2014ല് നാലാം ലോക കിരീടം നേടിയ ശേഷം തുടര്ച്ചയായ രണ്ട് ലോകകപ്പുകളും ഏതെങ്കിലും ടീം മറക്കാന് ആഗ്രഹിക്കുന്നുണ്ടെങ്കില് അത് ജര്മനിയായിരിക്കും. ഗ്രൂപ്പ് ഘട്ടത്തില് താരതമ്യേന ദുര്ബലരെന്ന് വിലയിരുത്തപ്പെടാവുന്ന ടീമുകളോട് വരെ തോറ്റാണ് രണ്ട് ലോകകപ്പിലും ജര്മനി പുറത്തായത്. ഇത്തവണയും യൂറോപ്പില് നിന്നുള്ള യോഗ്യതയുടെ ആദ്യ അവസരത്തില് തന്നെ ലോകകപ്പ് പാസ് ഉറപ്പാക്കിയിട്ടുണ്ട്. ജര്മനിക്കൊപ്പം കുറസാവോ, ഐവറി കോസ്റ്റ്, ഇക്വഡോര് ടീമുകളാണ്. ഈ ടീമുകളോട് പൊരുതി ജര്മനി തീര്ച്ചയായും നോക്കൗട്ട് ബെര്ത്ത് ഉറപ്പാക്കുമായിരിക്കാം, പക്ഷെ കഴിഞ്ഞ ലോകകപ്പുകളിലെ അനുഭവങ്ങള് വലിയ സമ്മര്ദ്ദമായി ടീമിന് മേല് വാളുപോലെ ആടിയുലയുന്നുണ്ട്. പ്രാഥമിക ഘട്ടം ജര്മനി ഭേദിക്കുന്നത് ഈ വലിയ സമ്മര്ദ്ദം അതിജീവിച്ചുകൊണ്ടായിരിക്കും.
ജര്മനി
പ്രഥമ ലോകകപ്പില് ജര്മന് ടീം ലോകകപ്പില് പങ്കെടുത്തിരുന്നില്ല. 1934ലെ രണ്ടാം ലോകകപ്പില് മൂന്നാം സ്ഥാനക്കാരായി. 1938ല് ആദ്യ റൗണ്ടില് പുറത്ത്. 1950ല് ടീം വിലക്ക് നേരിട്ടിരുന്നു. 1954ല് ജേതാക്കളായി തിരിച്ചുവരവ് നടത്തി. പിന്നീട് ഓരോ ലോകകപ്പില് വലിയ മുന്നേറ്റങ്ങള് നടത്തി മികച്ച രീതിയില് സാന്നിധ്യമറിയിച്ചാണ് ജര്മനി കടന്നുവന്നത്. 2014 വരെ നാല് തവണ ജേതാക്കളായി. ഏറ്റവും ഒടുവില് ഫൈനലില് അര്ജന്റീനയെ ആണ് തോല്പ്പിച്ചത്. പിന്നീട് ടീം പതിവില്ലാത്ത വിധം വലിയ പതനം നേരിടുകയായിരുന്നു. പഴയ ഗാംഭീര്യം തിരികെ പിടിക്കാനുള്ള ശ്രമത്തിലാണ് ജര്മനി. ടീമംഗങ്ങള്ക്കിടയിലെ ഒത്തിണക്കമില്ലായ്മയും വര്ഗ വിവേചനവുമെല്ലാം ടീമിന്റെ പ്രകടനത്തെ ബാധിച്ചു.
1954, 1974, 1990, 2014 വര്ഷങ്ങളില് ജേതാക്കളായപ്പോള് നാല് തവണ റണ്ണറപ്പുകളായി. രണ്ടാം ലോകകപ്പിലടക്കം നാല് തവണ മൂന്നാം സ്ഥാനക്കാരും ഒരു തവണ നാലാം സ്ഥാനത്തും ഫിനിഷ് ചെയ്തിട്ടുണ്ട്.
കുറസാവോ
23-ാം ലോകകപ്പില് ആദ്യമായി കളിക്കുന്ന നാല് ടീമുകളില് ഒന്നാണ് കുറസാവോ. വടക്കേ അമേരിക്കന് ഫുട്ബോള് രാജ്യങ്ങളുടെ സംഘടനയായ കോന്കകാഫില് ഉള്പ്പെടുന്ന ടീം. നിലവിലെ ഫിഫ റാങ്കിങ് 82 ആണ്. 2017ല് 62-ാം റാങ്കിലെത്തിയതാണ് ഏറ്റവും വലിയ മുന്നേറ്റം.
ഐവറി കോസ്റ്റ്
2006 മുതല് തുടര്ച്ചയായ മൂന്ന് ലോകകപ്പുകളില് സ്ഥിരം സാന്നിധ്യമായിരുന്നു. തുടര്ന്നുള്ള രണ്ട് തവണ യോഗ്യത നേടിയില്ല. 1958 വരെ ഈ ടീം ഫ്രാന്സിന്റെ കൊളനിയായിരുന്നു. പിന്നീട് സ്വതന്തരമാക്കപ്പെട്ടെങ്കിലും 1966 ലോകകപ്പ് എത്തുമ്പോഴേക്കുമാണ് ഫിഫ അംഗത്വമെടുത്തത്. പിന്നീട് നീണ്ട കാലം ഓരോ ലോകകപ്പുകളിലും യോഗ്യതയ്ക്കായി പൊരുതിയെങ്കിലും ആദ്യമായി അവസരം കിട്ടാന് 2006 ജര്മന് ലോകകപ്പ് വരെ കാക്കേണ്ടിവന്നു.
ഇക്വഡോര്
2002 ജപ്പാന്, കൊറിയ ലോകകപ്പിലാണ് ഈ ലാറ്റിനമേരിക്കന് ടീം ആദ്യമായി യോഗ്യത നേടിയത്. ജര്മനിയില് നടന്ന തൊട്ടടുത്ത ലോകകപ്പിന്റെ പ്രീക്വാര്ട്ടറില് കടന്നതാണ് ഇതുവരെയുള്ള പ്രധാന നേട്ടം. പിന്നീട് 2014ലും 2022ലുമാണ് ലോകകപ്പ് കളിക്കാന് അര്ഹത നേടിയത്. ഇത്തവണ പ്ലേ ഓഫിലൂടെ അവസാന അവസരത്തിലാണ് പാസ് ഉറപ്പിച്ചത്.
