മയാമി: അമേരിക്കന് മേജര് ലീഗ് സോക്കര്(എംഎല്എസ്) മത്സരത്തിനിടെ ഇന്റര് മയാമിക്ക് വേണ്ടി കളിക്കുന്ന അര്ജന്റീന സൂപ്പര് താരം ലയണല് മെസി പരിക്ക് കാരണം മത്സരത്തിനിടയ്ക്ക് വച്ച് പിന്മാറി. മയാമി-ഫിലാഡെല്ഫിയ പോരാട്ടത്തിന്റെ 73-ാം മിനിറ്റിലാണ് താരം കളം വിട്ടത്.
ലോകകപ്പ് ഫുട്ബോള് 2026നുള്ള അര്ജന്റീന ടീമിനെ പരിശീലകന് ലയണല് സ്കലോനി അടുത്തയാഴ്ച്ചയോടെ പ്രഖ്യാപിക്കാനിരിക്കെയാണ് ഈ സംഭവം. ലോകകപ്പ് ഫുട്ബോളിന് ഇനി 16 ദിവസം മാത്രമാണുള്ളത്. അന്തിമ ടീമില് സൂപ്പര് താരം കളിക്കുമോയെന്ന് ഇതുവരെ തീര്ച്ചപ്പെടുത്തിയിട്ടില്ല. അതിന് മുന്നോടിയായാണ് മെസി ആരാധകരെ ആശങ്കയിലാഴ്ത്തി പരിക്ക് പിടികൂടിയിരിക്കുന്നത്. മത്സരത്തിനിടെ കാലിലെ പേശി വലിവാണ് പ്രശ്നമായത്. മയാമിയില് നടന്ന കളിക്കിടെ ഇടത് കാല് തുടയുടെ പുറകുവശത്തായാണ് പേശി വലിവ് അനുഭവപ്പെട്ടത്. തുടര്ന്ന് സബ്സ്റ്റിറ്റിയൂട്ടിനെ ഇറക്കണമെന്ന് ആവശ്യപ്പെട്ട് താരം കളം വിട്ടത് നടന്നുകൊണ്ടാണ്. മത്സരത്തിന് മുമ്പ് കാലിന് ചില ബുദ്ധിമുട്ടുകളുള്ളതായി മയാമി കോച്ച് ഗില്ലര്മോ ഹോയോസിനെ അറിയിച്ചിരുന്നു. തണുപ്പ് കാരണം നനഞ്ഞ ടര്ഫുള്ള മയാമിയിലെ മൈതാനത്ത് ഈ അവസ്ഥയില് കളിക്കുക കൂടുതല് ദുഷ്കരമായരിക്കുമെന്ന് കോച്ച് സൂചിപ്പിച്ചിരുന്നതായി പറയുന്നു. എങ്കിലും മത്സരത്തില് നിന്നും പിന്മാറാന് കഴിയുന്നില്ലെന്ന് അറിയിച്ചുകൊണ്ട് മെസി പ്ലേയിങ് ഇലവനില് ഇറങ്ങുകയായിരുന്നു.
നിലവിലെ ജേതാക്കളായ അര്ജന്റീനയുടെ വരും ലോകകപ്പില് മെസി കളിക്കുമോയെന്ന കാര്യത്തില് ഇതുവരെ യാതൊരു ഉറപ്പും ഉണ്ടായിട്ടില്ല. ഇതു സംബന്ധിച്ച് അടുത്തകാലത്തായി യാതൊരു സൂചനകളും നല്കിയിട്ടുമില്ല. മെസി കളിക്കുകയാണെങ്കില് താരത്തിന്റെ ആറാം ലോകകപ്പ് ആയിരിക്കും ഇത്. 2006ലെ ജര്മന് ലോകകപ്പില് ചില മത്സരങ്ങളില് സബ്സ്റ്റിറ്റിയൂട്ട് ആയി ഇറങ്ങിക്കൊണ്ടാണ് മെസി ലോകകപ്പ് ഫുട്ബോളില് അരങ്ങേറ്റം കുറിച്ചത്.
