മഴമേഘങ്ങളെത്തി; കാത്തിരിക്കാം ഇടവപ്പാതിക്കായി, അഞ്ച് ജില്ലകളിൽ യെല്ലോ അലർട്ട്

കോട്ടയം: കാലവര്‍ഷ മേഘങ്ങളില്‍ ചിലത് കേരളത്തിന് മുകളില്‍ എത്തിയിട്ടുണ്ടെന്ന് സ്വകാര്യ കാലാവസ്ഥാ നിരീക്ഷകരായ മെറ്റ്ബീറ്റ് വെതര്‍. മധ്യ-പടിഞ്ഞാറന്‍ അറബിക്കടലില്‍ അടുത്ത ദിവസം ന്യൂനമര്‍ദ സാധ്യതയും കാലവര്‍ഷക്കാറ്റിന്റെ സ്വാധീനവും ഉള്ളതിനാല്‍ മേഘങ്ങള്‍ ശക്തമാണ്. പടിഞ്ഞാറന്‍ കാറ്റ്, കാലവര്‍ഷത്തിന്റെ മാനദണ്ഡപ്രകാരം അന്തരീക്ഷത്തിന്റെ വിവിധ മേഖലകളില്‍ ശക്തമല്ലാത്തതിനാ
ല്‍ തുടര്‍ച്ചയായ മഴ ലഭിക്കുന്നില്ല. അറബിക്കടലിലെ ന്യൂനമര്‍ദം അറേബ്യന്‍ കരയില്‍ കയറുന്നതോടെ കേരളത്തില്‍ കാലവര്‍ഷക്കാറ്റ് സജീവമായി പ്രവേശിച്ചു തുടങ്ങും. നിലവില്‍ കരയിലേക്കാള്‍ കടലിലാകും മഴ കൂടുതല്‍ ലഭിക്കുകയെന്നും മെറ്റ്ബീറ്റ് വെതര്‍ നിരീക്ഷിക്കുന്നു.

കേന്ദ്ര കാലാവസ്ഥാ വകുപ്പിന്റെ പ്രവചനമനുസരിച്ച് ഈ മാസം 26നാണ് കേരളത്തില്‍ കാലവര്‍ഷം (ഇടവപ്പാതി) എത്തേണ്ടത്. നാല് നാള്‍ അങ്ങോട്ടോ ഇങ്ങോട്ടോ വ്യതിയാനം ഉണ്ടായേക്കാം. മുകളിലൂടെ കന്യാകുമാരിവരെ നീളുന്ന ന്യൂനമര്‍ദപ്പാത്തിയും രൂപപ്പെട്ടിട്ടുണ്ടെന്ന് കാലാവസ്ഥാ വകുപ്പ് വിശദീകരിക്കുന്നു.

സംസ്ഥാനത്ത് ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. അഞ്ച് ജില്ലകളിൽ ഇന്ന് യെല്ലോ അലർട്ടും പ്രഖ്യാപിച്ചിട്ടുണ്ട്. മധ്യ- വടക്കൻ കേരളത്തിലാണ് കൂടുതൽ മഴയ്‌ക്ക് സാധ്യത. അതേസമയം നാളെ കൂടുതൽ ജില്ലകളിൽ ശക്തമായ മഴയ്‌ക്ക് സാധ്യതയുള്ളതിനാൽ എട്ട് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. മെയ് 26 വരെ മത്സ്യബന്ധനത്തിന് വിലക്കും ഏർപ്പെടുത്തിയിട്ടുണ്ട്.

23/05/2026: ആലപ്പുഴ, എറണാകുളം, തൃശ്ശൂർ, കോഴിക്കോട്, കണ്ണൂർ

24/05/2026: പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, മലപ്പുറം, കോഴിക്കോട്

25/05/2026: ആലപ്പുഴ, ഇടുക്കി, എറണാകുളം, തൃശ്ശൂർ, മലപ്പുറം

26/05/2026: ആലപ്പുഴ, ഇടുക്കി, എറണാകുളം, തൃശ്ശൂർ, കണ്ണൂർ, കാസര്‍കോട്‌

എന്നീ ജില്ലകളിൽ കേന്ദ്ര കാലാവസ്ഥ വകുപ്പ് മഞ്ഞ അലർട്ട് പ്രഖ്യാപിച്ചിരിക്കുന്നു.