കണ്ണൂര്: വിവാഹ മോചനക്കേസില് കുടുംബകോടതിയിലെത്തിയ സ്വകാര്യ കോളജ് അധ്യാപകന് കോടതി പരിസരത്ത് എതിര് ഭാഗം അഭിഭാഷകയെ ആക്രമിച്ചു.തിരുവനന്തപുരം സ്വദേശിനിയായ നിലവില് കതിരൂര് മൂന്നാം മൈലില് താമസിക്കുന്ന അഭിഭാഷക പി.വി. സോണിയ(56) ആണ് ആക്രമിക്കപ്പെട്ടത്.
സംഭവത്തില് വിളക്കോട്ടൂര് സ്വദേശി കീഴാലി പൊയില് വീട്ടില് കെ.പി. ദിവാകരനെ (51 ) തലശേരി പൊലീസ് കസ്റ്റഡിയിലെടുത്തു.കുടുംബ കോടതി കൗണ്സിലിംഗ് ഹാളിന് പുറത്തെ കാത്തിരിപ്പ് മുറിക്ക് സമീപം സഹപ്രവര്ത്തകയുമായി അഭിഭാഷക സംസാരിച്ചു നില്ക്കെ ദിവാകരന് അസഭ്യം പറഞ്ഞുകൊണ്ട് മുഖത്തടിക്കുകയും വസ്ത്രത്തില് പിടിച്ചു വലിച്ച് തള്ളിയിടുകയുമായിരുന്നു. നിലത്തുവീണ അഭിഭാഷകയുടെ ബോധം നഷ്ടപ്പെടുകയും നട്ടെല്ലിനും കഴുത്തിനും മുഖത്തും പരിക്കേല്ക്കുകയും ചെയ്തതിനെ തുടര്ന്ന് തലശേരി ജനറല് ആശുപത്രിയില് പ്രവേശിപ്പിച്ചു. മാഹി യിലെ സ്വകാര്യ കോളേജ് അധ്യാപകനാണ് ദിവാകരന്. ഭാര്യയുമായി പിരിഞ്ഞ് കഴിയുന്ന ഇയാള്ക്കെതിരെ കുടുംബ കോടതിയില് വിവാഹ മോചനത്തിനും ജീവനാംശത്തിനും കേസുണ്ട്.ഭാര്യയുടെ കേസ് നടത്തുന്ന വിരോധമാണ് അഭിഭാഷകയെ ആക്രമിക്കാന് പ്രേരിപ്പിച്ചത്.
ദേഹാസ്വാസ്ഥ്യം അനുഭവപ്പെട്ട ദിവാകരനും ജനറല് ആശുപത്രിയില് ചികിത്സതേടി. അഭിഭാഷക കോടതി വളപ്പില് ആക്രമിക്കപ്പെട്ട സംഭവത്തില് ബാര് അസോസിയേഷന് അടിയന്തിര യോഗം ചേര്ന്ന് പ്രതിഷേധിച്ചു.
