ന്യൂദല്‍ഹി: വിദ്യാഭ്യാസപരമായും സാമ്പത്തികമായും മുന്നില്‍ നില്‍ക്കുന്ന കുടുംബങ്ങളിലെ വിദ്യാര്‍ത്ഥികള്‍ക്ക് പിന്നാക്ക വിഭാഗങ്ങള്‍ക്കുള്ള സംവരണം നല്‍കുന്നതെന്തിനെന്ന് സുപ്രീംകോടതി. മാതാപിതാക്കള്‍ ഐഎഎസ് ഉദ്യോഗസ്ഥരായ കുട്ടികള്‍ക്ക് സംവരണത്തിന്റെ ആവശ്യമെന്താണുള്ളത്, അവര്‍ സംവരണത്തില്‍ നിന്ന് പുറത്ത് പോകണമെന്നും കോടതി അറിയിച്ചു.
പിന്നാക്ക വിഭാഗങ്ങള്‍ക്കിടയിലെ ക്രീമിലെയര്‍ സംവരണാനുകൂല്യങ്ങളുമായി ബന്ധപ്പെട്ട കേസ് പരിഗണിക്കവെയാണ് കോടതി ഇക്കാര്യം ഉന്നയിച്ചത്. ജസ്റ്റിസ് ബി.വി. നാഗരത്‌ന, ജസ്റ്റിസ് ഉജ്ജല്‍ ഭുയാന്‍ എന്നിവരടങ്ങുന്ന ഡിവിഷന്‍ ബെഞ്ചാണ് ഹര്‍ജി പരിഗണിച്ചത്.
വിദ്യാഭ്യാസപരവും സാമ്പത്തികവുമായ ശാക്തീകരണത്തിലൂടെ സാമൂഹ്യ പുരോഗതിയുണ്ടാകുന്നുണ്ട്. അതിനുശേഷവും കുട്ടികള്‍ക്ക് സംവരണം ആവശ്യപ്പെടുകയാണെങ്കില്‍ ഇതില്‍ നിന്ന് നമുക്ക് ഒരിക്കലും പുറത്തുകടക്കാനാവില്ല. ഇക്കാര്യം ശ്രദ്ധിക്കേണ്ടതാണ്.
സംവരണാനുകൂല്യത്തില്‍ നിന്ന് മുന്നാക്കക്കാരെ ഒഴിവാക്കാന്‍ നിരവധി സര്‍ക്കാര്‍ ഉത്തരവുകള്‍ നിലവിലുണ്ടെന്നും കോടതി നിരീക്ഷിച്ചു. വിദ്യാര്‍ത്ഥികളുടെ മാതാപിതാക്കള്‍ക്ക് നല്ല ജോലിയും വരുമാനവുമുണ്ട്. എന്നിട്ടും കുട്ടികള്‍ വീണ്ടും സംവരണം ആവശ്യപ്പെടുകയാണ്. അവര്‍ക്ക് സംവരണത്തിന്റെ ആവശ്യമുണ്ടോ, അത്തരക്കാര്‍ സംവരണത്തില്‍ നിന്ന് പുറത്തുവരണമെന്നും കോടതി പറഞ്ഞു.
സംവരണാനുകൂല്യത്തിലൂടെ ഒരു കുടുംബം നിശ്ചിത നിലയിലുള്ള വിദ്യാഭ്യാസപരവും സാമ്പത്തികവുമായ ശാക്തീകരണം നേടിക്കഴിഞ്ഞ്, അവരുടെ അടുത്ത തലമുറയും സംവരണം ആവശ്യപ്പെട്ടാല്‍ അത് നല്‍കുന്നതിന് മുന്‍പ് യോഗ്യത പുനര്‍നിര്‍ണയിക്കണമെന്നും കോടതി ആവശ്യപ്പെട്ടു.
