കോഴിക്കോട് : മന്ത്രി ബിന്ദു കൃഷ്ണ എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശനെ സന്ദര്ശിച്ചതിനെ രൂക്ഷമായി വിമര്ശിച്ച് യൂത്ത് ലീഗ് ദേശീയ സെക്രട്ടറി സി കെ ഷാക്കിര്. യുഡിഎഫ് നേതാക്കളെ പുലഭ്യം പറഞ്ഞയാളെ അങ്ങോട്ട് പോയി കണ്ടത് നിഷ്കളങ്കമായി കാണാന് ആകില്ലെന്ന് അദ്ദേഹം ഫേസ്ബുക്കില് കുറിച്ചു.വര്ഗീയ മാലിന്യത്തെ അങ്ങോട്ട് ചെന്ന് ആശ്ലേഷിച്ചത് അത്ര നിസാരമല്ല.ഭരണം വെറുതെ കിട്ടിയതല്ലെന്ന് യൂത്ത് ലീഗ് നേതാവ് ചൂണ്ടിക്കാട്ടുന്നു.
വെള്ളാപ്പള്ളി നടേശന്റെ വീട്ടിലെത്തിയാണ് മന്ത്രി ബിന്ദു കൃഷ്ണ കഴിഞ്ഞ ദിവസം കൂടിക്കാഴ്ച നടത്തിയത്. വെള്ളാപ്പള്ളി നടേശന്റെ മുന്നില് ബിന്ദു കൃഷ്ണ കൈകൂപ്പി നില്ക്കുന്നതും അദ്ദേഹം തലയില് കൈവെച്ച് അനുഗ്രഹിക്കുന്നതുമായ ചിത്രം വെള്ളാപ്പള്ളിയുടെ ഔദ്യോഗിക ഫേസ്ബുക്ക് പേജില് വന്നിരുന്നു. ഇതോടെയാണ് മന്ത്രിക്കെതിരെ വിമര്ശനം ഉയര്ന്നത്. കഴിഞ്ഞ ദിവസം യൂത്ത് കോണ്ഗ്രസ് ജനറല് സെക്രട്ടറി വി പി ദുല്ഖിഫിലും ഈ വിഷയത്തില് ബിന്ദു കൃഷ്ണയെ വിമര്ശിച്ചിരുന്നു.
സികെ ഷാക്കിറിന്റെ ഫേസ്ബുക്ക് പോസ്റ്റ്
ക്ഷീര ദിന ആശംസയില് രക്ഷപ്പെടാമെന്ന് കരുതരുത്, യു.ഡി.എഫിനെയും അതിന്റെ നേതാക്കളെയും പുലഭ്യം പറഞ്ഞു നടന്ന വര്ഗീയ മാലിന്യത്തെ അങ്ങോട്ട് ചെന്ന് ആശ്ലേഷിച്ചത് അത്ര നിസാരവും നിഷ്കളങ്കവുമായി കാണാന് കഴിയില്ല, ഭരണം വെറുതെ കിട്ടിയതല്ല, ഒരുപാട് മനുഷ്യരുടെ ത്യാഗത്തിന്റെയും സഹനത്തിന്റെയും ഫലമാണെന്ന് ഓര്മയുണ്ടാവണം, ശരി കാണാം.
