ആര്എസ്എസ് ശതാബ്ദിയുടെ ഭാഗമായി കൊച്ചി മഹാനഗര് സംഘടിപ്പിച്ച പൗരസംഗമത്തില് പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര് സംസാരിക്കുന്നു. കൊച്ചി മഹാനഗര് സഹ സംഘചാലക് ഡോ. എ. കൃഷ്ണമൂര്ത്തി, ജിഎസ്ടി ഗ്ലോബല് ഡയറക്ടര് സുനില് ബാലകൃഷ്ണന് സമീപം
കൊച്ചി: ഭാരതത്തിന്റെ അന്തസത്തയും വൈചാരിക അടിത്തറയും ഹിന്ദുത്വമാണെന്നും അതില് ഉറച്ചുനിന്നു മാത്രമേ രാഷ്ട്രത്തിന് മുന്നോട്ട് കുതിക്കാനാകൂ എന്നും പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര്. ആര്എസ്എസ് ശതാബ്ദി പ്രവര്ത്തനങ്ങളുടെ ഭാഗമായി കൊച്ചി മഹാനഗര് സംഘടിപ്പിച്ച പൗരസംഗമത്തില് മുഖ്യപ്രഭാഷണം നടത്തുകയായിരുന്നു അദ്ദേഹം.
ആര്എസ്എസ് വാര്ഷികങ്ങളെയോ ജൂബിലികളെയോ ആഘോഷങ്ങളായല്ല കാണുന്നത്. മറിച്ച് ലക്ഷ്യത്തിലേക്കുള്ള പ്രയാണത്തില് എത്ര ദൂരം സഞ്ചരിച്ചു എന്ന് വിലയിരുത്താനുള്ള ഉള്നോട്ടത്തിന്റെ സന്ദര്ഭമായാണ് സംഘടന ഓരോ നാഴികക്കല്ലിനെയും നോക്കിക്കാണുന്നത്. സംഘം ഒരു നൂറ്റാണ്ട് പിന്നിടുമ്പോഴും രാഷ്ട്രത്തിന്റെ പരമവൈഭവമെന്ന ലക്ഷ്യത്തിലേക്ക് നിരന്തരം മുന്നേറിക്കൊണ്ടിരിക്കുകയാണ്. ലക്ഷ്യം പോലെ തന്നെ മാര്ഗവും ശുദ്ധമായിരിക്കണമെന്ന നിര്ബന്ധം ആര്എസ്എസിനുണ്ട്.
സ്വാമി വിവേകാനന്ദന് വിഭാവനം ചെയ്ത വ്യക്തിനിര്മാണത്തിലൂടെയുള്ള സാമൂഹ്യ പരിവര്ത്തനമാണ് സംഘം നിര്വഹിക്കുന്നത്. നമ്മള് ക്ഷീണിതരായതുകൊണ്ടാണ് വിദേശികള്ക്ക് നമ്മെ കീഴ്പ്പെടുത്താന് കഴിഞ്ഞത്. എന്നാല് നമ്മുടെ സംസ്കാരം ശക്തമായിരുന്ന കാലത്ത് വന്ന ശത്രുക്കളെയെല്ലാം ഭാരതം സ്വാംശീകരിച്ചിട്ടുണ്ടെന്ന് കാറല് മാര്ക്സ് പോലും എഴുതിയിട്ടുണ്ടെന്ന് ജെ. നന്ദകുമാര് ചൂണ്ടിക്കാട്ടി. രാഷ്ട്ര നിര്മാണത്തിന്റെ ഈ വലിയ ദൗത്യത്തില് തങ്ങളുടെ മേഖലകളില് പ്രാഗല്ഭ്യം തെളിയിച്ച പ്രമുഖ വ്യക്തികള് ശരീരം കൊണ്ടോ, മനസ് കൊണ്ടോ, സമ്പത്ത് കൊണ്ടോ പങ്കാളികളാകണമെന്നും അദ്ദേഹം പറഞ്ഞു.
യുഎസ്ടി ചീഫ് വാല്യൂസ് ഓഫീസറും ഗ്ലോബല് ഹെഡുമായ സുനില് ബാലകൃഷ്ണന് ചടങ്ങില് മുഖ്യാതിഥിയായി. കൊച്ചി മഹാനഗര് സഹ സംഘചാലക് ഡോ. എ. കൃഷ്ണമൂര്ത്തി അധ്യക്ഷത വഹിച്ചു. എറണാകുളം നഗര് സംഘചാലക് അഡ്വ. ടി. സി. കൃഷ്ണ സ്വാഗതവും മഹാനഗര് സമ്പര്ക്ക പ്രമുഖ് കെ. ജി. രഞ്ജിത്ത് നന്ദിയും പറഞ്ഞു.
