ലണ്ടന്: അത്ഭുതങ്ങളൊന്നും സംഭവിച്ചില്ലെങ്കില് ആഴ്സണല് ഇന്ന് പുഷ്പം പോലെ ചാമ്പ്യന്സ് ലീഗ് സെമിയില് കടക്കും.
മറുഭാഗത്ത് സ്പോര്ട്ടിങ്ങിന് കരുത്തോടെ പൊരുതി ക്വാര്ട്ടറിലെത്തിയ ആത്മവിശ്വാസം ഉണ്ടായിരുന്നു. കഴിഞ്ഞ മത്സരത്തില് ആഴ്സണലിനെ നേരിടും വരെ. ചാമ്പ്യന്സ് ലീഗ് ആദ്യപാദ ക്വാര്ട്ടര് പോരാട്ടമായിരുന്ന ആ മത്സരത്തില് സ്വന്തം തട്ടകത്തില് സ്പോര്ട്ടിങ് 0-1ന് തോല്ക്കുകയായിരുന്നു. കളിയുടെ സമസ്ഥ മേഖലയിലും ആഴ്സണല് ആധിപത്യം പുലര്ത്തിയാണ് വിജയിച്ചത്. ഒരു ഗോള് മാത്രമേ ആഴ്സണല് നേടിയുള്ളൂ എന്നത് മാത്രമാണ് സ്പോര്ട്ടിങ്ങിന് ആശ്വസിക്കാനുള്ളത്. ഇന്ന് രാത്രി 12.30ന് ആഴ്സണലിന്റെ എമിറേറ്റ്സ് സ്റ്റേഡിയത്തിലാണ് കളി.
സ്പോര്ട്ടിങ്ങിനെതിരെ ഇന്ന് രണ്ടാം പാദ ക്വാര്ട്ടറിനിറങ്ങുമ്പോള് ആഴ്സണലിനെ അലട്ടുന്നത് പ്രീമിയര് ലീഗില് കഴിഞ്ഞ മത്സരത്തിലേറ്റ തോല്വിയാണ്. സ്പോര്ട്ടിങ്ങിനെതിരായ 1-0ന്റെ വിജയത്തിന് ശേഷമായിരുന്നു ആ തോല്വി. ആദ്യപാദത്തില് ഒരു ഗോള് മാത്രമേ നേടിയുള്ളൂ എന്ന വിമര്ശനം നേരിടുന്നതിനിടയിലാണ് മൈക്കല് അര്ട്ടേറ്റയുടെ ആഴ്സണല് തോല്വി വഴങ്ങിയത്. പ്രീമിയര് ലീഗില് ഒന്നാമന്മാരായ ആഴ്സണലിനെക്കാള് പത്ത് സ്ഥാനം പുറകിലുള്ള ബോണിമൗത്തിനോടാണ് പരാജയം ഏറ്റുവാങ്ങിയത്. അതും സ്വന്തം എമിറേറ്റ്സ് സ്റ്റേഡിയത്തിലായിരുന്നുവെന്നത് ആഴ്സണലിന്റെ ആത്മവീര്യം ചോര്ത്തിക്കളഞ്ഞിട്ടുണ്ടോയെന്ന് സംശയമാണ്. അതിനൊന്നും ഇടമില്ലെന്ന് തെളിയിക്കലാണ് ഇന്ന് ഈ ഇംഗ്ലീഷ് കരുത്തരുടെ ഏറ്റവും വലിയ വെല്ലുവിളി.
