ന്യൂദല്‍ഹി: ഭാരതവും യുഎസും തമ്മിലുള്ള ഇടക്കാല വ്യാപാരക്കരാറിനായുള്ള ചര്‍ച്ചകള്‍ 99 ശതമാനം പൂര്‍ത്തിയായതായും ബാക്കി ഉടന്‍ പരിഹരിക്കുമെന്നും യുഎസ് അംബാസഡര്‍ സെര്‍ജിയോ ഗോര്‍.
ദല്‍ഹി ഐഐടിയില്‍ സംഘടിപ്പിച്ച യുഎസ് ഇന്ത്യ ട്രസ്റ്റ് ഇനീഷ്യേറ്റീവ് എന്ന പരിപാടിയില്‍ സംസാരിക്കവെയാണ് ഇക്കാര്യം വ്യക്തമാക്കിയത്. വരും ആഴ്‌ച്ചകളില്‍ത്തന്നെ ഈ സുപ്രധാന കരാറില്‍ ഇരുരാജ്യങ്ങളും ഒപ്പുവയ്‌ക്കുമെന്ന പ്രതീക്ഷയും അദ്ദേഹം പ്രകടിപ്പിച്ചു.
കരാറിന്റെ തുടര്‍ കാര്യങ്ങള്‍ ചര്‍ച്ചചെയ്യുന്നതിനായി അമേരിക്കന്‍ ചീഫ് ട്രേഡ് നെഗോഷ്യേറ്ററുടെ നേതൃത്വത്തിലുള്ള ഉന്നതതല സംഘം ജൂണ്‍ ഒന്ന് മുതല്‍ നാല് വരെ ഭാരതം സന്ദര്‍ശിക്കുമെന്നും ഗോര്‍ പറഞ്ഞു. കഴിഞ്ഞ ഏപ്രിലില്‍ യുഎസില്‍ നടത്തിയ ചര്‍ച്ചകളുടെ തുടര്‍ച്ചയായാണ് സന്ദര്‍ശനം. വിപണി ലഭ്യത, കസ്റ്റംസ് നടപടിക്രമങ്ങള്‍, താരിഫ് ഇതര തടസങ്ങള്‍, വ്യാപാര സൗകര്യം, സാമ്പത്തിക സുരക്ഷാ സഹകരണം തുടങ്ങിയ നിര്‍ണായക വിഷയങ്ങളിലാണ് നിലവില്‍ ചര്‍ച്ചകള്‍.
കഴിഞ്ഞ രണ്ട് പതിറ്റാണ്ടിനിടെ ഭാരതവും യുഎസും തമ്മിലുള്ള ഉഭയകക്ഷി വ്യാപാരത്തില്‍ വന്‍ വര്‍ദ്ധനവാണ് ഉള്ളത്. സേവന മേഖലകളിലായി 20 ബില്യണ്‍ ഡോളറില്‍ നിന്ന് 220 ബില്യണ്‍ ഡോളറിലെക്കാണ് ഈ വ്യാപാര ബന്ധം വളര്‍ന്നതെന്നും ഗോര്‍ ചൂണ്ടിക്കാട്ടി.
