്തിന്റെ വളര്ച്ച ഞങ്ങളുടെ വ്യവസായത്തിന്റെ പ്രധാനലക്ഷ്യമാണ്. ആര്എസ്എസിന്റെ കാഴ്ചപ്പാടാണ് ഇക്കാര്യത്തില്.
ഭാരതത്തിലെ യുവജനത സംരംഭകരാകണം, സമസ്ത മേഖലയിലും അതിന് തുനിഞ്ഞിറങ്ങിയാല് വികസിത ഭാരതം വിദൂരത്തല്ല. അവസരം വിനിയോഗിക്കുക, ധാര്മികത പിന്തുടരുക, ആര്എസ്എസിന്റെ പങ്ക് ഭാവിക്ക് വളരെ പ്രധാനമാണ്, കുമാരമംഗലം ബിര്ള പറഞ്ഞു.
സര്സംഘചാലക് മുഖ്യപ്രഭാഷണം നടത്തി. നാഗ്പുര് മഹാനഗറില് നടന്ന പരിപാടിയില് വര്ഗ് കാര്യവാഹും ജന്മഭൂമി ജനറല് മാനേജരുമായ കെ.ബി. ശ്രീകുമാര് സ്വാഗതം പറഞ്ഞു.
