ബോണിമൗത്ത്: 22 വര്‍ഷത്തെ കാത്തിരിപ്പിനൊടുവില്‍ ആഴ്‌സണല്‍ ഇംഗ്ലീഷ് പ്രീമിയര്‍ ലീഗ് ടൈറ്റില്‍ സ്വന്തമാക്കി. ലീഗില്‍ ഇന്നലെ നടന്ന നിര്‍ണായക പോരാട്ടത്തില്‍ മാഞ്ചസ്റ്റര്‍ സിറ്റിയെ ബോണിമൗത്ത് 1-1 സമനിലയില്‍ പൂട്ടിയതോടെയാണ് ആഴ്‌സണല്‍ ചരിത്രത്തില്‍ 14-ാം തവണ കിരീടം സ്വന്തമാക്കിയത്.
മത്സരത്തില്‍ സിറ്റി ബോണി മൗത്തിനെ തോല്‍പ്പിച്ചിരുന്നെങ്കില്‍ ഞായറാഴ്‌ച്ച നടക്കുന്ന അവസാന മത്സരം ഫോട്ടോഫിനിഷിന്റേതാകുമായിരുന്നു. ലീഗില്‍ ഒരു റൗണ്ട് മത്സരം കൂടി ശേഷിക്കെ ആഴ്‌സണലിന് 82 പോയിന്റായി. രണ്ടാമത് നില്‍ക്കുന്ന സിറ്റിക്ക് 78 പോയിന്റേ ആയിട്ടുള്ളൂ. അവസാന റൗണ്ട് മത്സരത്തില്‍ സിറ്റി ജയിച്ചാല്‍ 81 പോയിന്റിലേ എത്തു. ആഴ്‌സണല്‍ അന്ന് തോറ്റാല്‍ പോലും ഒന്നും സംഭവിക്കില്ല.
വിഖ്യാത പരിശീലകനും നിലവില്‍ ഫിഫയുടെ ആഗോള വികസന വിഭാഗം തലവനുമായിട്ടുള്ള ആഴ്‌സേണ്‍ വെംഗറുടെ കാലത്താണ് ഇതിന് മുമ്പ് ആഴ്‌സണല്‍ കിരീടം നേടിയിട്ടുള്ളത്. 22 വര്‍ഷം മുമ്പ് 2003-04 സീസണില്‍. 1930-31 സീസണിലാണ് ആദ്യകിരീട നേട്ടം.
ആഴ്‌സണല്‍ അത് ചെയ്തു, മറ്റുള്ളവര്‍ നിശ്ചലരാകുമ്പോള്‍ ജേതാക്കളേ നിങ്ങള്‍ മുന്നോട്ട് കുതിച്ചാലും. ഇത് നിങ്ങളുടെ സമയമാണ്, പോകുക, ഇപ്പോള്‍ ഇത് ആസ്വദിക്കാനുള്ള സമയമാണ് – ആഴ്‌സേണ്‍ വെംഗര്‍ ട്വിറ്ററില്‍ കുറിച്ചു.
ബോണിമൗത്തിനെതിരായ നിര്‍ണായക പോരാട്ടത്തില്‍ സിറ്റി സമനില ഗോള്‍ നേടി രക്ഷപ്പെടുകയായിരുന്നു. ബോണിമൈത്തിന്റെ സ്വന്തം തട്ടകത്തില്‍ നടന്ന മത്സരത്തിന്റെ 38-ാം മിനിറ്റില്‍ എലി ജൂനിയര്‍ ക്രൂപിയിലൂടെ ആതിഥേയര്‍ മുന്നിലെത്തി. ആഴ്‌സണലിന്റെ കുറവിനെ കൃത്യമായി മുലെടുത്തുകൊണ്ട് നടത്തിയ മുന്നേറ്റം അതിമനോഹര ഗോളില്‍കലാശിക്കുകയായിരുന്നു. ഇതിനെതിരെ സിറ്റി പല പയറ്റും നടത്തിനോക്കി. ഒടുവില്‍ 90+4-ാം മിനിറ്റില്‍ ബോണിമൗത്ത് ഗോള്‍മുഖത്തെ കൂട്ടപൊരിച്ചിലിനൊടുവില്‍ എര്‍ലിങ് ഹാളണ്ട് നേടിയ ഗോളില്‍ സിറ്റി സമനില ഗോള്‍ നേടി ആശ്വസിക്കുകയായിരുന്നു. 56 പോയിന്റുള്ള ബോണിമൗത്ത് പട്ടികയില്‍ ലിവര്‍പൂളിന് തൊട്ടുപിന്നില്‍ ആറാം സ്ഥാനത്താണ്.
ഇത് പതിനാലാം കിരീടം
1. 1931, 2. 1933
3. 1934, 4. 1935
5. 1938, 6. 1948
7. 1953, 8. 1971
9. 1989, 10.1991
11.1998, 12.2002
13.2004, 14.2026
