ബെര്ലിന്: സൂപ്പര് താരം ഹാരി കെയ്ന് നേടിയ ഹാട്രിക് ഗോളില് ബയേണ് മ്യൂണിക് ജെര്മന് കപ്പ് ജേതാക്കളായി. നിലവിലെ ജേതാക്കളായ വിഎഫ്ബി സ്റ്റുട്ട്ഗാര്ട്ടിനെ 3-0ന് തോല്പ്പിച്ചായിരുന്നു കിരീട നേട്ടം.
ആദ്യപകുതിയില് ഇരു ടീമുകളും ഒപ്പത്തിനൊപ്പം നിന്നു. ഗോള് മാത്രം വീണില്ല. രണ്ടാം പകുതിയില് ബയേണ് അല്പ്പം മേല്ക്കൈ നേടി. ഇത് ടീമിന്റെ ഗോള് നേട്ടത്തിനും കാരണമായി. 54-ാം മിനിറ്റില് ഹാരി കെയ്ന് ആദ്യ ഗോള് നേടി. മൈക്കല് ഒലീസെയുടെ അസിസ്റ്റിലായിരുന്നു ഈ ഗോള്. 79-ാം മിനിറ്റില് ഹാരി കെയന് വീണ്ടും സ്കോര് ചെയ്തു. ഇക്കുറി ലൂയിസ് ഡിയാസ് ആണ് ഗോളിലേക്കുള്ള പാസ് നല്കിയത്. മത്സരം ഇന്ജുറി ടൈമിലേക്ക് കടന്ന അവസരത്തില് സ്റ്റുട്ട്ഗാര്ട്ട് താരത്തിന് ബോക്സിനകത്ത് ഹാന്ഡ് ബോള് വഴങ്ങേണ്ടിവന്നതിനാല് ബയേണിന് പെനാല്റ്റി അനുവദിക്കപ്പെട്ടു. കിക്കെടുത്ത ഹാരി കെയ്നും സഹതാരങ്ങളും ആഘോഷ തിമിര്പ്പിലായി. ഹാട്രിക് ഗോളോടെ ഹാരി കെയ്ന് ബയേണിന് ജര്മന് കിരീടം സമ്മാനിച്ചു. ആറ് വര്ഷത്തെ ഇടവേളയ്ക്ക് ശേഷമാണ് ബയേണ് ജര്മന് കപ്പില് മുത്തമിടുന്നത്. ടീമിന്റെ 21-ാം കിരീട നേട്ടമാണിത്.
