ഗുവാഹത്തി: ഇന്ത്യന്‍ ടി20 ക്രിക്കറ്റ് ടീമിന്റെ നായക സ്ഥാനത്തേക്ക് മലയാളികളുടെ പ്രിയതാരം സഞ്ജു സാംസണ്‍ എത്തുമോ? കൃത്യമായ വിവരം ഇന്നറിയാം.
ഒട്ടും ഫോമിലല്ലാത്ത സൂര്യകുമാര്‍ യാദവിനെ മാറ്റണമെന്ന് ബിസിസിഐയിലെ ചിലരില്‍നിന്നുവരെ ആവശ്യമുയര്‍ന്ന പശ്ചാത്തലത്തിലാണ് സഞ്ജു സാംസണെ നായക സ്ഥാനത്തേക്ക് പരിഗണിക്കുന്നത്. ഇക്കാര്യത്തില്‍ മുഖ്യ പരിശീലകന്‍ ഗൗതം ഗംഭീറിന്റെ നിലപാട് നിര്‍ണായകമാകും. ഇന്ന് ഗുവാഹത്തിയില്‍ നടക്കുന്ന യോഗത്തില്‍ ഇക്കാര്യത്തില്‍ തീരുമാനമെടുക്കും. ഇന്നു നടക്കുന്ന യോഗത്തില്‍ അഫ്ഗാനിസ്ഥാനെതിരായ പരമ്പരയ്ക്കുള്ള ഭാരത ടീമിനെ പ്രഖ്യാപിക്കും. ഫോമിലല്ലാത്ത സൂര്യകുമാര്‍ യാദവിനെ ഒഴിവാക്കുമെന്ന സൂചനയുമുണ്ട്. ബിസിസിഐ സെക്രട്ടറി ദേവജിത് സൈകിയയ സൂര്യയെ മാറ്റണമെന്ന നിലപാടിലാണുള്ളത്.
സഞ്ജുവിന്റെ സ്ഥിരതയാര്‍ന്ന പ്രകടനവും നേതൃത്വ മികവും സെലക്ഷന് കമ്മിറ്റി പരിഗണിച്ചിട്ടുണ്ട്. ടി20 ലോകകപ്പിലെയും ഐപിഎല്ലിലെയും മികച്ച പ്രകടനം കണക്കിലെടുത്ത് സഞ്ജു ടീമിലുണ്ടാകുമെന്നുറപ്പാണ്. ഇനി നായകനാകുമോ എന്ന കാര്യത്തില്‍ മാത്രമാകും സംശയം. കഴിഞ്ഞ ടി20 ലോകകപ്പില്‍ ഇന്ത്യ കിരീടം നേടുന്നതില്‍ സഞ്ജുവാണ് നിര്‍ണായക പങ്കുവഹിച്ചത്. സഞ്ജുവിനൊപ്പം ശ്രേയസ് അയ്യരെയും നായക സ്ഥാനത്തേക്ക് പരിഗണിക്കുന്നുണ്ട്.
എന്നാല്‍, ദീര്‍ഘകാലമായി ശ്രേയസ് ടീമിലല്ലാത്തതിനാണ് ശ്രേയസിനെ ടീമിലുള്‍പ്പെടുത്തി സഞ്ജുവിന് നായകനാകാനുള്ള അവസരം നല്‍കണമെന്നാണ് പൊതുനിലപാട്. ചെന്നൈ സൂപ്പര്‍ കിങ്‌സില്‍ കളിക്കുന്ന സഞ്ജു മികച്ച പ്രകടനം തുടരുമ്പോഴും നേതൃഗുണം പ്രകടിപ്പിക്കുന്നു.
സമചിത്തതയോടെ സാഹചര്യത്തെ മനസ്സിലാക്കിയാണ് സഞ്ജു തന്റെ റോള്‍ നിര്‍വഹിക്കുന്നത്. അത് വലിയൊരു നേതൃഗുണമാണെന്ന് സെലക്ഷന് കമ്മിറ്റി കരുതുന്നു.
