ആദിത്യ ദശാകാലം ആറുവര്ഷമാണ്. ഇഷ്ടസ്ഥാനസ്ഥിതനാണ് ആദിത്യനെങ്കില് ദശാകാലം ശോഭനമായിരിക്കും. ആദിത്യന് അനിഷ്ടനായാല് ദശാകാലം ദുരിതപ്രദമായിരിക്കും. ‘ആദിത്യനില് അലയാത്തവരില്ല’ എന്ന ചൊല്ല് പ്രസിദ്ധമാണല്ലോ. ഇഷ്ടഭാവസ്ഥിതനായി നില്ക്കുന്ന ആദിത്യന്റെ ദശാകാലത്ത് വിദ്യാര്ത്ഥികള്ക്ക് ഉന്നത വിജയം, യുവാക്കള്ക്ക് ഉദ്യോഗലാഭം, ധനലാഭം, ദമ്പതികള്ക്ക് സന്താനലാഭം എന്നിവയൊക്കെ ഉണ്ടാകും. ആദിത്യന് അനിഷ്ടനായാല് രോഗദുരിതങ്ങള്, വര്ദ്ധിച്ച പണച്ചെലവ്, കര്മ്മരംഗത്ത് പ്രശ്നങ്ങള്, പിതാവിന് അനാരോഗ്യമോ മറ്റ് ദുരിതാനുഭവങ്ങളോ ഒക്കെയാവും ഫലം.
ആദിത്യന് നില്ക്കുന്നത് ലഗ്നത്തിലാണെങ്കില് ദശാകാലം ക്ളേശകരമായിരിക്കും. പക്ഷേ ലഗ്നാധിപനായി ഭവിച്ച് ആദിത്യന് ലഗ്നത്തില് നിന്നാല് (ചിങ്ങ ലഗ്നത്തില്) ദശാകാലം അത്യന്തം ശോഭനകരമായിരിക്കും. രണ്ടാമിടത്താണ് ആദിത്യനെങ്കില് ധനപരമായ ക്ളേശങ്ങളും ദാമ്പത്യകലഹങ്ങളും ഉണ്ടാകും. മൂന്നാമിടത്തു നില്ക്കുന്ന ആദിത്യന്റെ ദശാകാലം എല്ലാ പ്രകാരത്തിലും ശോഭനകരമായിരിക്കും. നാലാമിടത്തുനില്ക്കുന്ന സൂര്യന്റെ ദശാകാലത്ത് മാതാവിന് ദുരിതാനുഭവങ്ങള്, ധനനാശം, കുടുംബകലഹം ഇവ ഫലമാകുന്നു. അഞ്ചാമിടത്തു നില്ക്കുന്ന ആദിത്യന്റെ ദശാകാലത്ത് ഉദ്യോഗത്തില് പലവിധ പ്രശ്നങ്ങളും തദ്വാരാ മനോവിഷമതകളും ഉണ്ടാകും.
ആറാമിടത്ത് നില്ക്കുന്ന ആദിത്യന്റെ ദശാകാലം അലച്ചിലും ദുഃഖദുരിതങ്ങളും നിറഞ്ഞതാവും. ഏഴാമിടത്തുനില്ക്കുന്ന ആദിത്യന്റെ ദശാകാലവും ശോഭനകരമായിരിക്കില്ല. എട്ടാമിടത്താണ് ആദിത്യനെങ്കില് ദശാകാലത്ത് രോഗാദിദുരിതക്ളേശങ്ങള് മൂലം മനഃസമാധാനം കുറയും. ഒന്പതാമിടത്തു നില്ക്കുന്ന ആദിത്യന്റെ ദശാകാലത്ത് ഭാഗ്യാനുഭവങ്ങള് തടസ്സപ്പെടും. പിതാവിന് അപകടങ്ങള് ഉണ്ടാവാം. സര്ക്കാരില് നിന്നുള്ള നടപടികള് നേരിടേണ്ടതായും വരാം. ആദിത്യന് നില്ക്കുന്നത് പത്താമിടത്തോ, പതിനൊന്നാമിടത്തോ ആണെങ്കില് ദശാകാലം അത്യന്തം ശോഭനകരമായിരിക്കും.
ഉദ്യോഗത്തിലുയര്ച്ച, ധനപരമായ ഉന്നതി, കുടുംബസൗഖ്യം, കേസുകളില് അനുകൂല വിധി ഇവയൊക്കെ ഉണ്ടാകും. എന്നാല് തുലാം രാശി പത്താമിടമോ, പതിനൊന്നാമിടമോ ആയി അവിടെയാണ് ആദിത്യന് നില്ക്കുന്നതെങ്കില് ശുഭാനുഭവങ്ങള് ഒന്നുംതന്നെ ലഭിച്ചു എന്നുവരില്ല. തുലാം ആദിത്യന്റെ നീചരാശിയായതാണ് കാരണം. ആദിത്യന് നില്ക്കുന്നത് പന്ത്രണ്ടാമിടത്താണെങ്കില് ദശാകാലം പലവിധത്തില് ദോഷപ്രദമായിരിക്കും. ധനക്ളേശാദികള്, കുടുംബകലഹം, നേത്രരോഗം, പിതാവിന് ദുരിതാനുഭവങ്ങള് ഇവയൊക്കെ ഉണ്ടാവാം.
