ന്യൂദല്ഹി: നീറ്റ് ചോദ്യപേപ്പര് ചോര്ച്ച കേസ് അന്വേഷണം എന്ടിഎയ്ക്ക് വേണ്ടി ചോദ്യങ്ങള് തയാറാക്കി നല്കിയവരിലേക്കും നീളുന്നു. മെയ് 3ന് നടന്ന പരീക്ഷയിലെ കെമിസ്ട്രി ചോദ്യങ്ങള് ചോര്ന്ന പേപ്പറിലുള്ളതിന് സമാനമാണെന്ന് സിബിഐ കണ്ടെത്തിയിട്ടുണ്ട്. ചോദ്യപേപ്പര് ചോര്ന്നതിന്റെ ഉറവിടെ എന്ടിഎയില് നിന്ന് തന്നെയാണെന്നാണ് വിലയിരുത്തല്. ഇതിനെ തുടര്ന്ന് കെമിസ്ട്രി ചോദ്യങ്ങള് തയാറാക്കിയ അദ്ധ്യാപകരുും പരിഭാഷകരും അടക്കം 28 പേരുടെ വിവരങ്ങള് എന്ടിഎ സിബിഐക്ക് കൈമാറി. ഇവരെ ചോദ്യം ചെയ്യാന് വിളിച്ചുവരുത്തുമെന്ന് സിബിഐ അറിയിച്ചു.
പരീക്ഷാ ചുമതലയുണ്ടായിരുന്ന ഉദ്യോഗസ്ഥരുടെ മൊഴി സിബിഐ ഇതിന് മുമ്പ് ശേഖരിച്ചിരുന്നു. ഇവരുടെ പക്കലുണ്ടായിരുന്ന മൊബൈലും ലാപ്ടോപ്പുകളും പരിശോധിച്ചു. അതിനിടെ മഹാരാഷ്ട്ര നാഗ്പുരിലും ചാന്ദ്രപുരിലും അടക്കം വിവിധ സ്ഥലങ്ങളില് സിബിഐ പരിശോധന നടത്തി. പണം നല്കി ചോദ്യപേപ്പര് സംഘടിപ്പിച്ചുവെന്ന് സംശയിക്കുന്ന വിദ്യാര്ത്ഥികളുടെ വീടുകളിലാണ് പരിശോധന നടന്നത്. ചില നിര്ണായക വിവരങ്ങള് അന്വേഷണ സംഘത്തിന് ലഭിച്ചെന്നും ചിലരെ കസ്റ്റഡിയില് എടുത്തതായും സൂചനയുണ്ട്.
