മെക്സിക്കോ സിറ്റി: ഫിഫ ലോകകപ്പ് 2026 തുടങ്ങുന്നത് ഫിഫയുടെ പരിഷ്കരിച്ച നിയമങ്ങള് പാലിച്ചുകൊണ്ടായിരിക്കും. അന്താരാഷ്ട്ര ഫുട്ബോള് അസോസിയേഷന് ബോര്ഡ്(ഐഎഫ്എബി) പുതിയ നിയമ പരിഷ്കാരങ്ങള്ക്ക് അംഗീകാരം നല്കി. ലോകകപ്പ് മുതല് പിന്നീടങ്ങോട്ട് എല്ലാ കളികള്ക്കും ഇത് ബാധകമായിരിക്കും.
നിയമങ്ങള്:
വായപൊത്തി സംസാരിച്ചാല് റെഡ് കാര്ഡ്
മത്സരത്തിനിടെ അസഭ്യവും മോശം വക്കുകളും പ്രയോഗിക്കാന് വായപൊത്തി പിടിച്ചാലും രക്ഷയില്ല. അത്തരം സന്ദര്ഭങ്ങളെ തെരഞ്ഞ് പിടിച്ച് റെഡ് കാര്ഡ് കാണിക്കാന് റഫറിക്ക് സാധിക്കും. കൈകള് കൊണ്ടോ വസ്ത്രം കൊണ്ട വായ മുടിപ്പിടിച്ച ശേഷം അസഭ്യം പറയുന്ന സംഭവങ്ങളുടെ പശ്ചാത്തലത്തിലാണ് പുതിയ കരുതല്. ശിക്ഷാ നടപടിക്ക് കാരണമായ സംഭവത്തിനോട് വിയോജിച്ച് താരങ്ങള് അസഭ്യം പറഞ്ഞാല് കൂടുതല് കടുത്ത നടപടികള്ക്ക് ആ താരം വിധേയനാകും. അത്തരം സംഭവങ്ങള് ഒഴിവാക്കാനാണിത്.
പ്രതിഷേധിച്ച് കളം വിട്ടാല് റെഡ് കാര്ഡ്
റഫറിയുടെ തീരുമാനത്തെ ചോദ്യം ചെയ്യാം. പക്ഷെ അതിനോട് വിയോജിച്ച് പ്രതിഷേധ സൂചകമായി കളം വിട്ടാല് പണിയാകും. അങ്ങനെ മൈതാനം വിടുന്ന താരത്തെ റെഡ് കാര്ഡ് കാട്ടി പുറത്താക്കിയതായി കണക്കാക്കും. ടീം ഒന്നടങ്കം ഈ നടപടി സ്വീകരിച്ചാല് രണ്ടാഴ്ച്ചത്തേക്ക് മത്സര വിലക്കുണ്ടാകും.
ത്രോയും ഗോള്കിക്കും ദീര്ഘിപ്പിക്കാനാകില്ല
പന്ത് പുറത്തേക്ക് പോയാല് ത്രോ ഇന് ചെയ്യണമെങ്കില് അഞ്ച് സെക്കന്ഡ് സമയമേ അനുവദിക്കൂ. അതിനുള്ളില് അത് ചെയ്തില്ലെങ്കില് അനുവദിക്കപ്പെട്ട ത്രോയിന് റഫറിക്ക് പിന്വലിക്കാന് സാധിക്കും. ഇനി ഔട്ടാണെങ്കില് ഗോള് കിക്കെടുക്കാനും ഇത്രയും സമയമേ കാണൂ. അതിന് കഴിഞ്ഞില്ലെങ്കില് എതിരാളികള്ക്ക് കോര്ണര് കിക്ക് അനുവദിക്കും.
സബ്സ്റ്റിറ്റിയൂഷന് ബോര്ഡ് കണ്ടാല് ഉടന് കളം വിട്ടോണം
ഒരു താരത്തെ സബ്സ്റ്റിറ്റിയൂട്ട് ചെയ്യുന്നതിനായി ബോര്ഡ് ഉയര്ത്തിയാല് ആ താരം പത്ത് സെക്കന്ഡിനകം കളം വിടണം. മൈതാനത്തിന്റെ ഏത് ഭാഗത്താണോ നില്ക്കുന്നത് അതിന്റെ അടുത്തുള്ള അതിര്ത്തിയിലൂടെ താരത്തിന് പിന്വാങ്ങാം. നിശ്ചിത സമയത്തിനുള്ളില് ഇറങ്ങിയില്ലെങ്കില് പകരക്കാരന് ഏത് ഹാഫിലാണോ കളി നടക്കുന്നത് അതിന്റെ സ്റ്റോപ്പേജ് സമയത്തേ കളത്തില് പ്രവേശിക്കാനാകൂ.
പരിക്ക്, സുരക്ഷാ പ്രശ്നങ്ങള് എന്നിവയുടെ കാര്യത്തില് ഇളവുകളുണ്ടായിരിക്കും
ഓഫ് ഫീല്ഡ് ട്രീറ്റ്മെന്റ്
മത്സരത്തിനിടെ ഗോളിക്ക് പരിക്കേറ്റാല് പരിചരിക്കാനെത്തുന്നവര് വളരെ വേഗത്തില് ഒരു മിനിറ്റ് നേരത്തേക്ക് മാറി നില്ക്കണം. ഉദാഹരണത്തിന് പെനാല്റ്റി കിക്ക് പോലുള്ള നിര്ണായക ഘട്ടത്തില് മത്സര സമയം അപഹരിക്കപ്പെടാതിരിക്കണമെന്നാണ് അധികൃതര് മുന്നോട്ട് വയ്ക്കുന്ന വാദം.
വാര് പ്രോട്ടോകോള്
വാര് പരിശോധനയ്ക്ക് കൃത്യമായ മാനദണ്ഡങ്ങളുണ്ട്. രണ്ടാം മഞ്ഞകാര്ഡിനെ തുടര്ന്നല്ലാത്ത റെഡ് കാര്ഡുകള്ക്ക് വാര് പരിശോധനയാകാം.
റെഡ് കാര്ഡ് കിട്ടുന്ന താരത്തിന്റെ പിഴവ് എന്തെന്ന് വ്യക്തമാകാന് വാര് പരിശോധനയ്ക്ക് ആവശ്യപ്പെടാം.
കോര്ണര് കിക്ക് അനുവദിച്ചത് ശരിയായ തീരുമാനപ്രകാരമല്ലെന്ന് ഉറപ്പുണ്ടെങ്കില് വാര് പരിശോധനയ്ക്ക് മുതിരാം.
ഫൗള് വിളിച്ചതെന്തുകൊണ്ടെന്നറിയാന് അതേ ഫൗളിന് അനുവദിക്കപ്പെട്ട സെറ്റ്പീസ് കിക്കിന് മുമ്പായി വാര് പരിശോധന നടത്തിയിരിക്കണം
ഓരോ ഹാഫിലും ലഘു ഇടവേള
മത്സരത്തിന്റെ രണ്ട് പകുതികളില് ഓരോന്നിന്റെയും ഇടവേളയില് മൂന്ന് മിനിറ്റ് നേരത്തെ ചെറു ഇടവേളയുണ്ടാകും. മിക്കവാറും മത്സരം തുടങ്ങി 22 മിനിറ്റാകുമ്പോളായിരിക്കും ഈ തീരുമാനം. ഈ സമയത്തിനോടടുത്തു നില്ക്കെ ഏതെങ്കിലും താരത്തിന് പരിക്കേറ്റ് കൂടുതല് സമയം നഷ്ടപ്പെടുന്ന സാഹചര്യമുണ്ടായാല് ആ സമയത്തെ റഫറിക്ക് ലഘു ഇടവേളയാക്കാം.
കോച്ചിനെ കണ്ടുകളയാമെന്ന് വിചാരിക്കേണ്ട
ഗോളിക്ക് പരിക്കേറ്റ് പരിചരണം നല്കുന്നതിനിടെ താരങ്ങള്ക്ക് മൈതനത്തിന് പുറത്തേക്ക് കടക്കുന്നതിന് വിലക്കുണ്ട്. ഈ സമയം കോച്ചുമായി ആശയ വിനിമയം നടത്താമെന്ന തോന്നലുണ്ടെങ്കില് നടക്കില്ല.
