ന്യൂദല്ഹി: അഞ്ച് രാഷ്ട്രങ്ങളിലെ ഔദ്യോഗിക സന്ദര്ശനത്തിന്റെ ഭാഗമായി ഇറ്റലിയിലെത്തിയ പ്രധാനമന്ത്രി നരേന്ദ്ര മോദിയെ നേരിട്ടെത്തി സ്വീകരിച്ച് ഇറ്റാലിയന് പ്രധാനമന്ത്രി ജോര്ജിയ മെലോണി. റോമിലേക്ക് സ്വാഗതം എന്റെ സുഹൃത്തേ എന്ന വാക്കുകളോടെയാണ് മെലോണി മോദിയെ സ്വീകരിച്ചത്. ഇറ്റലിയുടെ ഡെപ്യൂട്ടി പ്രധാനമന്ത്രിയും വിദേശകാര്യ- അന്താരാഷ്ട്ര സഹകരണ മന്ത്രിയുമായ അന്റോണിയോ താജാനിയും പ്രധാനമന്ത്രിയെ സ്വീകരിക്കാന് വിമാനത്താവളത്തിലെത്തി. റോമില് പ്രധാനമന്ത്രിക്ക് ഗാര്ഡ് ഓഫ് ഓണ് നല്കി. ശേഷം ചരിത്രപ്രസിദ്ധമായ കൊളോസിയത്തില് വെച്ച് മോദിയും മെലോണിയും സൗഹൃദവും പങ്കുവെച്ചു.
കൊളോസിയത്തിന് മുന്നില് മോദിയും മെലോണിയും ഒന്നിച്ച് നില്ക്കുന്ന ചിത്രങ്ങള് സമൂഹ മാധ്യമങ്ങളില് ചര്ച്ചയായിട്ടുണ്ട്.
പാര്ലെയുടെ മെലഡി മിഠായിയുമായാണ് മോദി മെലോണിയെ സന്ദര്ശിക്കാനെത്തിയത്. മോദിയില് നിന്ന് ലഭിച്ച പ്രത്യേക സമ്മാനമെന്ന പേരില് ഇതിന്റെ വീഡിയോ മെലോണി സമൂഹ മാധ്യമങ്ങളിലും പങ്കുവെച്ചിട്ടുണ്ട്. ഈ വീഡിയോയും വൈറലായിക്കഴിഞ്ഞു. പ്രധാനമന്ത്രി മോദി എനിക്കൊരു സമ്മാനം കൊണ്ടുവന്നിട്ടുണ്ട്. വളരെ വളരെ നല്ല മിഠായി, എന്ന് മെലോണി പറയുന്നതും അതിന് പിന്നാലെ ‘മെലഡി’ എന്ന് മോദി പറയുന്നതുമാണ് വീഡിയോയിലുള്ളത്. തുടര്ന്ന് ഇരു നേതാക്കളും ചിരിക്കുന്നതും കാണാം.
മോദിയും മെലോണിയും തമ്മിലുള്ള ഔദ്യോഗിക കൂടിക്കാഴ്ചയും ചിത്രങ്ങളും ആഗോള തലത്തില് എന്നും വലിയ ശ്രദ്ധ നേടാറുണ്ട്. ഇരു നേതാക്കളുടേയും പേര് കൂട്ടിച്ചേര്ത്തുകൊണ്ട് മെലോഡി (Melodi) എന്ന ഹാഷ്ടാഗിലാണ് ഇവരുടെ കൂടിക്കാഴ്ചകള് സമൂഹമാധ്യമങ്ങള് വിശേഷിപ്പിക്കുന്നത്.
മോദിയുടെ അഞ്ച് വിദേശരാജ്യ സന്ദര്ശനത്തിലെ അവസാനത്തെ രാജ്യമാണ് ഇറ്റലി.
