കോട്ടയം: സിഎംആര്എല് മാസപ്പടിക്കേസില് ഇന്നലെ നടന്ന ഇ ഡി റെയ്ഡ് വലിയ ഒരു മഞ്ഞുമലയുടെ അരികിലേക്കുള്ള എത്തല് മാത്രമാണെന്ന് നിയമ പോരാട്ടങ്ങള്ക്ക് തുടക്കം കുറിച്ച ബിജെപി സംസ്ഥാന ഉപാദ്ധ്യക്ഷന് അഡ്വ. ഷോണ് ജോര്ജ്.
ഹൈക്കോടതിയുടെ തടസം മാറിയതോടെ എസ്എഫ്ഐഒ, ഇ ഡി അന്വേഷണങ്ങള് മികച്ച രീതിയില് പുനരാരംഭിച്ചിരിക്കുകയാണ്. സിഎംആര്എല് മാസപ്പടി വലിയ സാമ്പത്തിക ഇടപാടാണ്. ഇതില് സിപിഎം പോളിറ്റ് ബ്യൂറോ അംഗമായ പിണറായി വിജയനും, മകള് വീണാ വിജയനും ഒരുപോലെ കുറ്റക്കാരാണ്. അതുകൊണ്ടുതന്നെ പിണറായിയും മകളും അറസ്റ്റിലാവുമെന്നാണ് വിശ്വാസമെന്നും ഷോണ് ജോര്ജ് പറഞ്ഞു.
കേരളത്തിന്റെ തീരദേശ മേഖലകളില് നിന്നും ആണവ അവശിഷ്ടങ്ങള് അടക്കമുള്ള വിലയേറിയ ധാതുമണല് നിയമവിരുദ്ധമായി ഖനനം ചെയ്യുന്നതിനും അത് കടത്തുന്നതിനും പിന്നില് വലിയ അഴിമതികള് നടന്നിട്ടുണ്ട്. ഈ അനധികൃത ഖനന പ്രവര്ത്തനങ്ങള്ക്ക് സഹായം നല്കിയതിന് പകരമായി വലിയ തുകയും കൈപ്പറ്റിയിട്ടുണ്ട്. വീണാ വിജയന്റെ എക്സാലോജിക് കമ്പനിയുടെ ബാങ്ക് അക്കൗണ്ടുകള് വഴിയാണ് ഇത് നടന്നിരിക്കുന്നത്.
തന്റെ പരാതിയുടെ അടിസ്ഥാനത്തില് കേന്ദ്ര അന്വേഷണ ഏജന്സിയായ എസ്എഫ്ഐഒ ഇതിനകം തന്നെ കോടതിയില് കുറ്റപത്രം സമര്പ്പിച്ചിട്ടുണ്ട്. ഈ കേസില് വീണാ വിജയന് മൂന്നാം പ്രതിയാണ്. പ്രിവന്ഷന് ഓഫ് മണി ലോണ്ടറിംഗ് ആക്ട് പ്രകാരമുള്ള കള്ളപ്പണം വെളുപ്പിക്കല്, അനധികൃത സാമ്പത്തിക ഇടപാടുകള് എന്നിവയാണ് വീണക്കെതിരെ ചുമത്തിയിരിക്കുന്നത്.
പിണറായി വിജയനും മകള്ക്കുമെതിരെ ശക്തമായ അന്വേഷണം ആവശ്യപ്പെട്ട് ഇ ഡി ക്കും പരാതി നല്കിയിരുന്നു. കഴിഞ്ഞ രണ്ട് വര്ഷമായി അധികാരം ഉപയോഗിച്ച് നിയമ പോരാട്ടത്തെ അട്ടിമറിക്കാനുള്ള ശ്രമങ്ങളാണ് നടന്നത്. സിഎംആര്എല്ലിന്റെ ഹര്ജി ഹൈക്കോടതി തള്ളിയതോടെ ഇ ഡി ക്ക് സ്വതന്ത്രവും ശക്തവുമായി മുന്നോട്ടുപോകാം. അതുകൊണ്ടു തന്നെ പിണറായി വിജയന്റെയും വീണാ വിജയന്റെയും അറസ്റ്റ് അനിവാര്യമാണ്. അതുകൊണ്ടു തന്നെ എന്തൊക്കെ പ്രതിബന്ധങ്ങളുണ്ടായാലും നീയമ നടപടികളുമായി മുന്നോട്ട് പോകുമെന്നും ഷോണ് ജോര്ജ് വ്യക്തമാക്കി.
