കൊച്ചി:എന് സി പി സംസ്ഥാന അധ്യക്ഷ സ്ഥാനത്ത് നിന്ന് തോമസ് കെ.തോമസിനെ മാറ്റണമെന്ന് ആവശ്യപ്പെടുന്ന പ്രമേയം കൊച്ചിയില് ചേര്ന്ന ചാക്കോ അനുകൂലികളുടെ യോഗം പാസാക്കി.ആവശ്യം അറിയിക്കാന് പി സി. ചാക്കോ ഞായറാഴ്ച ദേശിയ അധ്യക്ഷന് ശരത് പവാറിനെ കാണും.
എന്.സി.പി സംസ്ഥാന ഘടകത്തിലെ പി.സി.ചാക്കോ അനുകൂലികളുടെ യോഗത്തിലാണ് തോമസ്.കെ.തോമസിനെ സംസ്ഥാന അധ്യക്ഷ സ്ഥാനത്ത് നിന്ന് നീക്കാന് പ്രമേയം പാസാക്കിയത്. യോഗത്തില് പങ്കെടുത്ത 42 പേരും പ്രമേയത്തെ അനുകൂലിച്ചു.മത്സരിച്ച മൂന്ന് സീറ്റുകളിലും തോറ്റ് നിയമസഭാ പ്രാതിനിധ്യം നഷ്ടമായതിന്റെ ഉത്തരവാദിത്തം സംസ്ഥാന അധ്യക്ഷനുണ്ടെന്ന കാരണമാണ് തോമസ്.കെ.തോമസിനെ മാറ്റാനായി പറയുന്നത്.
തോമസ് കെ.തോമസിന് പകരം പി.സി.ചാക്കോ സംസ്ഥാന അധ്യക്ഷ സ്ഥാനത്തേക്ക് മടങ്ങിവരണമെന്നാണ് യോഗത്തിലെ പൊതുവികാരം.പി സി ചാക്കോയ്ക്ക് അധ്യക്ഷ സ്ഥാനം വഹിക്കാന് താല്പര്യം ഇല്ലെങ്കില് അദ്ദേഹം നിര്ദേശിക്കുന്നയാള് പ്രസിഡന്റാകും. പി.എം.സുരേഷ് ബാബുവിനാണ് ഇതില് സാധ്യത കൂടുതല്.
മുന്നണി മാറ്റം സംബന്ധിച്ച് നേതാക്കള് ചോദ്യങ്ങള് ഉന്നയിച്ചെങ്കിലും തത്ക്കാലമില്ല എന്നായിരുന്നു പി.സി.ചാക്കോയുടെ മറുപടി. പുതിയ പാര്ട്ടി രൂപീകരിക്കാന് ശശീന്ദ്രന് പക്ഷം നിശ്ചയിച്ചാല് നേരിടാനാണ് ധാരണ.ശനിയാഴ്ച കോഴിക്കോട്ട് എ.കെ.ശശീന്ദ്രന് പക്ഷം യോഗം ചേരുന്നുണ്ട്. ഇടത് മുന്നണിയിലെ ചെറുപാര്ട്ടികളുമായി ചേര്ന്ന് പുതിയ പാര്ട്ടി രൂപീകരിക്കാനാണ് ശശീന്ദ്രന് പക്ഷം ഒരുങ്ങുന്നത്.
