ലണ്ടന്‍: ഫിഫ ലോകകപ്പ് 2026നുള്ള ഇംഗ്ലണ്ട് ഫുട്‌ബോള്‍ ടീമിനെ പരിശീലകന്‍ തോമസ് ടുഷേല്‍ പ്രഖ്യാപിച്ചു. 26 അംഗ ടീമില്‍ ഉറപ്പായും ഉള്‍പ്പെടുമെന്ന് കരുതിയ പത്തോളം സൂപ്പര്‍ താരങ്ങളെ ഒഴിവാക്കി വലിയൊരു അഗ്നി പരീക്ഷയ്‌ക്കാണ് ടുഷേല്‍ ഒരുങ്ങുന്നത്. ഫില്‍ ഫോഡന്‍, ഹാരി മഗ്വേര്‍, ട്രെന്റ് അലെക്‌സാണ്ടര്‍ അര്‍ണോള്‍ഡ് എന്നിവര്‍ ടുഷേല്‍ ഒഴിവാക്കിയ താരങ്ങളില്‍ ഉള്‍പ്പെടുന്നു.
ഇംഗ്ലണ്ടിനായി ഏറ്റവും കൂടുതല്‍ ഗോളുകള്‍ നേടിയ ഹാരി കെയ്ന്‍ ആണ് ടീമിനെ നയിക്കുക. ബാഴസിലോണ താരം മാര്‍കസ് റാഷ്‌ഫോര്‍ഡ് ടീമില്‍ തെരികെയെത്തി. മാര്‍ച്ചില്‍ നടന്ന അന്താരാഷ്‌ട്ര ഫുട്‌ബോള്‍ വിന്‍ഡോയിലൂടെ മഗ്വേര്‍ നീണ്ട ഒരു ഇടവേളയ്‌ക്ക് ശേഷം ഇംഗ്ലണ്ട് ടീമില്‍ പ്രത്യക്ഷപ്പെട്ടത് ലോകകപ്പിന് മുന്നോടിയായാണെന്നാണ് കരുതിയത്. പക്ഷെ അന്തിമ പട്ടികയില്‍ ടുഷേല്‍ നിഷ്‌കരുണം ഒഴിവാക്കിയിരിക്കുകയാണ്. കോള്‍ പാല്‍മര്‍, ല്യൂക് ഷാ എന്നിവരും ഒഴിവാക്കപ്പെട്ട മുന്‍ നിര താരങ്ങളില്‍ ഉള്‍പ്പെടുന്നു.
പരിചയ സമ്പത്തും യുവത്വവും ഒത്തുചേര്‍ന്ന. അതിലുപരി ടീമുകളുടെ ഒത്തിണക്കത്തിന് പ്രാധാന്യം നല്‍കിയാണ് ടുഷേല്‍ ടീമിനെ പ്രഖ്യാപിച്ചിരിക്കുന്നത്.
ലോകകപ്പ് മത്സരങ്ങള്‍ക്ക് മുന്നോടിയായി ഇംഗ്ലണ്ടിന് ഏഴിന് ന്യൂസിലന്‍ഡിനെതിരെയും 11ന് കോസ്റ്റ റിക്കയ്‌ക്കെതിരെയും സന്നാഹ മത്സരങ്ങളുണ്ട്. ലോകകപ്പില്‍ ഗ്രൂപ്പ് എല്ലില്‍ ഉള്‍പ്പെട്ട ഇംഗ്ലണ്ടിന്റെ ആദ്യ മത്സരം 17ന് കരുത്തരായ ക്രൊയേഷ്യയ്‌ക്കെതിരെയാണ്. 23ന് രണ്ടാം മത്സരത്തില്‍ ഘാനയെയും 27ന് അവസാന ഗ്രൂപ്പ് പോരാട്ടത്തില്‍ പാനമയേയും നേരിടും.
ഇംഗ്ലണ്ട് ടീം
ഗോള്‍ കീപ്പര്‍മാര്‍: ജോര്‍ദാന്‍ പിക്ക്‌ഫോര്‍ഡ്, ജെയിംസ് ട്രാഫര്‍ഡ്, ഡീന്‍ ഹെന്‍ഡേഴ്‌സണ്‍
പ്രതിരോധ നിര: ഡാന്‍ ബേണ്‍, മാര്‍ക് ഗുവേഹി, റീസ് ജെയിംസ്, എസ്രി കോന്‍സ, ടിനോ ലിവ്‌റാമെന്റോ, നികോ ഓ റെയില്ലി, ജാറെല്‍ ഖ്വാന്‍സാഹ്, ഡിജേഡ് സ്‌പെന്‍സ്, ജോണ്‍ സ്‌റ്റോണ്‍സ്
മദ്ധ്യനിര: എല്ലിയറ്റ് ആന്‍ഡേഴ്‌സണ്‍, ജ്യൂഡ് ബെല്ലിങ്ങാം, എബെറെച്ചി എസെ, ജോര്‍ദാന്‍ ഹെന്‍ഡഴ്‌സണ്‍, കോബീ മയിനോ, ഡെക്ലാന്‍ റൈസ്, മോര്‍ഗാന്‍ റോജേഴ്‌സ്
മുന്‍നിര: ബുക്കായോ സാകാ, മാര്‍കസ് റാഷ്ഫഡ്, ആന്തണി ഗോര്‍ഡന്‍, ഹാരി കെയ്ന്‍, നോനി മഡ്യൂക്കെ, ഇവാന്‍ ടോണി, ഓല്ലീ വാറ്റ്കിന്‍സ്‌
