ന്യൂദല്ഹി : സിബിഎസ്ഇ ചെയര്മാനായി ലോഖണ്ഡെ പ്രശാന്ത് സീതാറാമിനെ നിയമിച്ചു. വരുണ് ഭരദ്വാജ് ആണ് പുതിയ സെക്രട്ടറി.സിബിഎസ്ഇ പരീക്ഷാ നടത്തിപ്പിലെ വീഴ്ചയില് സിബിഎസ്ഇ ചെയര്മാനെയും സെക്രട്ടറിയേയും സ്ഥലംമാറ്റിയ പശ്ചാത്തലത്തിലാണ് പുതിയ നിയമനം. പ്രധാനമന്ത്രിയുടെ ഓഫീസിന്റെ നിര്ദ്ദേശപ്രകാരമായിരുന്നു ചെയര്മാനായിരുന്ന രാഹുല് സിംഗിനെയും സെക്രട്ടറി ഹിമാന്ഷു ഗുപ്തയെയും സ്ഥലം മാറ്റിയത്.
ഭരണം, ധനകാര്യം, അഫിലിയേഷനുകള് തുടങ്ങിയ ഭരണപരമായ പ്രവര്ത്തനങ്ങള്ക്ക് നേതൃത്വം നല്കിയ വ്യക്തിയാണ് സെക്രട്ടറി ആയിരുന്ന ഹിമാന്ഷു ഗുപ്ത.സിബിഎസ്ഇയുടെ ദൈനംദിന പ്രവര്ത്തനങ്ങളിലും സ്കൂള്, പരീക്ഷാ നടത്തിപ്പിലും നയ നിര്വഹണത്തിലും അദ്ദേഹം പ്രധാനപങ്ക് വഹിച്ചിരുന്നു.
അതേസമയം,സിബിഎസ്ഇ പുനര്മൂല്യനിര്ണയ പോര്ട്ടലിന് നേരെയുണ്ടായ സൈബര് ആക്രമണം കേന്ദ്രസര്ക്കാരിന്റെ സൈബര് സുരക്ഷ വിദഗ്ധര് നിരീക്ഷിച്ചു വരികയാണെന്ന് വിദ്യാഭ്യാസമന്ത്രാലയം അറിയിച്ചു. കുറ്റക്കാര്ക്കെതിരെ കടുത്ത നടപടി ഉണ്ടാകും. സാങ്കേതിക തടസങ്ങളെ തുടര്ന്ന് പ്രവര്ത്തനരഹിതമായിരുന്ന പോര്ട്ടല് വീണ്ടും പ്രവര്ത്തനം തുടങ്ങിയതിന് പിന്നാലെയാണ് സൈബര് ആക്രമണശ്രമം ഉണ്ടായത്.സൈബര് ആക്രമണ നീക്കം പ്രതിരോധിച്ചു എന്ന് സിബിഎസ്ഇ വ്യക്തമാക്കി. ഇതിനോടകം 16000 -ല് അധികം വിദ്യാര്ഥികള് പുനര് മൂല്യനിര്ണയത്തിനായുള്ള അപേക്ഷകള് സമര്പ്പിച്ചു.
