ലക്നൗ : ബജ്രംഗ് ദളുമായി ഏറ്റുമുട്ടിയ സമയത്ത് തന്നെ പുകഴ്ത്താൻ ആളുണ്ടായിരുന്നുവെന്നും എന്നാൽ ഇപ്പോൾ സാമ്പത്തികമായി ബുദ്ധിമുട്ടുന്ന അവസരത്തിൽ ഒപ്പം നിൽക്കാൻ ആരുമില്ലെന്നും മുഹമ്മദ് ദീപക്ക് . തന്റെ ജിം സെന്റർ നിൽക്കുന്ന കെട്ടിടം ഒഴിയാൻ ഉടമ ആവശ്യപ്പെട്ടത് മുസ്ലീങ്ങളോട് ഐക്യദാർഢ്യം പ്രകടിപ്പിച്ചതിനാലാണ് എന്നാണ് ദീപക്കിന്റെ ആരോപണം .
കോട്ദ്വാറിൽ, ബജ്റംഗ്ദൾ അംഗങ്ങൾ മുസ്ലീം കടയുടമയോട് കടയുടെ പേരിൽ നിന്ന് ‘ബാബ’ എന്ന വാക്ക് നീക്കം ചെയ്യാൻ ആവശ്യപ്പെട്ടിരുന്നു. ഇതിനിടെ സമീപത്ത് ജിം നടത്തിയിരുന്ന ദീപക് കുമാർ ഈ പ്രശ്നത്തിൽ ഇടപെട്ട് മുസ്ലീം കടയുടമയുടെ പക്ഷം ചേർന്ന് ബജ്രംഗ് ദളുമായി ഏറ്റുമുട്ടുകയായിരുന്നു.
ഇതിനു പിന്നാലെ രാഹുൽ ഗാന്ധി , മുൻ ഉത്തരാഖണ്ഡ് മുഖ്യമന്ത്രി ഹരീഷ് റാവത്ത്, ബോളിവുഡ് നടി സ്വര ഭാസ്കർ, ആക്ടിവിസ്റ്റ് ഹർഷ് മന്ദർ തുടങ്ങിയ പ്രമുഖരും ദീപക്കിനെ പ്രശംസിക്കുകയും പിന്തുണ അറിയിക്കുകയും ചെയ്തുകൊണ്ട് സോഷ്യൽ മീഡിയയിൽ എത്തി.
ദീപക്കിന്റെ ജിമ്മിൽ അംഗത്വം വാങ്ങാൻ അവരെല്ലാം പൊതുജനങ്ങളോട് അഭ്യർത്ഥിച്ചു. സുപ്രീം കോടതിയിലെ 15 മുതിർന്ന അഭിഭാഷകർ ഓരോരുത്തരും അദ്ദേഹത്തിന്റെ ജിമ്മിൽ വാർഷിക അംഗത്വത്തിനായി ₹10,000 വീതം സംഭാവന നൽകി. അംഗത്വത്തിനായി സിപിഎം എംപി ജോൺ ബ്രിട്ടാസും നേരിട്ട് ജിം സന്ദർശിച്ചു. ചുരുക്കത്തിൽ, ദീപക്കിന് ഒരു സാമ്പത്തിക ബുദ്ധിമുട്ടും നേരിടേണ്ടിവരില്ലെന്ന് ഉറപ്പാക്കി.
ഇതിനിടെ ഹിന്ദുക്കളെ ഇകഴ്ത്താനും ഇടതുപക്ഷക്കാരുടെ കൈയടി നേടാനുമുള്ള ശ്രമത്തിൽ ദീപക് കുമാർ ‘മുഹമ്മദ് ദീപക്’ എന്ന പേര് സ്വീകരിച്ചു. ‘മുഹമ്മദ്’ എന്ന പേരിന് അപാരമായ ശക്തിയുണ്ടെന്ന് അദ്ദേഹം സോഷ്യൽ മീഡിയയിൽ അവകാശപ്പെട്ടു. എന്നാൽ ഇപ്പോൾ ആ മുസ്ലീം സമൂഹം പോലും കഷ്ടകാലത്ത് തന്നോടൊപ്പം ഇല്ലെന്നതാണ് ദീപക്കിന്റെ സങ്കടം.
വാടക നൽകാനാകാതെ ജിം പൂട്ടാൻ ഉടമ ആവശ്യപ്പെട്ടിട്ടും ദീപക്കിനെ സഹായിച്ച് സാമ്പത്തിക സഹായം വാഗ്ദാനം ചെയ്യാൻ ഒരു പ്രാദേശിക മുസ്ലീം സംഘടനയോ വ്യക്തിയോ മുന്നോട്ട് വന്നിട്ടില്ല.
