ഷിര്ദ്ദി: മഹാരാഷ്ട്രയിലെ അഹല്യ നഗറില് സ്ഥിതി ചെയ്യുന്ന ഷിര്ദ്ദി, ഷിര്ദ്ദി സായിബാബയുടെ പേരില് അറിയപ്പെടുന്ന നഗരമാണ്. ഷിര്ദ്ദി സായിബാബ ക്ഷേത്രം ഉള്പ്പെടെ നിരവധി ക്ഷേത്രങ്ങളും ഇവിടെയുണ്ട്.
ഇപ്പോള് ഈ ഷിര്ദ്ദിയില് ഇന്ത്യ പ്രതിരോധ രംഗത്ത് പുതിയ വന്ചുവടുവെയ്പ് നടത്തുകയാണ്. ഇവിടെ ഒരു വലിയ പ്രതിരോധനിര്മ്മാണ സമുച്ചയം ഉയര്ന്നുവരുന്നു. വിശ്വാസത്തിന്റെയും ആത്മീയതയുടെയും കേന്ദ്രമായി വ്യാപകമായി അറിയപ്പെടുന്ന ഷിർദി, ഇനി ഇന്ത്യയുടെ പ്രതിരോധ നിര്മ്മാണ നവീകരണ കേന്ദ്രമായി ഉയര്ന്നുവരുമെന്ന് സംയുക്തസേനാമേധാവി അനിൽ ചൗഹാൻ. ഷിര്ദ്ദിയില് ഉയരുന്ന നിബെ (എൻഐബിഇ) പ്രതിരോധ നിർമ്മാണ സമുച്ചയത്തിന്റെ ഉദ്ഘാടനത്തോടെ പ്രതിരോധ നിർമ്മാണ, സാങ്കേതിക കണ്ടുപിടുത്തങ്ങൾ, ദേശീയ സുരക്ഷ എന്നിവയുടെ കേന്ദ്രമായും ഉയർന്നുവരുമെന്ന് ചീഫ് ഓഫ് ഡിഫൻസ് സ്റ്റാഫ് (സിഡിഎസ്) ജനറൽ അനിൽ ചൗഹാൻ ശനിയാഴ്ച പറഞ്ഞു.
ഷിര്ദ്ദി ഇനി വിശ്വാസത്തിന്റെയും പ്രതിരോധത്തിന്റെ അത്ഭുതകരമായ സംഗമഭൂമി
പ്രതിരോധ മേഖലയിൽ സ്വയംപര്യാപ്തത കൈവരിക്കുക എന്ന ഇന്ത്യയുടെ ദൗത്യത്തിലേക്കുള്ള ഒരു സുപ്രധാന ചുവടുവയ്പ്പാണ് ഈ പ്രതിരോധകേന്ദ്രം പ്രതിനിധീകരിക്കുന്നതെന്ന് ഉദ്ഘാടന ചടങ്ങിൽ സദസ്സിനെ അഭിസംബോധന ചെയ്തുകൊണ്ട് ജനറൽ ചൗഹാൻ പറഞ്ഞു.
“രാജ്യമെമ്പാടും വിശ്വാസത്തിനും ആത്മീയതയ്ക്കും പേരുകേട്ടതാണ് ഷിർദി നഗരം. എന്നാൽ ഇന്ന് മുതൽ, ഈ നഗരം പ്രതിരോധ നിർമ്മാണം, ദേശീയ സുരക്ഷ എന്നിവയുടെ കേന്ദ്രമായും അറിയപ്പെടും. ഇത് യഥാർത്ഥത്തിൽ വിശ്വാസത്തിന്റെയും ഭാവി സാങ്കേതികവിദ്യയുടെയും അത്ഭുതകരമായ സംഗമമാണ്,” സിഡിഎസ് പറഞ്ഞു.
ഇനി യുദ്ധം മനുഷ്യശക്തിയുടെ പ്രകടനമല്ല, എഐയും റോബോട്ടിക്സും ഉള്പ്പെടെ പുതുമുഖങ്ങളുള്ള പ്രക്രിയ
ആധുനിക യുദ്ധം അതിവേഗം വികസിച്ചുകൊണ്ടിരിക്കുകയാണെന്നും ഇനി മനുഷ്യശക്തിയെയും പരമ്പരാഗത ബുദ്ധിശക്തിയെയും മാത്രം ആശ്രയിക്കുന്നില്ലെന്നും അദ്ദേഹം ഊന്നിപ്പറഞ്ഞു. “ആർട്ടിഫിഷ്യൽ ഇന്റലിജൻസ്, റോബോട്ടിക്സ്, സൈബർ സിസ്റ്റങ്ങൾ, ഡ്രോണുകൾ, സ്വയംഭരണ പ്ലാറ്റ്ഫോമുകൾ, ബഹിരാകാശ സാങ്കേതികവിദ്യകൾ, കൃത്യതയുള്ള സ്ട്രൈക്ക് ആയുധങ്ങൾ, വിവര ആധിപത്യം എന്നിവ ഭാവിയിലെ യുദ്ധക്കളത്തിന് നിർണായക രൂപം നൽകുന്നു,”- അദ്ദേഹം പറഞ്ഞു.
ഭാവിയില് യുദ്ധം ഒരേ സമയം പല മേഖലകളില്
ചൗഹാന്റെ അഭിപ്രായത്തിൽ, ഭാവിയിലെ യുദ്ധങ്ങള് പ്രകൃതിയിൽ ഒരേ സമയം പല മേഖലകളില് നടക്കുന്ന ഒന്നായിരിക്കും. കര, കടൽ, വായു, സൈബർ, ബഹിരാകാശം, വൈജ്ഞാനിക യുദ്ധ മേഖലകൾ എന്നിവയിലുടനീളമുള്ള ഏകോപിത പ്രവർത്തനങ്ങൾ ഇതിൽ ഉൾപ്പെടും. “ഇന്നത്തെ യുദ്ധക്കളം ഇനി ഒരു ഭൂമിശാസ്ത്രപരമായ സ്ഥലത്ത് മാത്രമായി പരിമിതപ്പെടുത്തില്ല, മറിച്ച് വിവര ശൃംഖലകൾ, ഡിജിറ്റൽ ആവാസവ്യവസ്ഥകൾ, സൈബർ അടിസ്ഥാന സൗകര്യങ്ങൾ, ഡാറ്റ പരിസ്ഥിതികൾ എന്നിവയും ഈ യുദ്ധക്കളത്തിന്റെ ഭാഗമാകും,” അദ്ദേഹം കൂട്ടിച്ചേർത്തു.
പ്രതിരോധ ഉൽപ്പാദനത്തിൽ ഇന്ത്യയുടെ പുരോഗതി എടുത്തുകാണിച്ചുകൊണ്ട്, ആഭ്യന്തര പ്രതിരോധ ഉൽപ്പാദനം ഏകദേശം 1.27 ലക്ഷം കോടി രൂപയുടെ റെക്കോർഡ് നിലയിലെത്തിയെന്നും പ്രതിരോധ കയറ്റുമതി 38,000 കോടി രൂപ കവിഞ്ഞെന്നും ഇന്ത്യൻ പ്രതിരോധ ഉൽപ്പന്നങ്ങൾ ഇപ്പോൾ 100-ലധികം രാജ്യങ്ങളിലെത്തിയെന്നും സിഡിഎസ് പറഞ്ഞു. മിസൈൽ സംവിധാനങ്ങൾ, വെടിമരുന്ന്, സ്വയംഭരണ പ്ലാറ്റ്ഫോമുകൾ, ഉയർന്നുവരുന്ന സാങ്കേതികവിദ്യകൾ എന്നിവയിലെ പ്രവർത്തനങ്ങളെ ഉദ്ധരിച്ച്, ഇന്ത്യയുടെ സ്വകാര്യ പ്രതിരോധ മേഖലയിൽ വളരുന്ന ആത്മവിശ്വാസത്തിന്റെ “മികച്ച ഉദാഹരണം” നിബെ ലിമിറ്റഡിനെ അദ്ദേഹം വിശേഷിപ്പിച്ചു.
വര്ഷത്തില് അഞ്ച് ലക്ഷം പീരങ്കി ഷെല്ലുകള് ഉല്പാദിപ്പിക്കാന് പോകുന്ന നൈബ് ലിമിറ്റഡ് 200 ഏക്കറിലൊരുങ്ങുന്ന കൂറ്റന്നിര്മ്മാണകേന്ദ്രം
നൈബ് എന്ന സ്വകാര്യമേഖലാ കമ്പനി പ്രതിരോധരംഗത്ത് സര്ക്കാരിന്റെ ദൗത്യങ്ങളെ വന്തോതില് പിന്തുണയ്ക്കാനൊരുങ്ങുകയാണ്. 200 ഏക്കറിലാണ് ഈ പ്രതിരോധ നിര്മ്മാണ കേന്ദ്രം ഉയരുന്നത്. 3000 കോടി രൂപയുടെ പദ്ധതിയാണിത്. വര്ഷം തോറും അഞ്ച് ലക്ഷം പീരങ്കിഷെല്ലുകള് ഇവിടെ നിര്മ്മിക്കാനാവും. ഇവിടെ ടിഎന്ടി, ആര്ഡിഎക്സ് ഉല്പാദന കോംപ്ലക്സുകള് വേറെയുണ്ട്. റോക്കറ്റുകളും ഡ്രോണുകളും ഇവിടെ നിര്മ്മിക്കും. പതുങ്ങിയിരുന്ന ആക്രമിക്കുന്ന ലോയിറ്ററിംഗ് മ്യൂനിഷനുകളും നിര്മ്മിക്കും.
ഉദ്ഘാടനച്ചടങ്ങ് ദിവസം തന്നെ ഇവിടെ നിര്മ്മിച്ച 300 കിലോമീറ്റര് ദൂരപരിധിയുള്ള സൂര്യാസ്ത്ര റോക്കറ്റുകള് പ്രദര്ശിപ്പിച്ചിരുന്നു. 3000 പേര്ക്ക് നേരിട്ടും നിരവധി പേര്ക്ക് പരോക്ഷമായും ഇവിടെ ജോലി നല്കും.
സര്ക്കാര് സ്ഥാപനങ്ങള്, സ്വകാര്യസ്ഥാപനങ്ങള്, സ്റ്റാര്ട്ടപ്പുകള്, ഐഐടി പോലുള്ള ഗവേഷണ വിദ്യാഭ്യാസസ്ഥാപനങ്ങള് എന്നിവയെ സംയോജിപ്പിച്ചുകൊണ്ടാണ് മോദി സര്ക്കാരിന്റെ പ്രതിരോധ-ഗവേഷണ മേഖല കുതിച്ചുചാട്ടം നടത്തുന്നത്. ടാറ്റ, അദാനി, മഹീന്ദ്ര, എല് ആന്റ് ടി മുതല് നൂറായിരം ചെറുകിട-ഇടത്തരം കമ്പനികള് വരെ എച്ച് എഎല്, ഡിആര്ഡിഒ, ഭാരത് ഡൈനാമിക്സ് തുടങ്ങിയ പൊതുമേഖലാസ്ഥാപനത്തോടൊപ്പം തോളോട് തോള് ചേര്ന്ന് നിന്നതോടെയാണ് അതിവേഗം ഇന്ത്യയ്ക്ക് ആധുനിക ആയുധസാങ്കേതികവിദ്യകളും തദ്ദേശീയ ഉല്പാദനശേഷിയും പ്രതിരോധരംഗത്ത് ആര്ജ്ജിക്കാനായത്.
