തിരുവനന്തപുരം: ട്രാവല്‍- ട്രേഡ് എക്‌സ്‌പോ ആയ ഗ്ലോബല്‍ ട്രാവല്‍ മാര്‍ക്കറ്റിന്റെ(ജിടിഎം) രണ്ടാംപതിപ്പ് ജൂണ്‍ 3ന് വൈകിട്ട് 5ന് മുഖ്യമന്ത്രി വി.ഡി. സതീശന്‍ കോവളം ഉദയസമുദ്ര ഹോട്ടലില്‍ ഉദ്ഘാടനം ചെയ്യും. ശ്രീലങ്കന്‍ ടൂറിസം സഹമന്ത്രി പ്രൊഫ. റുവാന്‍ രണസിംഗെ, ആന്ധ്ര ടൂറിസം മന്ത്രി കന്ദുല ദുര്‍ഗേഷ് എന്നിവര്‍ വിശിഷ്ടാതിഥികളാകും. കേന്ദ്ര ടൂറിസം ഡയറക്ടര്‍ ജനറല്‍ സുമന്‍ബില്ല മുഖ്യപ്രഭാഷണം നടത്തും.
ഗ്ലോബല്‍ ട്രേഡ് എക്‌സ്‌പോ 4ന് രാവിലെ 10ന് അമരവിള ഗോള്‍ഡന്‍ പാലസ് ഇന്റര്‍ നാഷണല്‍ കണ്‍വെന്‍ഷന്‍ സെന്ററില്‍ ആരംഭിക്കും. മന്ത്രിമാരായ പി.സി. വിഷ്ണുനാഥ്, കെ. മുരളീധരന്‍ ആന്ധ്രാപ്രദേശ് ടൂറിസം മന്ത്രി ദുര്‍ഗേഷ്, എംഎല്‍എമാരായ എന്‍. ശക്തന്‍, സി.കെ. ഹരീന്ദ്രന്‍ തുടങ്ങിയവര്‍ മുഖ്യാതിഥികളാകും. 5ന് വൈകിട്ട് കോവളം വെള്ളാര്‍ കേരള ആര്‍ട്‌സ് ആന്‍ഡ് ക്രാഫ്റ്റ്‌സ് വില്ലേജില്‍ നടക്കുന്ന സമാപനസമ്മേളനം മന്ത്രി സി.പി. ജോണ്‍ ഉദ്ഘാടനം ചെയ്യും. ആയിരത്തിലധികം വിദേശ-ആഭ്യന്തര ബയേഴ്‌സും മുന്നൂറിലധികം ബയേഴ്‌സും ഇരുന്നൂറിലധികം സ്റ്റാളുകളും ജിടിഎമ്മില്‍ ഉണ്ടായിരിക്കും. ജൂണ്‍ 5ന് പൊതുജനങ്ങള്‍ക്ക് പ്രവേശനം അനുവദിക്കും.
സൗത്ത് കേരള ഹോട്ടലിയേഴ്‌സ് ഫോറം, ട്രിവന്‍ഡ്രം ചേംബര്‍ ഓഫ് കൊമേഴ്‌സ് ആന്‍ഡ് ഇന്‍ഡസ്ട്രി, തവസ് വെഞ്ചേഴ്‌സ്, മെട്രോമാര്‍ട്ട് എന്നിവയുടെ സംയുക്താഭിമുഖ്യത്തില്‍ കേരള ടൂറിസത്തിന്റെയും ഇന്ത്യ ടൂറിസത്തിന്റെയും സഹകരണത്തോടെയാണ് പരിപാടി സംഘടിപ്പിക്കുന്നത്. ജൂണ്‍ 3 മുതല്‍ 5 വരെ വിവിധ വേദികളിലായിട്ടാണ് പരിപാടി നടക്കുക. ബിസിനസില്‍ പുതിയ ഉള്‍ക്കാഴ്ചകള്‍ ഉണ്ടാക്കുന്നതിനും വിശാലമായ നെറ്റ് വര്‍ക്കിംഗ് അവസരങ്ങള്‍ നേടുന്നതിനും വ്യവസായ പ്രമുഖരുമായും കോര്‍പ്പറേറ്റുകളുമായുള്ള സഹകരണത്തിനും ജിടിഎം വഴിയൊരുക്കുമെന്നും ജിടിഎം ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
ടിസിസിഐ പ്രസിഡന്റ് എസ്.എന്‍. രഘുചന്ദ്രന്‍നായര്‍, എസ്‌കെഎച്ച്എഫ് പ്രസിഡന്റ് എം.ആര്‍. നാരായണന്‍, സികെടിഐ പ്രസിഡന്റ് ഇ.എം. നജീബ്, എസ്‌കെഎച്ച്എഎഫ് വൈസ്പ്രസിഡന്റ് ശിശുപാലന്‍ സാഗര, രക്ഷാധികാരി പങ്കജ് സേനന്‍, സെക്രട്ടറി പ്രസാദ് മഞ്ഞളി, ജിടിഎം സിഇഒ സിജി നായര്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
