ബേണ്: ഫിഫ ലോകകപ്പ് 2026നുള്ള സ്വിറ്റ്സര്ലന്ഡ് ടീമിനെ പ്രഖ്യാപിച്ചു. ഗ്രാനിറ്റ് ഷാക്ക ടീമിനെ നയിക്കും. ടീമിലെ ഏറ്റവും പരിചയ സമ്പന്നനാണ് ഈ മദ്ധ്യനിര താരം. 2011 മുതല് ദേശീയ ടീമിന്റെ ഭാഗമായ താരം 144 അന്താരാഷ്ട്ര മത്സരങ്ങളില് കളിച്ചിട്ടുണ്ട്. 2014 മുതല് മൂന്ന് ലോകകപ്പുകളുടെ ഭാഗമായി. നിലവില് ഇംഗ്ലീഷ് പ്രീമിയര് ലീഗ് ടീം സണ്ടര് ലാന്ഡിന്റെ താരമാണ്.
പരിശീലകന് മുറാത്ത് യാക്കിന് തെരഞ്ഞെടുത്ത ടീമില് 17 പേരും കഴിഞ്ഞ തവണത്തെ ഖത്തര് ലോകകപ്പില് കളിച്ചവരാണ്. മൂന്ന് പേര് ജര്മനി ആതിഥേയരായ 2024 യൂറോയിലും കളിച്ചിട്ടുണ്ട്. ബാക്കിയുള്ള ആറ് താരങ്ങള് ആദ്യമായാണ് പ്രധാന ടൂര്ണമെന്റില് പന്ത് തട്ടാനൊരുങ്ങുന്നത്. ഗോള് കീപ്പര് മാര്വിന് കെല്ലര്, ഔറേലെ അമേന്ഡെ, കെഡ്രിക് ഇട്ടെന്, ലൂകാ ജാക്വേസ്, യോഹാന് മന്സാംബി, മിറോ മുഹേയിം എന്നവരാണ് പ്രധാന ടൂര്ണമെന്റ് നേരിടാനിറങ്ങുന്ന മറ്റ് താരങ്ങള്.
ക്യാപ്റ്റന് ഷാക്കയ്ക്ക് പുറമെ മറ്റൊരു പ്രതിരോധ താരം റിക്കാര്ഡോ റോഡ്രിഗസും പരിചയ സമ്പത്തുള്ള താരമായി കൂടെയുണ്ട്. 136 അന്താരാഷ്ട്ര മത്സരങ്ങളിലാണ് റിക്കാര്ഡോ കളിച്ചിട്ടുള്ളത്.
ലോകകപ്പില് ജൂണ് 13നാണ് സ്വിറ്റ്സര്ലന്ഡിന്റെ ആദ്യ പോരാട്ടം. ഗ്രൂപ്പ് ബിയില് ഉള്പ്പെട്ട ടീം ആദ്യ മത്സരത്തില് ഖത്തറിനെ നേരിടും. തുടര്ന്ന് ബോസ്നിയയെയും കാനഡയെയും ടീം നേരിടും.
സ്വിറ്റ്സര്ലന്ഡ് ടീം:
ഗോള് കീപ്പര്മാര്- മാര്വിന് കെല്ലര്, ഗ്രഗര് കോബല്, യ്വോന് എംവോഗോ
പ്രതിരോധം: മാനുവേല് അകാഞ്ജി, ഔറേലെ അമേന്ഡ, എറേ കൊമേര്ട്ട്, നികോ എല്വേദി, ലൂക്കാ ജാക്വേസ്, മിറോ മുഹേയിം, റിക്കാര്ഡോ, റോഡ്രിഗസ്, സില്വാന് വിഡ്മെര്
മദ്ധ്യനിര: മൈക്കല് അയേബിഷര്, ക്രിസ്റ്റിയന് ഫസ്നാച്ച്, റെമോ ഫ്ര്യൂലര്, ആര്ദോന് യഷാരി, യോഹാന് മന്സാംബി, ഫാബിയാന് റിയേഡെര്, ഡൈബ്രില് സോവ്, റൂബന് വര്ഗാസ്, ഗ്രാനിറ്റ് ഷാക്ക, ഡെനിസ് സക്കറിയ
സ്ട്രൈക്കര്: സെകി അംദൗനി, ബ്രീല് എംബോളോ, കെഡ്രിക് ഇട്ടെന്, ഡാന് എന്ഡോയെ, നോഹ് ഒകാഫോര്
