ലിവര്പൂള്: ഇംഗ്ലീഷ് പ്രീമിയര് ലീഗ് വമ്പന്മാരായ ലിവര്പൂള് എഫ്സി കോച്ച് ആര്നെ സ്ലോട്ടിനെ പുറത്താക്കി. സീസണില് ടീമിന്റെ നിറം മങ്ങിയ പ്രകടനത്തിന് പിന്നാലെയാണ് ലിവര് മാനേജ്മെന്റിന്റെ കടുത്ത തീരുമാനം.
വര്ഷങ്ങള്ക്ക് ശേഷം ഒരു കിരീടം പോലും ഇല്ലാതെയാണ് ലിവര്പൂള് ഈ സീസണ് അവസാനിച്ചിരിക്കുന്നത്. പ്രീമിയര് ലീഗില്പോലും അഞ്ചാം സ്ഥാനക്കാരായി കടന്നുകൂടുകയായിരുന്നു.
പ്രീമിയര് ലീഗ് ജേതാക്കളായ ആഴ്സണലിനെക്കാള് 25 പോയിന്റ് പിന്നിലാണ് ലിവര്. സമീപ കാലത്ത് ഇത്രയും വലിയ തിരിച്ചടി ടീമിനുണ്ടായിട്ടില്ല. കൂടാതെ യുവേഫ ചാമ്പ്യന്സ് ലീഗ് ക്വാര്ട്ടറില് പരാജയപ്പെട്ട് പുറത്തായി. എഫ് എ കപ്പിലും ക്വാര്ട്ടര് വരെയാണ് മുന്നേറിയത്. ഇഎഫ്എല് കപ്പിന്റെ നാലാം റൗണ്ടില് പരാജയപ്പെട്ടു. കഴിഞ്ഞ സീസണില് ക്ലബ്ബ് 450 കോടി പൗണ്ട് മുടക്കിയ ശേഷമാണ് ഇത്രയും നിറം കെട്ട പ്രകടനങ്ങളുണ്ടായിട്ടുള്ളത്. ഇക്കാരണത്താല് ക്ലബ്ബ് സമൂലമായൊരു മാറ്റമാണ് ഉദ്ദേശിക്കുന്നതെന്ന് ക്ലബ്ബ് വിശദീകരിച്ചു.
സൂപ്പര് താരം മുഹമ്മദ് സലായുമായുള്ള പ്രശ്നങ്ങള് പരിഹരിച്ച് ഇണങ്ങിചേരാനും കോച്ച് സ്ലോട്ടിന് സാധിച്ചില്ലെന്ന് മാനേജ്മെന്റ് നടത്തിയ വിശദീകരണത്തിലുണ്ട്. ടീമിന്റെ കളി ശൈലി പാടേ മാറിയിരിക്കുന്നു. മുന്പൊക്കെ ഒരു ഹെവിവെയ്റ്റ് മുന്നേറ്റത്തിലൂടെ എതിരാളുകള്ക്കുമേല് വലിയ ആധിപത്യം പൂലര്ത്തുന്ന രീതിയായിരുന്നുവെന്ന് സലാ അഭിപ്രായപ്പെട്ടിരുന്നു. ഇതേ തുടര്ന്ന് കോച്ചും സൂപ്പര് താരവും തമ്മില് അഭിപ്രായ വ്യത്യാസങ്ങളും ഉണ്ടായിരുന്നു. സീസണ് അവസാനിക്കുന്നതോടെ ക്ലബ്ബ് വിട്ടുപോകുമെന്ന് സലാ മാസങ്ങള്ക്ക് മുമ്പേ തീരുമാനവുമെടുത്തതും സ്ലോട്ടിന് തിരിച്ചടിയായി.
